កីឡាករ​ភ្នំពេញក្រោនមួយរូប ស៊ុត​១១គ្រាប់ ក្នុង ២ប្រកួត សង្ឃឹមឈ្នះ​ស្បែកជើងមាស Hun Sen Cup 2019

  • 2019-07-12 02:44:18
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ពាន​រង្វាន់​សម្ដេចហ៊ុន សែន ឬ Hun Sen Cup 2019 បាន​រកឃើញ​ ៦ក្រុម​ ដែលត្រូវ​ឈាន​ទៅ​វគ្គ ៦ក្រុម​ចុងក្រោយ​ហើយ ពោល​គឺ​នៅ​សល់តែ ២ក្រុម​ទៀត ដែល​នឹង​រកឃើញ នា​ពាក់​កណ្ដាល​សប្ដាហ៍​ក្រោយ។

ក្រោយ​ប្រកួត ២ជើង​ នៅ​វគ្គ​ ១៦ក្រុម​ចុងក្រោយ គេ​សង្កេត​ឃើញ​កីឡាករ​មួយរូប​របស់​ភ្នំពេញក្រោន គឺ វ៉ា សុខថន កំពុង​មាន​សង្ឃឹម​ខ្ពស់ជាង​គេ ថា​នឹងអាច​ឈ្នះ​ពាន​ស្បែកជើង​មាស (ស៊ុត​បញ្ចូលទី​ច្រើនជាងគេ) ក្រោយ​រក​បានដល់ទៅ ១១គ្រាប់ ក្នុងការប្រកួត​២ជើង ទល់​នឹង​ក្រុម​ខេត្ត​កំពង់ចាម។

វ៉ា សុខថន ញាក់ដាច់​អ្នកចាំទី មុនស៊ុត​បញ្ចូលទីក្រុមកំពង់ចាម ក្នុងជើងទី២ វគ្គ១៦ក្រុមចុងក្រោយ (រូបភាព៖ ភ្នំពេញក្រោន)
កាលពីជើងទី១ កីឡាករ​សញ្ជាតិ​ខ្មែរ​-បារាំង​រូបនេះ រកបាន ៥គ្រាប់​ម្នាក់ឯង ជួយ​ឲ្យ​ភ្នំពេញក្រោន បំបាក់​កំពង់ចាម ១០-០។ ចំណែក​ក្នុង​ជើង​ទី២ កាលពី​ថ្ងៃព្រហស្បតិ៍​ម្សិលមិញនេះ វ៉ា សុខថន បាន​ស៊ុត ៦គ្រាប់​ទៀត ក្នុងជ័យជម្នះ ១៤-០។ សរុប​លទ្ធផល​ទាំង២ ជើង ភ្នំពេញក្រោន ឈ្នះ កំពង់ចាម ២៤-០។

កីឡាករ​ដែល​ស៊ុត​ចូល​ច្រើនបំផុត​លំដាប់ទី២ គឺ ចាន់ វឌ្ឍនាកា របស់បឹងកេត ដែលរកបាន ៤គ្រាប់ ក្នុង​ការប្រកួត ២ជើង​ទល់នឹងក្រុម​ខេត្ត​សៀមរាប ចំណែក​ម៉ៅ ពិសិដ្ឋ របស់ភ្នំពេញក្រោន រកបាន ៣គ្រាប់។

វ៉ា សុខថន អបអរក្រោយស៊ុត​បញ្ចូលទី​កាលពីជើងទី១ (រូបភាព៖ ភ្នំពេញក្រោន)

គួររំលឹកផងដែរថា កាលពីឆ្នាំមុន ម្ចាស់​ស្បែកជើងមាស Hun Sen Cup គឺបានទៅកីឡាករ​នួន បូរី របស់​ក្លឹប​នគរបាលជាតិ ដែលរកបាន ៧គ្រាប់៕

អត្ថបទ៖ ឈិន មិថុនា

អត្ថបទថ្មី
;