អ្នកនាំពាក្យរាជរដ្ឋាភិបាល៖ អាមេរិកប្រហែលច្រឡំថា កម្ពុជាក្រោមអាណានិគមរបស់ខ្លួនហើយមើលទៅ

2019-07-31 01:24:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកនាំពាក្យរាជរដ្ឋាភិបាលកម្ពុជា បានឆ្លើយតបទៅនឹងការលើកឡើងរបស់សហរដ្ឋអាមេរិកថា កម្ពុជាមិនស្ថិតក្រោមអាណានិគមរបស់សហរដ្ឋអាមេរិកនោះទេ។ កម្ពុជាមិនស្វាគមន៍អ្នកដែលមិនសប្បាយចិត្ត និងការរស់រានមានជីវិតដោយសន្តិភាព ស្ថិរភាព ដែលមាននៅក្នុងកម្ពុជា បើថាគេមិនសប្បាយចិត្ត ឲ្យគេដើរចេញទៅ។

ការថ្លែងនេះ បានធ្វើឡើងបន្ទាប់ពីស្ថានទូតសហរដ្ឋអាមេរិកបានបង្ហោះសារមួយពាក់ព័ន្ធនឹងការបោះឆ្នោតជាតិនៅកម្ពុជាថា មិនមានភាពសេរី និងយុត្តិធម៌ទេ ហើយក៏មិនបានតំណាងឲ្យឆន្ទៈរបស់ប្រជាពលរដ្ឋកម្ពុជាទេ។

លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានថ្លែងប្រាប់ [ខ្លីៗ] កាលពីថ្ងៃទី៣០ ខែកក្កដា ឆ្នាំ២០១៩ យ៉ាងដូច្នេះថា «នៅក្នុងច្បាប់របស់កម្ពុជា មិនតម្រូវឲ្យបរទេសណាមកវាយតម្លៃ ឬក៏ទទួល ឬមិនទទួលស្គាល់នោះទេ ប្រហែលជាអាមេរិកយល់ច្រឡំថាកម្ពុជា នៅក្រោមអាណានិគមរបស់គេហើយមើលទៅ»។

លោកបញ្ជាក់ថា ការបោះឆ្នោតនៅកម្ពុជា ប្រព្រឹត្តទៅក្រោមការចាត់ចែងរបស់គណៈកម្មាធិការជាតិរៀបចំការបោះឆ្នោត ហើយចំពោះវិវាទ លទ្ធផលការបោះឆ្នោត គឺមានគណៈកម្មការជាតិរៀបចំការបោះឆ្នោត ក្រុមប្រឹក្សាធម្មនុញ្ញ ជាអ្នកវាយតម្លៃ និងផ្ដល់សុពលភាព នូវបេក្ខជនដែលទទួលបានអាសនៈនៅក្នុងរដ្ឋសភា ហើយរដ្ឋសភាបន្តនីតិវិធីក្នុងការជ្រើសរើសយកនាយករដ្ឋមន្ត្រី។ «ហើយបើសិនជាគេលើកឡើងគេមិនទទួលស្គាល់ ដូចជាមិនតម្រូវការឱ្យគេទទួលស្គាល់នោះទេ បើគេមិនសប្បាយចិត្ត ឲ្យគេចេញពីស្រុកខ្មែរទៅ។ អ្វីដែលខ្ញុំថា មន្ត្រីណាឬក៏អ្នកណា ដែលមិនសប្បាយចិត្តនិងស្រុកខ្មែរ ចាកចេញពីស្រុកខ្មែរទៅ គឺជាពាក្យរបស់លោកប្រធានាធិបតី ដូណាល់ ត្រាំ និយាយទាំងអស់»។

សូមជម្រាបថា ស្ថានទូតសហរដ្ឋអាមេរិកប្រចាំកម្ពុជាបានសរសេរសារថា៖ «ថ្ងៃនេះ រដ្ឋាភិបាលសហរដ្ឋអាមេរិក កត់សម្គាល់ខួបមួយឆ្នាំនៃការបោះឆ្នោតជាតិ ដែលមានកំហុសឆ្គងយ៉ាងខ្លាំង នៅកម្ពុជា។ ការបោះឆ្នោតនោះ មិនមានភាពសេរី និងយុត្តិធម៌ទេ ហើយក៏មិនបានតំណាងឲ្យឆន្ទៈរបស់ប្រជាពលរដ្ឋកម្ពុជាទេ។ ការបោះឆ្នោតនេះ បានផាត់ចោលគណបក្សប្រឆាំងធំជាងគេនៅកម្ពុជា ហើយវារឹតតែធ្វើឲ្យបាត់បង់ថែមទៀតនូវសមិទ្ធិផលរបស់ប្រទេសកម្ពុជាក្នុងការជំរុញការផ្សះផ្សានយោបាយ និងលើកកម្ពស់កំណើនសេដ្ឋកិច្ច ចាប់តាំងពីមានកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១មក»។

ទូតអាមេរិកបន្តថា៖ «យើងសូមអំពាវនាវឲ្យរដ្ឋាភិបាលកម្ពុជាចាត់វិធានការជាក់ស្តែងនានា ក្នុងការស្តារលទ្ធិប្រជាធិបតេយ្យ រួមទាំងធ្វើការទម្លាក់បទចោទប្រកាន់ទាំងឡាយ ប្រឆាំងលោក កឹម សុខា និងអ្នកទោសនយោបាយដទៃទៀត ហើយបញ្ចប់ការអនុវត្តនូវការចោទប្រកាន់ដោយគ្មានមូលដ្ឋាន និងក្រោមហេតុផលនយោបាយ ដើម្បីយាយីពលរដ្ឋរបស់ខ្លួន។ ប្រជាពលរដ្ឋ ទាំងអស់នៅកម្ពុជា គួរតែអាចប្រើសិទ្ធិរបស់គេក្នុងការសម្តែងមតិ ដោយសេរី និងអាចធ្វើការប្រមូលផ្តុំគ្នាដោយសន្តិវិធី ហើយឲ្យពលរដ្ឋចូលរួមនៅក្នុងដំណើរការកិច្ចការសាធារណៈ»៕

អត្ថបទ៖ សោភា