ភូមិខ្មោចដ៏អាថ៌កំបាំង នៅខេត្តរតនគីរី

2019-04-16 09:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ភូមិខ្មោចជនជាតិភាគតិចកាចក់ដ៏អាថ៌កំបាំង ដែលស្ថិតនៅភូមិកោះពាក្យ ឃុំកោះពាក្យ ស្រុកវើនសៃ ខេត្តរតនៈគិរី បានបង្កប់នូវអប្បិយជំនឿដ៏រន្ធត់ព្រឺព្រួច សូម្បីម៉ោង១២កណ្ដាលថ្ងៃត្រង់ ក៏គ្មានអ្នកណាហ៊ានចូលទៅដែរ ព្រោះគេមានជំនឿថា ខ្មោចមានឥទ្ធិពលកាចសាហាវណាស់។ នេះបើតាមការឲ្យដឹងរបស់លោក ស៊ី សាវ៉េត អ្នកនាំភ្ញៀវទេសចរ នៅខេត្តរតនគិរី។

លោក ស៊ី សាវ៉េត បានបញ្ជាក់ថា កាចក់ ជាជនជាតិភាគតិចមួយ ក្នុងចំណោមជនជាតិភាគតិចទាំង៦ នៅខេត្តរតនគិរី ហើយបច្ចុប្បន្នជនជាតិនេះ នៅសល់តិចជាងគេបំផុត។ ពួកគេមានភូមិ២ គឺភូមិមួយសម្រាប់ពួកគេរស់នៅ និងភូមិមួយទៀត ជាភូមិខ្មោច មានផ្ទៃដីរាប់សិបហិកតា សម្រាប់កប់ខ្មោច តាំងពីដូនតារបស់ពួកគេមក។

ពេលធ្វើដំណើរចូលដល់ភូមិខ្មោច ក្នុងព្រៃមានដើមឈើតូចធំដ៏ត្រជាក់ ស្ថិតក្នុងម្លប់រាងងងឹតបន្តិច ខ្យល់បករវិចៗ ធ្វើឲ្យស្លឹកឈើរង្គើ រួមទាំងមានផ្នូរខ្មោចជាច្រើននៅនឹងមុខ ដែលអាចធ្វើឲ្យអ្នកមានអារម្មណ៍ព្រឺសម្បុរ ទោះបីមានគ្នា៤ទៅ៥នាក់ក៏ដោយ។ លោក សាវ៉េត បន្តថា ទំនៀមទម្លាប់របស់អ្នកភូមិជនជាតិកាចក់ ពេលអ្នកណាដើរចូលទៅក្នុងព្រៃខ្មោច គឺមិនឲ្យចូលក្នុងភូមិវិញទេ ព្រោះខ្លាចព្រលឹងខ្មោចទៅអុកឡុកអ្នកភូមិ ហើយម៉ោង១២ថ្ងៃត្រង់ ក៏គ្មានអ្នកណាហ៊ានចូលដែរ ព្រោះពួកគេជឿថា ជាពេលដែលខ្មោចមានឥទ្ធិពលកាចសាហាវ បើនិយាយពីពេលយប់គឺ គ្មានអ្នកណាហ៊ានក្បែរឡើយ។

ភ្ញៀវទេសចរបរទេស ទៅស្វែងយល់ពីភូមិខ្មោច

រីឯភ្ញៀវទេសចរដែលចូលទៅមើលព្រៃខ្មោច ត្រូវធ្វើសញ្ញាខ្វែង (សម្រាប់អ្នកដើរក្រោយគេ) ដើម្បីរារាំងខ្មោចកុំឲ្យដើរតាមទៀត និងមិនអនុញ្ញាតឲ្យចូលក្នុងភូមិរបស់ជនជាតិកាចក់ទៀតទេ គឺត្រូវតែត្រឡប់ទៅស្រុកវិញភ្លាមៗ ហើយបើមានធ្លាក់បាត់របស់អ្វីក្នុងភូមិខ្មោចនោះ ក៏មិនអាចត្រឡប់ទៅរកវិញបានដែរ។ សូម្បីអ្នកភូមិជនជាតិកាចក់ ដែលស្ថិតជាប់ភូមិខ្មោច ក្បែរគ្នានោះ ពួកគេក៏ខ្លាចញញើតភូមិព្រៃខ្មោចដែរ សូម្បីជិះទូកនៅលើទន្លេចតក្បែរព្រៃខ្មោចនោះ ក៏មិនហ៊ានផង៕