កីឡាការិនីកូនខ្មែរនៅអាមេរិក ឯម សុវណ្ណារី ត្រៀមខ្លួនបានយ៉ាងល្អ ដើម្បីជួបកីឡាការិនីមិនដែលចាញ់មកពីប្រេស៊ីល នៅក្នុងកម្មវិធី ONE: MARK OF GREATNESS នៅថ្ងៃទី៦ ខែធ្នូ នៅក្រុងកូឡាឡាំពួរ ប្រទេសម៉ាឡេស៊ី។ កីឡាការិនីប្រេស៊ីល RAYANE MARQUES មានមានកំណត់ត្រាប្រកួតលើសង្វៀនចម្រុះចំនួន ៤ លើក មិនដែលចាញ់ទាល់តែសោះ (ឈ្នះ៣លើក និង ស្មើ១លើក)។ រឿងអស្ចារ្យទៀត គឺ RAYANE MARQUES ជាម្ចាស់ខ្សែក្រវាត់ BJJ State Champion ៥សម័យកាល។ យ៉ាងណាក្ដីនេះជាការបង្ហាញខ្លួនលើកដំបូងរបស់ RAYANE MARQUES ស្របពេលដែល សុវណ្ណារី នឹងបង្ហាញខ្លួនលើកទី២ តំណាងឲ្យកម្ពុជានៅសង្វៀន ONE។

ឯម សុវណ្ណារី បានថ្លែងថា៖ «វាយូរដែរហើយតាំងពីប្រកួតដំបូងនៅ ONE កាលថ្ងៃទី ៧ ខែ ធ្នូ ២០១៨។ បើគិតដល់ការប្រកួតទី ៦ ធ្នូ គឺ ១ ឆ្នាំល្មម។ តែខ្ញុំបានប្រើពេលវានេះដើម្បីសំលៀងការហ្វឹកហាត់ និង ត្រៀមសម្រាប់ការប្រកួតរបស់ខ្ញុំនៅដើមខែក្រោយ។ ខ្ញុំបានហ្វឹកហាត់ពេញម៉ោង ហើយខ្ញុំមានអារម្មណ៍ថាការប្រកួតរបស់ខ្ញុំនឹងប្លែកពីឆ្នាំមុន ហើយ ខ្ញុំក៏ជាកីឡាការិនីដ៏ប្លែកម្នាក់ដែរ»។

កីឡាការិនីវ័យ២៧ឆ្នាំ ទំនងមានឈ្មោះឡើងប្រកួតម្ដងនៅដើមខែតុលា ប៉ុន្តែបែរខកខានទៅវិញ។ បែបណាក្ដី សុវណ្ណារី បានហ្វឹកហាត់បច្ចេកទេសខ្លាំងក្លានៅក្លិប Modern Martial Arts and Fitness ស្ថិតនៅក្រុង Pasadena រដ្ឋកាលីហ្វ័រញ៉ា សហរដ្ឋអាមេរិក។ ការហ្វឹកហាត់យ៉ាងសស្រាក់សស្រាំនេះត្រូវបានដាក់ក្ដីរំពឹងថានឹងទទួលជ័យជម្នះលើកទី២ នៅសង្វៀនលំដាប់ពិភពលោក ONE។ កូនខ្មែរនៅអាមេរិកសម្បុរស្រអែម សង្កត់ធ្ងន់ថា៖ «លើកមុនមានឈ្មោះម្ដងក៏ខ្ញុំបានត្រៀមច្រើនដូចគ្នា។ ឥឡូវនេះត្រៀមរឹតតែច្រើនជាងមុនព្រោះពេលវាត្រូវពន្យារ។ ខ្ញុំផ្ដោតលើការផ្ដួលគូប្រកួត ១០០% ខ្ញុំមិនគិតអ្វីផ្សេងក្រៅពីចង់ឈ្នះនោះឡើយ»។

ទោះជាយ៉ាងណាក្ដី ជើងខ្លាំងដែលប្រកួតតំណាងឲ្យកម្ពុជារូបនេះ ជឿជាក់ថា វាជាការប្រកួតដ៏តានតឹងមួយពេលប៉ះកីឡាការិនីមិនដែលចាញ់ប្រេស៊ីល ព្រោះកីឡាការិនីរូបនេះជំនាញខាងចូលចាប់ និងចំបាប់ទៀតផង។ ការពិតវាជាការប្រកួតដ៏លំបាក ប៉ុន្តែ សុវណ្ណារី ឆ្លៀតឱកាសអរគុណដល់អ្នកគាំទ្រកម្ពុជា ហើយសង្ឃឹមថាបងប្អូននៅស្រុកខ្មែរនៅតែបន្តគាំទ្រដល់រូបគេនាពេលប្រកួតខាងមុខ។

សុវណ្ណារី ថ្លែងអំណរគុណបែបនេះ៖ «ខ្ញុំសូមអរគុណដល់បងប្អូនខ្មែរដែលស្រលាញ់ និង គាំទ្រខ្ញុំរហូតមក។ ខ្ញុំរំពឹងថានឹងនាំយកជ័យជម្នះជូនអ្នកគាំទ្រកម្ពុជា។ ខ្ញុំប្រកួតតំណាងឲ្យកម្ពុជា»។

កូនខ្មែរនៅអាមេរិករូបនេះ ឡើងប្រកួតលើសង្វៀនគុនចម្រុះតាំងពីឆ្នាំ ២០១៦ មក។ កីឡាការិនីរូបនេះធ្លាប់ហ្វឹកហាត់ប្រដាល់សកលតាំងឆ្នាំ ២០១២ និង ចាប់ផ្ដើមក្បាច់គុន ជឺជិតស៊ូ នៅឆ្នាំ ២០១៤ ក្នុងគោលដៅរៀនក្បាច់ចាប់ ឃ្លេ និង បោកជាដើមដើម្បីជាទុនសម្រាប់ប្រកួតគុនចម្រុះ។ លើសពីនេះកីឡាការិនីមកពីអាមេរិកក៏ធ្លាប់ហាត់ចំបាប់ យូដូ និង ប្រដាល់សេរី ទៀតផង។

សុវណ្ណារី មានកំណត់ត្រា ៣ លើកក្នុងការប្រកួតក្បាច់គុនចម្រុះហើយឈ្នះទាំង៣លើក គឺ​ឈ្នះកីឡាការិនីអាមេរិកពីររូប Lanikqua Robins នាទឹកទី១ កាលខែធ្នូឆ្នាំ ២០១៦ និង ឈ្នះ Evelyn Nieves នៅទឹកទី១ កាលខែ កុម្ភៈ ឆ្នាំ ២០១៧ ក្នុងការប្រកួតដាក់ទ្រុងនៅអាមេរិក។ បន្ទាប់មក សុវណ្ណារី ឈ្នះកីឡាការិនិអ៊ុយក្រែន Iryna Kyselova នៅសង្វៀន ONE Championship កាលថ្ងៃទី ៧ ខែ ធ្នូ ឆ្នាំ ២០១៨ នៅ ម៉ាឡេស៊ី ដែលជាការប្រកួតចុងក្រោយ៕