ក្រុមហ៊ុនសំណង់ នៅខេត្តព្រះសីហនុ មិនអនុវត្តតាមកាតព្វកិច្ច នឹងត្រូវផ្អាក

2019-08-27 02:38:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក គួច ចំរើន អភិបាលខេត្តព្រះសីហនុ និង លោក ឡៅ ទិព្វសីហា រដ្ឋលេខាធិការក្រសួងដែនដីនគរូបនីយកម្ម និងសំណង់ ជាប្រធានគណៈកម្មការត្រួតពិនិត្យគុណភាពសំណង់ខេត្តព្រះសីហនុ បានបើកកិច្ចប្រជុំផ្សព្វផ្សាយ ស្តីពីវិធានការចំពោះក្រុមហ៊ុនប្រកបអាជីវកម្មសំណង់ ដែលមិនអនុវត្តតាមកាតព្វកិច្ច និងលក្ខខណ្ឌតម្រូវដោយបទដ្ឋានបច្ចេកទេស ដោយមានការចូលរួមពីអ្នកម៉ៅការសំណង់ អ្នកលក់សម្ភារៈសំណង់ និងក្រុមហ៊ុនក្រឡុកបេតុងក្នុងខេត្តព្រះសីហនុ កាលពីថ្ងៃទី២៦ ខែសីហា ឆ្នាំ២០១៩។

លោក គួច ចំរើន អភិបាលខេត្តព្រះសីហនុ មានប្រសាសន៍ថា ចំពោះក្រុមហ៊ុនប្រកបអាជីវកម្ម សំណង់ដែលមិនអនុវត្តតាមកាតព្វកិច្ច និងលក្ខខណ្ឌតម្រូវ ដោយបទដ្ឋានបច្ចេកទេសសំណង់នៅតាមការដ្ឋាននានាក្នុងខេត្តព្រះសីហនុ ការដ្ឋានត្រូវមានច្បាប់អនុញ្ញាតសាងសង់ និងក្រុមហ៊ុនសាងសង់ត្រូវចុះបញ្ជីនៅក្រសួងដែនដីនគរូបនីយកម្ម និងសំណង់ ។

លោកបានបន្តថា កន្លងមកក្រុមការងារបច្ចេកទេសរបស់ក្រសួងដែនដី បានរកឃើញបញ្ហាប្រឈមមួយចំនួន ក្នុងការត្រួតពិនិត្យសំណង់ជាង ៥០០កន្លែងនៅខេត្តព្រះសីហនុ ជាក់ស្តែងបានរកឃើញការដ្ឋាន ១៤ គ្មានគុណភាព ត្រូវរុះរើសំណង់ចេញ និង ៧០ការដ្ឋានផ្សេងទៀតត្រូវធ្វើកោសលវិច្ច័យពីក្រុមហ៊ុនឯកជន ដើម្បីបញ្ជាក់ពីគុណភាពសំណង់ ដើម្បីបញ្ចៀសកុំឱ្យមានការខុសឆ្គងបន្តទៀត ។

ក្នុងកិច្ចប្រជុំនេះដែរ តម្រូវឱ្យក្រុមហ៊ុន ម៉ៅការត្រូវអនុវត្តតាម៖

អ្នកម៉ៅការ ត្រូវចុះបញ្ជីនៅក្រសួងដែនដី
អ្នកម៉ៅការសាងសង់ សុំច្បាប់អនុញ្ញាតតាម លក្ខណបច្ចេកទេស
អគារសំណង់ធំៗ ត្រូវមានអាងប្រព្រឹត្តិកម្មត្រឹម ត្រូវ នៅតាមការដ្ឋានរបស់ខ្លួន

លោក អភិបាលខេត្ត ក៏បានបញ្ជាក់បន្ថែមថារាល់ម្ចាស់ការដ្ឋានណាដែលមិនបានសហការតាមការអញ្ជើញរបស់រដ្ឋបាលខេត្តក្នុងការចូលរួមកិច្ចប្រជុំ ផ្សព្វផ្សាយ អំពីវិធានការចំពោះក្រុមហ៊ុនប្រកបអាជីវកម្មសំណង់ដែលមិនអនុវត្តតាមកាតព្វកិច្ច និងលក្ខខណ្ឌតម្រូវ ដោយបទដ្ឋានបច្ចេកទេសសំណង់ នឹងចុះផ្អាកការដ្ឋានទាំងនោះ ជាបណ្តោះអាសន្ន៕

ចុចអាន៖

រូបភាព៖ រដ្ឋបាលខេត្តព្រះសីហនុ

អត្ថបទ៖ ម៉េងងី