ក្រុមហ៊ុនចិន ជួលកោះមួយបានសម្រេច ពីប្រទេសដែលទើបតែបែកគ្នាជាមួយតៃវ៉ាន់
- 2019-10-18 06:04:37
- ចំនួនមតិ 0 | ចំនួនចែករំលែក 0
ក្រុមហ៊ុនចិន ជួលកោះមួយបានសម្រេច ពីប្រទេសដែលទើបតែបែកគ្នាជាមួយតៃវ៉ាន់
ចន្លោះមិនឃើញ
ក្រុមហ៊ុនចិន Sam Group បានចុះកិច្ចព្រមព្រៀងជួលកោះ Tulagi ពីប្រទេស Solomon ក្រោយប្រទេសនេះផ្តាច់ចំណងជាមួយតៃវ៉ាន់ ហើយមកចងមិត្តជាមួយចិន។ នេះបើយោងតាមឯកសារដែល South China Morning Post ទទួលបានកាលពីថ្ងៃទី១៧ ខែតុលា ឆ្នាំ២០១៩។
ក្នុងឯកសារដែលបែកធ្លាយនោះ បានលាតត្រដាងថា ក្រុមហ៊ុនចិនខាងលើ បានចុះកិច្ចព្រមព្រៀងសហប្រតិបត្តិការយុទ្ធសាស្រ្តជាមួយរដ្ឋអំណាចខេត្តកណ្តាល (Central Province) របស់ Solomon ស្តីពីការជួលកោះដែលមានកំពង់ផែទឹកជ្រៅនេះ កាលពីថ្ងៃទី២២ ខែកញ្ញាកន្លងទៅ។
Tulagi ជាកោះមួយដែលមានទំហំ ២គីឡូម៉ែត្រក្រឡា ជាមួយនឹងចំនួន ១២០០នាក់។ កោះនេះធ្លាប់ជាមួយមូលដ្ឋានទ័ពជើងទឹកជប៉ុន ហើយក៏ជាសមរភូមិក្តៅមួយផងដែរ ក្នុងអំឡុងសង្គ្រាមលោកលើកទី២។
ក្រុមហ៊ុន Sam Group អះអាងថា នឹងអភិវឌ្ឍរោងចក្រចម្រាញ់ប្រេងកាតមួយនៅលើកោះនេះ ព្រមទាំងជំរុញលើវិស័យពាណិជ្ជកម្ម ហេដ្ឋារចនាសម្ព័ន្ធ នេសាទ និងទេសចរណ៍ផងដែរ។ ប៉ុន្តែគេលើកឡើងថា វាមានសក្តានុពលសម្រាប់ធ្វើជាមូលដ្ឋានយោធារបស់ចិន។
តាមកិច្ចព្រមព្រៀង បានបង្ហាញឱ្យដឹងថា ខេត្តកណ្តាលរបស់ Solomon នឹងជួលកោះទាំងមូល និងកោះដែលនៅជុំវិញ ទៅក្រុមហ៊ុនចិន Sam Group សម្រាប់ការអភិវឌ្ឍតំបន់សេដ្ឋកិច្ចពិសេស សម្រាប់ឧស្សាហកម្មនានាដែលសក្តិសមក្នុងការអភិវឌ្ឍ ដោយរួមមានទាំងការអភិវឌ្ឍប្រេង និងឧស្ម័ន។
សូមរំលឹកថា កាលពីថ្ងៃទី១៦ ខែកញ្ញា ឆ្នាំ២០១៩ រដ្ឋាភិបាលកោះសូឡូម៉ង់ (Solomon Island) បានធ្វើការបោះឆ្នោតដើម្បីផ្តាច់ទំនាក់ទំនងការទូតជាមួយតៃវ៉ាន់រយៈពេល៣៦ឆ្នាំមកនេះ ហើយទៅចងសម្ព័ន្ធមិត្តជាមួយប្រទេសចិនវិញ។ ការបោះឆ្នោតនេះ ទទួលបានសំឡេងគាំទ្រដ៏ច្រើនលើសលប់ ២៧សំឡេង និងអនុបវាទ ៦សំឡេង។
នាយករដ្ឋមន្រ្តីសូឡូម៉ង់ លោក Manasseh Sogavare ធ្លាប់បានលើកឡើងថា ចិនគឺជាប្រទេសដែលផ្តល់នូវជំនួយហេដ្ឋារចនាសម្ព័ន្ធសំខាន់ៗ ក្នុងការអភិវឌ្ឍប្រទេសរបស់លោក៕