ប្រទេសមួយទៀត សម្រេចបោះបង់តៃវ៉ាន់ដោយគ្មានស្រណោះ ទៅឱបចិនហើយ
- 2019-09-17 02:46:34
- ចំនួនមតិ 0 | ចំនួនចែករំលែក 0
ប្រទេសមួយទៀត សម្រេចបោះបង់តៃវ៉ាន់ដោយគ្មានស្រណោះ ទៅឱបចិនហើយ
ចន្លោះមិនឃើញ
រដ្ឋាភិបាលកោះសូឡូម៉ង់ (Solomon Island) កាលពីថ្ងៃទី១៦ ខែកញ្ញា ឆ្នាំ២០១៩ បានធ្វើការបោះឆ្នោតដើម្បីផ្តាច់ទំនាក់ទំនងការទូតជាមួយតៃវ៉ាន់រយៈពេល៣៦ឆ្នាំមកនេះ ហើយទៅចងសម្ព័ន្ធមិត្តជាមួយប្រទេសចិនវិញ។ ការបោះឆ្នោតនេះ ទទួលបានសំឡេងគាំទ្រដ៏ច្រើនលើសលប់ ២៧សំឡេង និងអនុបវាទ ៦សំឡេង។
ការផ្តាច់ទំនាក់ទំនងនេះ ធ្វើឱ្យតៃវ៉ាន់ នៅសល់សម្ព័ន្ធមិត្តចំនួន១៦តែប៉ុណ្ណោះ។ បើគិតចាប់តាំងពីការឡើងកាន់អំណាចរបស់ប្រធានាធិបតីតៃវ៉ាន់ លោកស្រី Tsai Ing-wen ក្នុងឆ្នាំ២០១៦មក ប្រទេសចំនួន៦ហើយ ដែលបានផ្តាច់ការទូតជាមួយតៃវ៉ាន់ ទៅចងមិត្តជាមួយចិន។
លោកស្រី Tsai បានបង្ហាញការសោកស្តាយ និងថ្កោលទោសចំពោះការសម្រេចចិត្តរបស់រដ្ឋាភិបាលសូឡូម៉ង់ ដែលបង្កើតទំនាក់ទំនងការទូតជាមួយចិន។ លោកស្រីបញ្ជាក់ថា តៃវ៉ាន់នឹងបិទស្ថានទូតខ្លួននៅថ្ងៃទី១៧ ខែកញ្ញា ឆ្នាំ២០១៩នេះតែម្តង ហើយហៅអ្នកជំនាញបច្ចេកទេស និងវេជ្ជសាស្រ្តរបស់ខ្លួនមកវិញ។
ជាមួយគ្នានេះ ប្រធានាធិបតីតៃវ៉ាន់ បានចោទចិនថាបានប្រើ «ដុល្លារការទូត» ក្នុងតំបន់ ដើម្បីដាក់សម្ពាធមកលើតៃវ៉ាន់។
បើតាមការចុះផ្សាយរបស់សារព័ត៌មានតៃវ៉ាន់ Taiwan News បានអះអាងថា កោះសូឡូម៉ង់ដែលមានប្រជាជន ៦០ម៉ឺននាក់ បានប្តូរទំនាក់ទំនងការទូតពីតៃវ៉ាន់ ទៅចិន គឺដោយសារតែជំនួយ ៥០០លានដុល្លាររបស់ចិន។
ក្រសួងការបរទេសចិន បានចេញសេចក្តីថ្លែងការណ៍បញ្ជាក់ថា ចិនត្រៀមខ្លួនរួចជាស្រេចក្នុងការធ្វើការជាមួយរដ្ឋាភិបាលកោះសូឡូម៉ង់ ដើម្បីបើកនូវទំព័រថ្មីនៃទំនាក់ទំនងប្រទេសទាំងពីរ។
នាយករដ្ឋមន្រ្តីសូឡូម៉ង់ លោក Manasseh Sogavare ធ្លាប់បានលើកឡើងថា ចិនគឺជាប្រទេសដែលផ្តល់នូវជំនួយហេដ្ឋារចនាសម្ព័ន្ធសំខាន់ៗ ក្នុងការអភិវឌ្ឍប្រទេសរបស់លោក៕