ថៃ នឹងផ្តល់រថភ្លើង១គ្រឿង ឱ្យកម្ពុជា ក្រោយចុះកិច្ចព្រមព្រៀងនៅថ្ងៃ ២២មេសាខាងមុខ

2019-04-05 03:19:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសថៃ នឹងផ្តល់រថភ្លើងដើរដោយប្រេងម៉ាស៊ូត ១គ្រឿង (មាន៤ទូ) ឱ្យកម្ពុជា ដែលបង្ហាញពីកិច្ចសហប្រតិបត្តិការរវាងប្រទេសទាំង២។ នេះបើតាមការចុះផ្សាយរបស់ Bangkok Post នៅថ្ងៃទី៥ ខែមេសា ឆ្នាំ២០១៩នេះ ដែលបានដកស្រង់សម្តីលោក Arkhom Termpittayapaisith រដ្ឋមន្រ្តីក្រសួងដឹកជញ្ជូនថៃ។

លោកបញ្ជាក់ថា រថភ្លើងនេះ នឹងត្រូវបញ្ចេញនៅថ្ងៃបើកដំណើរផ្លូវដែកថ្មីភ្ជាប់គ្នារវាងប្រទេសទាំងពីរ ពោលគឺតភ្ជាប់ពីស្រុកអារញ្ញ ខេត្តស្រះកែវ មកប៉ោយប៉ែត ស៊ីសុផុន និងបាត់ដំបង។

រថភ្លើងនៅស្ថានីយប៉ោយប៉ែត

លោក Arkhom សង្ឃឹមថា ការតភ្ជាប់ផ្លូវដែកថ្មីនេះ និងជំរុញទេសចរណ៍ និងការដឹកជញ្ជូនទំនិញឆ្លងកាត់ព្រំដែនប្រទេសទាំង២ ហើយក៏ជំរុញកិច្ចសហប្រតិបត្តិការសេដ្ឋកិច្ចផងដែរ ដែលនេះគឺជាផ្នែកមួយនៃគម្រោងច្រករបៀងសេដ្ឋកិច្ចភាគខាងត្បូង នៃតំបន់អនុទន្លេមេគង្គ រួមមាន មីយ៉ាន់ម៉ា, ថៃ, កម្ពុជា និងវៀតណាម។

បើតាមលោក Worawut Mala ប្រធានស្តីទីក្រុមហ៊ុនផ្លូវដែកថៃ បានឱ្យដឹងថា រដ្ឋាភិបាលប្រទេសទាំងពីរ នឹងចុះកិច្ចព្រមព្រៀងមួយក្នុងការធ្វើការរួមគ្នាលើផ្លូវដែកថ្មីនេះ នៅថ្ងៃទី២២ ខែមេសា ឆ្នាំ២០១៩ ខាងមុខ ក្រោយបញ្ចប់កិច្ចចរចាលើបញ្ហានេះរួចមក។

លោកបន្តថា ការចុះកិច្ចព្រមព្រៀងនេះ នឹងធ្វើឡើងក្រោមអធិបតីភាពលោកនាយករដ្ឋមន្រ្តី ប្រាយុទ្ធ ចាន់អូចា និងសម្តេចនាយករដ្ឋមន្រ្តី ហ៊ុន សែន។ ហើយថៃ នឹងប្រគល់រថភ្លើង ឱ្យកម្ពុជា ក្រោយចុះកិច្ចព្រមព្រៀងនេះ៕

ប្រភព៖ Bangkokpost ប្រែសម្រួល៖ សំភី