អ្នកស្រាវជ្រាវ​បុរាណ​វិទ្យា​ បានធ្វើកំណាយ រកឃើញផូស៊ីលដើមឈើ បាន​ប្រវែង១៤ម៉ែត្រ​រួច​ហើយ​នៅ​លើ​ទីតាំងគម្រោងស្រាវជ្រាវ​ក្នុងដែនជម្រកសត្វព្រៃលំផាត់​ ក្នុងស្រុកលំផាត់​ ខេត្ត​រតនគីរី​កាល​ពី​ថ្ងៃទី៣០ ខែតុលា ឆ្នាំ២០១៩។

លោក លឹម វណ្ណច័ន្ទ ប្រធានការិយាល័យបេតិកភណ្ឌវប្បធម៌ នាយកដ្ឋានបេតិកភណ្ឌធម្មជាតិ អគ្គ​នាយកដ្ឋាន​សហគមន៍​មូលដ្ឋាន ក្រសួងបរិស្ថាន បានឱ្យដឹងថាក្រុមការងារជំនាញក្រសួងបរិស្ថាន អ្នក​បច្ចេកទេសមកពីរាជបណ្ឌិតសភាកម្ពុជា ក្រសួងវប្បធម៌ និងវិចិត្រសិល្បះ អ្នកស្រាវជ្រាវអំពីសត្វ អ្នក​ធរណីវិទ្យា និងក្រុមការងារស្ម័គ្រចិត្ត នឹងបន្ត​ធ្វើកំណាយសិក្សាស្រាវជ្រាវលើផូស៊ីលដើមឈើ រយ:ពេល​ ១សប្តាហ៍​កន្លងមកហើយ។​ នៅពេល​នេះ​ ក្រុម​ការងារ​បន្ត​កំណាយ​ លើទីតាំង​បន្ថែម​ទៀត​ព្រោះ​អ្នកស្រាវជ្រាវ​ បាន​រក​ឃើញ​សំណាក​មាន​មែក​ឈើ និងសង្ស័យមានដើម​ឈើ​ថ្មនេះ​ហាក់ជាដួលសង្កត់​លើ​ដើមឈើ។

ប្រធានការិយាល័យ បានបន្តថា នេះជាគម្រោងស្រាវជ្រាវជាប្រវត្តិសាស្រ្តលើកទី០១ លើ​ផូស៊ីល​ឈើ​នៅ​ព្រះ​រាជាណា​ចក្រ​កម្ពុជា ដោយអ្នកជំនាញពាក់ព័ន្ធបុរាណវិទ្យា ហើយគម្រោងនេះ បាន​ទទួល​ការ​គាំទ្រ​ផ្តួចផ្តើមដោយ​ ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន និង​មាន​សហការ​ពី​អា​ជ្ញាធរ​ដែនដីគ្រប់លំដាប់ថ្នាក់នៃខេត្តរតនគីរី មន្ទីរបរិស្ថានខេត្ត មន្រ្តីឧទ្យានុរក្ស កង​កំលាំង​ប្រដាប់​អាវុធ និង​ប្រជាសហគមន៍តំបន់ការពារធម្មជាតិវាលកំបោរ។ លោក បានបញ្ជាក់ដែរថា គោល​បំណង​នៃ​ការធ្វើកំណាយសិក្សា​ស្រាវជ្រាវនេះ នឹង​ប្រមូល​ទិន្នន័យ និង​សំណាក​សម្រាប់​ចង​ក្រង​ជា​ឯក​សារវប្បធម៌ប្រវត្តិសាស្រ្តមួយនៅកម្ពុជា។

លោក​ សៀង​ សុថា​ អតីតប្រធាននាយកដ្ឋានភូគព្ភសាស្រ្តក្រសួង​រ៉ែ​ និង​ថាមពល​ បាន​ចូល​រួម​ដោយ​ស្ម័គ្រ​ចិត្ត​ជាមួយ​ក្រុម​ការងារ​ដោយ​យល់​ថា​ជា​គម្រោង​មាន​សារ:​សំខាន់​សម្រាប់​ការ​ស្រាវជ្រាវ​រក​ឃើញ​ផូស៊ីលឈើ​ថ្ម​ ដែលអាចកើតឡើង​មានអាយុរាប់លានឆ្នាំ​។ លោក​ជំនាញ​ផ្នែក​ដី​នេះ​រូប​នេះ​បានបញ្ជាក់​ ការ​រកឃើញ​ថ្មី​នេះ​ជា​ប្រយោជន៍​សំខាន់​នៃ​ការសិក្សា​ស្រាវ​ជ្រាវ​របស់ជំនាន់ក្រោយ​ និង​បង្ហាញពីការ​វិវត្តន៍​ថ្មី​នៃការស្រាវជ្រាវរបស់កម្ពុជាលើកំណាយសិក្សាលើផូស៊ីលឈើ។

លោក​ ផុន​ ខេមរិន្ទ​ ប្រធាន​មន្ទីរបរិស្ថានខេត្តរតនគីរី​ បានបង្ហាញសេចក្តីសង្ឃឹមថា តំបន់នេះ នឹង​អាច​ប្រែក្លាយ​ជាតំបន់ទេសចរណ៍ធម្មជាតិ ជាទីតាំងទាក់ទាញការសិក្សាស្រាវជ្រាវបន្ថែមដល់សិស្ស និស្សិត ដែល​អាចជាប្រយោជន៍នៃលើកកម្ពស់ការថែរក្សាធនធានធម្មជាតិ និង​បង្កើន​ជីវភាព​ប្រជាពលរដ្ឋ​នៅក្នុងសហគមន៍។

សូមបញ្ជាក់ថា ក្រុមការងារស្រាវជ្រាវលើផូស៊ីលដើមឈើ បានចាប់ផ្តើមគម្រោងរបស់ខ្លួន ពីថ្ងៃ២២ ខែតុលា ហើយបន្តដល់ថ្ងៃ១០ ខែវិច្ឆិកា ឆ្នាំ២០១៩។ ក្រុមការងារ កំពុង​បន្ត​ពិនិត្យ​ទីតាំង​ផូស៊ីល​ឈើ​ចំនួន ១៨កន្លែង​ផ្សេង​ទៀតក្បែរនោះ​សង្ស័យមាននៅក្នុងដែនជម្រកសត្វព្រៃលំផាត់។