លោក ឃួង ស្រេង ព្រមាន​ថា អភិបាល​ខណ្ឌ​ត្រូវ​ទទួល​វិន័យ បើ​សំណង់​ខុសច្បាប់​នៅតែ​កើតមាន​ក្នុង​ដែន​សមត្ថកិច្ច​ខ្លួន

  • 2019-06-26 06:54:41
  • ចំនួនមតិ 0 | ចំនួនចែករំលែក 0

ចន្លោះមិនឃើញ


លោក ឃួង ស្រេង អភិបាល​រាជធានី​ភ្នំពេញ បាន​ព្រមាន​ថា ក្នុងករណី​ដែល​សំណង់​គ្មាន​លិខិត​អនុញ្ញាត​សាងសង់ និង​សំណង់​ខុស​លិខិត​អនុញ្ញាត​សាងសង់​នៅតែកើតមាន ហើយ​បង្ក​ឱ្យមាន​គ្រោះថ្នាក់ និង​បង្ក​ព្យសនកម្ម​ដល់​អាយុជីវិត​របស់​ប្រជាពលរដ្ឋ​នៅក្នុង​ដែន​សមត្ថកិច្ច​របស់ខ្លួននោះ អភិបាល​ខណ្ឌ ត្រូវ​ទទួល​នូវ​វិន័យ​រដ្ឋបាល​ទៅតាម​ច្បាប់​ស្តីពី​សហលក្ខន្តិកៈ​មន្រ្តី​រាជការ​ស៊ីវិល និង​ត្រូវ​ទទួល​ខុសត្រូវ​ចំពោះ​មុខច្បាប់​ជាធរមាន។ នេះបើតាម​លិខិត​របស់​លោក ឃួង ស្រេង ផ្ញើទៅកាន់​អភិបាលខណ្ឌទាំង១៤ កាលពីថ្ងៃទី២៥ ខែមិថុនា ឆ្នាំ​២០១៩។

ក្នុង​លិខិត​នេះ​បានលើកឡើង​ថា រដ្ឋបាល​រាជធានី​ភ្នំពេញ នៅតែសង្កេតឃើញ​ថា សំណង់​ដែលគ្មាន​លិខិត​អនុញ្ញាត​សាងសង់ និង​សំណង់​ខុស​លិខិត​អនុញ្ញាត​សាងសង់​នៅតែកើតឡើង​ជាបន្តបន្ទាប់​នៅក្នុង​ភូមិសាស្រ្ត​រាជធានី​ភ្នំពេញ ទោះបីជារដ្ឋបាលរាជធានីភ្នំពេញ បាន​ធ្វើការ​ណែនាំជាប្រចាំ​ដល់​រដ្ឋបាលខណ្ឌ ឱ្យយក​ចិត្ត​ទុកដាក់​ទប់ស្កាត់​ក៏ដោយ។

លោក​ ឃួង ស្រេង បាន​បញ្ជាក់​ថា ដើម្បី​គ្រប់​គ្រង​ការ​សាងសង់​គ្រប់​ប្រភេទ​ឱ្យ​សប​តាម​ប្លង់​គោល​រាជធានី​ភ្នំពេញ បទដ្ឋាន​នគរូបនីយ​បញ្ញត្តិ និង​លក្ខណៈ​បច្ចេកទេស​សំណង់នោះ រដ្ឋបាល​រាជធានី​ភ្នំពេញ ស្នើ​លោកអភិបាលខណ្ឌ ត្រូវ​ខិតខំ​ទប់ស្កាត់​រាល់​សំណង់​ដែល​គ្មាន​លិខិត​អនុញ្ញាត​សាងសង់ និង​សំណង់​ខុស​លិខិត​អនុញ្ញាត​សាងសង់​ឱ្យខាន​តែបាន និង​ឱ្យមាន​ប្រសិទ្ធភាព ក្នុង​ន័យ​រឹតបន្តឹង​ការ​គោរព​លិខិត​បដ្ឋាន​គតិយុត្ត ក៏​ដូច​ធានា​បាន​នូវ​សុវត្ថិភាព និង​គុណភាព​ជូន​ប្រជាពលរដ្ឋ៕

អត្ថបទ៖ សំភី

អត្ថបទថ្មី
;