ជាលើក​ដំបូង​ហើយ​នៅ​ក្នុងប្រវត្តិសាស្រ្តនៃការ​រុករក​អវកាស អង្គការ NASA បាន​ប្រកាស​ថា បាន​រកឃើញ​ឧស្ម័ន​អុកស៊ីហ្សែន​នៅ​បរិយាកាស​ភពអង្គារ។ ការ​កត់សម្គាល់​នេះ គឺ​តាមរយៈ​ទិន្នន័យ​ដែល​បញ្ជូន​មកពី​យាន Curiosity rover ដែល​វា​បាន​ស្រូប​យកខ្យល់​អាកាស​នៅតំបន់ Gale Crater លើ​ភព​ក្រហម​នោះ។

ឧបករណ៍វិភាគ​គំរូ​​ក្នុងយាន rover បាន​បង្ហាញ​លទ្ធផល​ពីការ​វិភាគបរិយាកាសភព​អង្គារ រួមមាន​ដូចជា៖ ឧស្ម័នកាបូនិច (CO2) មាន​ ៩៥%, នីត្រូហ្សែន (N2) មាន ២,៦%, Argon (Ar) មាន ១,៩%, អុកស៊ីហ្សែន (O2) មាន ០,១៦% និង​ កាបូនម៉ូណូអុកស៊ីត (CO) មាន ០,០៦%។ ប៉ុន្តែ​ឧស្ម័ន​អុកស៊ីហ្សែន ត្រូវបាន​ប្រែប្រួល​តាមរដូវកាល​នៃភព​អង្គារ។

រណ្តៅ Gale Crater មាន​ទំហំ ១៥៤គីឡូម៉ែត្រ ដែល​បង្កើតឡើង​ដោយ​ការធ្លាក់អាចម៌ផ្កាយមួយ កាលពីជិត ៤ពាន់​លានឆ្នាំមុន។ យាន rover បាន​រុករករណ្តៅនេះ តាំងពីឆ្នាំ២០១២មក។ ថ្មីៗនេះ អ្នកវិទ្យាសាស្រ្ត​បានរកឃើញ​ថា រណ្តៅនេះ​ធ្លាប់មានទឹក ដែលមាន​ផ្ទុក​អំបិល និង​ជាតិរ៉ែ សម្រាប់​ទ្រទ្រង់​ដល់​ជីវិត​រស់នៅ​ផងដែរ។

លោកស្រី Melissa Trainer អ្នកវិទ្យាសាស្រ្ត​នៅមជ្ឈមណ្ឌល​អវកាស​ Goddard របស់​អង្គការ NASA និង​ជាអ្នកដឹកនាំ​ការ​ស្រាវជ្រាវ​នេះ បាន​និយាយ​ថា «យើង​កំពុង​តស៊ូ​ពន្យល់​ពីការរកឃើញនេះ។ ការពិត​ដែល​ថា ​អុកស៊ីហ្សែន មិនមែនចេះ​តែកើតមានឡើងវិញ គ្រប់​រដូវកាលនោះទេ ដែល​ធ្វើឱ្យយើង​គិតថា វាមិន​មែន​ជាបញ្ហាមួយ​ដែល​ត្រូវ​ធ្វើ​ជាមួយ​ឌីណាមិច​បរិយាកាស​នោះទេ»៕

ចុចអាន៖ អ្នកវិទ្យាសាស្រ្ត​ជប៉ុន រក​ឃើញ​ភស្តុតាង​ដ៏សំខាន់​ដែលបញ្ជាក់​ថា លើភព​អង្គារ​ធ្លាប់​មាន​ជីវិតរស់នៅ