លោក ត្រាំ ចង់ដំឡើងពន្ធលើទំនិញវៀតណាម ក្រោយប្រទេសនេះកេងចំណេញពីសង្គ្រាមពាណិជ្ជកម្ម
- 2019-06-27 07:27:41
- ចំនួនមតិ 0 | ចំនួនចែករំលែក 0
លោក ត្រាំ ចង់ដំឡើងពន្ធលើទំនិញវៀតណាម ក្រោយប្រទេសនេះកេងចំណេញពីសង្គ្រាមពាណិជ្ជកម្ម
ចន្លោះមិនឃើញ
ប្រធានាធិបតីអាមេរិក លោក ដូណាល់ ត្រាំ បានបង្ហើបពីបំណងក្នុងការដំឡើងពន្ធលើទំនិញរបស់វៀតណាម បន្ទាប់ពីប្រទេសអាស៊ានមួយនេះ បានកេងចំណេញយ៉ាងក្រាស់ក្រែលពីសង្គ្រាមពាណិជ្ជកម្មរវាងអាមេរិក និងចិន។
ក្នុងកិច្ចសម្ភាសន៍ជាមួយ Fox Business កាលពីថ្ងៃទី២៦ ខែមិថុនា ឆ្នាំ២០១៩ លោក ដូណាល់ ត្រាំ បានលើកឡើងយ៉ាងដូច្នេះថា៖ «ក្រុមហ៊ុនជាច្រើន បានរើទៅវៀតណាម ប៉ុន្តែវៀតណាមបានកេងចំណេញមកលើយើង អាក្រក់ជាងចិនទៅទៀត។ ដូច្នេះ មានស្ថានភាពដ៏គួរឱ្យចាប់អារម្មណ៍មួយ កំពុងកើតមាននៅទីនោះ»។
កាលពីដើមខែមិថុនាកន្លងទៅនេះ ធនាគារវិនិយោគជប៉ុន Nomura បានចេញផ្សាយរបាយការណ៍វិភាគមួយដែលបង្ហាញថា វៀតណាម គឺជាអ្នកឈ្នះធំបំផុតក្នុសង្គ្រាមពាណិជ្ជកម្មរវាងចិន និងអាមេរិក គិតក្នុងត្រីមាសទី១ ឆ្នាំ២០១៩ ខណៈដែលមហាយក្សសេដ្ឋកិច្ចទាំង២នេះ បានដំឡើងពន្ធទំនិញនាំចូលដាក់គ្នាទៅវិញទៅមក។ សេដ្ឋកិច្ចវៀតណាម បានកើនឡើងស្ទើរជិត ៨% នៃ GDP ដោយសារការផ្លាស់ប្តូរផលិតកម្ម ពោលគឺការរើរោងចក្រពីចិន ទៅដាក់ផលិតនៅវៀតណាមវិញ ដើម្បីបញ្ចៀសនូវការជាប់ពន្ធ ក្នុងសង្គ្រាមពាណិជ្ជកម្មនេះ។
កំណើនសេដ្ឋកិច្ចរបស់វៀតណាម កើតឡើងដោយសារតែប្រទេសនេះ បានបង្កើនការនាំចូលទៅអាមេរិក នូវទំនិញដែលអាមេរិក បានដំឡើងពន្ធលើប្រទេសចិន។ ក្នុងនោះមានផលិតផលសំខាន់ៗដូចជា ឧបករណ៍អេឡិចត្រូនិចសម្រាប់ទូរសព្ទ គ្រឿងសង្ហារិម និងម៉ាស៊ីនដំណើរការទិន្នន័យស្វ័យប្រវត្តិជាដើម។ ក្រៅពីនោះមានដូចជា ក្តារបន្ទះ ខ្សែសូត្រ កប្បាស និងគ្រឿងប្រដាប់ប្រដាអគ្គិសនីផងដែរ៕