អ្នក​កីឡាកាស ១០​រូប ដែលវិវត្តខ្លួនជាតារាសម្ដែងល្បី

  • 2019-05-20 05:17:58
  • ចំនួនមតិ 0 | ចំនួនចែករំលែក 0

ចន្លោះមិនឃើញ


អ្នក​​កីឡាកាស​ភាគច្រើន មាន​មាន​មាឌ​មាំ ស្រស់​សង្ហា​ ហើយ​ក៏​មាន​សមត្ថភាព​សម្ដែង​លើ​សង្វៀន​មិន​ធម្មតា​ដែរ។ ដោយសារ​រូបរាង​អំណោយផល​ និង​ទេពកោសល្យ​ទាំង​នេះ​ហើយ​ ទើប​ធ្វើ​ឲ្យ​ពួកគេ​មួយ​ចំនួន​ វិវត្ត​ខ្លួន​ទៅ​ជា​តារា​សម្ដែង​នៅ​ហូលីវូដ។​ ខាង​ក្រោម​នេះ ជា​កីឡាកាស​ល្បី​ៗ​ទាំង​ ១០​នាក់​ដែល​ក្លាយ​ជា​តារា​សម្ដែង​៖

១. Dwayne Jonhson

Dwayne Jonhson ដែល​អ្នកគាំទ្រ​ ជាទូទៅ​ស្គាល់​លោក​ថា​ជា​ "The Rock” នោះ​កើត​នៅ​ថ្ងៃ​ទី​ ០២ ខែ​ឧសភា​ ឆ្នាំ​ ១៩៧២​ នៅ​ក្នុង​ទី​ក្រុង​ Heyward រដ្ឋ​ California។ លោក​ចូល​ប្រឡូក​ក្នុង​វិស័យ​កីឡាកាស​ តាំង​ពី​ឆ្នាំ​ ១៩៩៦​ រហូត​មក​ដល់​បច្ចុប្បន្ន​ និង​ក្លាយ​ជា​តារា​សម្ដែង​តាំង​ឆ្នាំ​ ១៩៩៩ រហូត​មក​ដល់​បច្ចុប្បន្ន​ដូចគ្នា​។ រឿង​ដែល​លោក​ទទួល​បាន​ការគាំទ្រខ្លាំង​គឺ​រឿង​ "Furious 7"។

២. Dave Bautista

លោក​កើត​នៅ​ថ្ងៃ​ទី​ ១៨​ ខែ​មករា​ ឆ្នាំ​១៩៦៩​ ក្នុង​រដ្ឋ​ Washington, DC។ ឪពុក​របស់​លោក​ជា​ជនជាតិ​ហ្វីលីពីន​ ហើយ​ម្ដាយ​មាន​ដើម​កំណើត​ជា​ជនជាតិ​ក្រិក​។ Bautista ចាប់​អាជីព​ជា​​អ្នក​កីឡាកាស​តាំង​ពី​ឆ្នាំ​ ១៩៩៩ រហូត​ដល់​ឆ្នាំ​ ២០១៤​ និង​បាន​ឈាន​ជើង​ចូល​ក្នុង​វិស័យ​សម្ដែង​ចាប់​ពី​ឆ្នាំ​ ២០០៦​ រហូត​មកដល់​បច្ចុប្បន្ន​។ រឿងដែលលោក​ទទួល​បាន​ភាពជោគជ័យ​ខ្លាំង​ គឺ​រឿង​ "Guardians of the Galaxy" ក្នុង​ឆ្នាំ​ ២០១៤។

៣. Jonh Cena

កីឡាករ​រូប​នេះ​មាន​ឈ្មោះ​ពេញ​ Jonh Felix Anthony Cena ជា Super Star ប្រចាំ​ WWE ។ លោក​កើត​នៅ​ថ្ងៃ​ទី​ ២៣​ ខែ​មេសា​ ឆ្នាំ​១៩៧៧​ នៅ​ទីក្រុង​ West Newbury រដ្ឋ​ Massachusetts។ លោក​បាន​ក្លាយ​ខ្លួន​ជា​​អ្នក​កីឡាកាស​តាំង​ពី​ឆ្នាំ​ ១៩៩៩​ ហើយ​ក្លាយ​ជា​តារា​សម្ដែង​ចាប់​ពី​ឆ្នាំ​ ២០០០​ ហើយរឿងដែលលោកទទួលបានការគាំទ្រ​ខ្លាំង គឺ​រឿង​ "The Reunion" ក្នុង​ឆ្នាំ​ ២០១១ និង​ធ្វើ​ជា​ពិធីករ​ទូរទស្សន៍​ នៅ​ឆ្នាំ​ ២០១៦​។ មក​ទល់​បច្ចុប្បន្ន​លោក​នៅ​តែ​ចាប់​អាជីព​ទាំង​ ៣​នេះ​ដដែល​។ ដោយឡែក​ Jonh Cena ក៏​ធ្លាប់​ជា​តារា​រ៉េប​ម្នាក់​ដែរ​ ។

៤. Paul Levesque

Paul Levesque ជា​ឈ្មោះ​ពេញ​របស់​ Triple H។ លោក​កើត​ថ្ងៃ​ទី​ ២៧​ ខែ​កក្កដា​ ឆ្នាំ​ ១៩៦៩ នៅ​ទីក្រុង​ Nashua រដ្ឋ​ New Hampshire សហរដ្ឋអាមេរិក។ លោក​បាន​ចាប់​អាជីព​ជា​តារា​សម្ដែង​តាំង​ពី​ឆ្នាំ​ ១៩៩២​ និង​បន្ត​រហូត​មក​បច្ចុប្បន្ន​ ។ ដោយឡែក​លោក​ក៏​បាន​ ចូល​សម្ដែង​ក្នុង​ខ្សែភាពយន្ត​ជា​ច្រើន​ដែរ​ តាំង​ពី​ ឆ្នាំ​ ១៩៩៨​ ដល់​ឆ្នាំ​២០១១​។ ក្នុង​ឆ្នាំ ២០១១​នោះ​ដែរ​ លោក​បាន​សម្ដែង​ក្នុង​រឿង "Inside Out" ហើយ​បាន​ទទួលភាពជោគជ័យគួរសម។

៥. Paul Wight

Big Show មាន​ឈ្មោះ​ពេញ​ Paul Donald Wight II កើត​ថ្ងៃ​ ០៨​ ខែ​កុម្ភៈ​ ឆ្នាំ​១៩៧២​ នៅ​រដ្ឋ​ Carolina សហរដ្ឋអាមេរិក​។ លោក​ក្លាយ​ជា​កីឡាកាស​តាំង​ពី​ឆ្នាំ​ ១៩៩៥​ ហើយ​ក្លាយ​ជា​តារា​សម្ដែង​នៅ​ក្នុង​ឆ្នាំ​ ១៩៩៦​។ ថ្វីត្បិតលោក​បាន​សម្ដែង​រឿង​ជាច្រើន​ តែរឿង​ដែល​លោក​បាន​ដើរជាតួឯក​ដំបូងនោះ​គឺរឿង "Knucklehead" ក្នុង​ឆ្នាំ​២០១១។

៦. Mike 'TheMiz' Mizanin

កីឡាករ​ និង​ជា​តារា​សម្ដែង​រូប​នេះ​មាន​ឈ្មោះ​ពេញ​ Michael Gregory Mizanin កើត​នៅ​ថ្ងៃ​ ០៨​ ខែ​តុលា​ ឆ្នាំ​១៩៨០​ ក្នុង​ទីក្រុង​ Parma​ រដ្ឋ Ohio សហរដ្ឋអាមេរិក​។ លោក​ក្លាយ​ជា​កីឡាកាស​នៅ​ឆ្នាំ​ ២០០៣​ និង​ចូល​សម្ដែង​ក្នុង​ឆ្នាំ​ ២០១២។ ហើយកាល​ពី​ពេល​ថ្មី​ៗ​នេះ​លោក​ក៏​បាន​ចូលរួម​សម្ដែង​ក្នុង​រឿងបែបបាញ់ប្រហារមួយដែរ​មានចំណងជើងថា "The Marine 5: Battleground"។

៧. Randy Orton

Randy មាន​ឈ្មោះ​ពិត​ Randall Keith Orton កើត​ថ្ងៃ​ទី​ ០១ ខែមករា​ ឆ្នាំ​ ១៩៨០​ នៅ​ទី​ក្រុង​ Knoxville រដ្ឋ​ Tennessee សហរដ្ឋអាមេរិក​ ។ លោក​ចូល​ប្រឡូក​ក្នុង​កីឡាកាស​ដំបូង​ នៅ​ឆ្នាំ​ ២០០០ និង​បន្ត​មក​ដល់​សព្វថ្ងៃ​ រី​ឯ​អាជីព​ជា​តារា​សម្ដែង​ លោក​បាន​ឈានជើង​ចូល​នៅ​ឆ្នាំ​ ២០១១​។ កាល​ពី​ឆ្នាំ ២០១៥​ លោក​បាន​ដើរជាតួឯក​ក្នុងរឿង "The Condemned 2"។

៨. Dalip Singh

កីឡាកាស​រូប​នេះ​ត្រូវ​បាន​គេ​ស្គាល់​ថា​ ជា​ "The Great Kali” ដែល​មាន​ឈ្មោះ​ពេញ​ Dalip Singh Rana ។ លោក​កើត​ថ្ងៃ​ទី​ ២៧​ ខែ​សីហា​ ឆ្នាំ​១៩៧២​ នៅ​រដ្ឋ​ Himachal Pradesh ប្រទេស​ឥណ្ឌា​។ លោក​បាន​ក្លាយ​ជា​ កីឡាកាស​តាំង​ពី​ឆ្នាំ​ ២០០០ និង​វិវត្ត​ខ្លួន​ក្លាយ​ជា​តារា​សម្ដែង​ ក្នុង​ឆ្នាំ​២០០៥​។ The Great Khali បានសម្ដែង​ក្នុងរឿង​ជា​ច្រើន​ទាំង​ ហូលីវូដ និង​បូលីវូដ តែ​ក្នុង​ចំណោមរឿងទាំង​អស់​រឿង​ដែល​លោក​ជោគជ័យ​ខ្លាំង​គឺ​រឿង​ "Kushti" កាល​ពី​ឆ្នាំ​ ២០១០។

៩. Mark Calaway

ជាទូទៅ​ Mark Calaway ត្រូវ​បាន​គេ​ស្គាល់​ថា​ជា​ "The Undertaker”។ លោក​កើត​ថ្ងៃ​ទី​ ២៤​ ខែ​មីនា​ ឆ្នាំ​ ១៩៦៥ នៅ​រដ្ឋ​ Texas សហរដ្ឋអាមេរិក។ លោក​បាន​ចាប់​អាជីព​ជា​កីឡាកាស​តាំង​តែ​ពី​ឆ្នាំ​ ១៩៨៤ និង ក្លាយ​ជា​តារា​សម្ដែង​ នៅ​ក្នុង​ឆ្នាំ​ ១៩៩១។ រឿង​ដែល​លោក​សម្ដែង​មុនគេគឺជា​រឿង​បែបកំប្លែង មាន​ចំណងជើងថា "Suburban Commando" ក្នុង​ឆ្នាំ ១៩៩១។

១០. Glenn Jacobs

Glenn Jacobs គឺជា​ឈ្មោះ​ពិត​របស់​ Kane កើត​ថ្ងៃ​ទី​ ២៦​ ខែ​មេសា​ ឆ្នាំ​ ១៩៦៧​ នៅ​ប្រទេស​អេស្ប៉ាញ​។ លោក​ក្លាយ​ជា​កីឡាកាស​កាល​ពី​ឆ្នាំ​ ១៩៩២​ និង​បាន​ប្រឡូក​ក្នុង​វិស័យ​សិល្បៈ​ផ្នែក​សម្ដែង​ ក្នុង​ឆ្នាំ​ ២០០៦ ក្នុងរឿងដំបូង "See No Evil" និង​រឿង "See No Evil" វគ្គ ២ ក្នុង​ឆ្នាំ ២០១៤។​ ក្រៅពី​រឿងទាំងនេះ​ លោក​ក៏បានទទួល​ការគាំទ្រ​ខ្លាំង​តាមរយៈ​រឿងជាច្រើនទៀត​ផងដែរ៕

ចុចអាន៖ ទម្លាយ​ឲ្យដឹង​ប្រាក់​ខែ​អ្នកកីឡាកាស WWE ល្បីៗ​ ១០រូប នៅសង្វៀន Raw និង Smackdown

អត្ថបទ៖ យី សុធារី

អត្ថបទថ្មី
;