ច្បាប់អន្តោប្រវេសន៍ អាចនឹងត្រូវកែតម្រូវទាំងស្រុង

2020-01-14 02:40:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងមហាផ្ទៃបានបើកកិច្ចប្រជុំសេចក្តីព្រាងច្បាប់វិសោធនកម្មច្បាប់ស្តីពីអន្តោប្រវេសន៍នៃព្រះរាជាណាចក្រកម្ពុជា និងកែសម្រួលលិខិតបទដ្ឋាន គតិយុទ្ធពាក់ព័ន្ធនានា ក្រោមអធិបតីភាព លោក សុខ ផល ដោយមានការចូលរួមពីលោក ប៊ុន ហុន និងលោក ឡាំ ជា រដ្ឋលេខាធិការក្រសួងមហាផ្ទៃ តំណាងក្រសួង ស្ថាប័នពាក់ព័ន្ធ និងមន្រ្តីជំនាញផ្នែកច្បាប់ពាក់ព័ន្ធផងដែរ។ កិច្ចប្រជុំនេះធ្វើឡើង កាលពីថ្ងៃទី១៣ ខែមករា ឆ្នាំ២០២០។

លោក សុខ ផល បាននថ្លែងថា កិច្ចប្រជុំនេះ គឹដើម្បីពិភាក្សាពិនិត្យ កែសម្រួលធ្វើវិសោធនកម្មច្បាប់ចាស់ ហើយបើមានចំណុចចាំបាច់ដែលឯកភាពគ្នាត្រូវការកែសម្រួលនូវចំនុចច្រើននោះ ការធ្វើវិសោធនកម្មច្បាប់ថ្មីស្តីពីអន្តោប្រវេសន៍នៃព្រះរាជាណាចក្រកម្ពុជានេះ នឹងត្រូវកែតម្រូវទាំងស្រុងនៃច្បាប់ចាស់តែម្ដង ដើម្បីឲ្យសមស្របតាមស្ថានភាពបច្ចុប្បន្ននៃប្រទេសកម្ពុជា។ហើយក្រុមការងារធ្វើសេចក្តីព្រាង និងត្រូវចុះសិក្សាស្រាវជាមួយមន្ទីរ អង្គភាពនានា ព្រមទាំងសិក្សាលើការប្រើប្រាស់ច្បាប់ស្ដីពីអន្តោប្រវេសន៍នៅបណ្តាប្រទេសគំរូមួយចំនួនផងដែរ។

នៅក្នុងកិច្ចប្រជុំនេះផងដែរ លោក ប៊ុន ហុន បានលើកឡើងថា ច្បាប់ស្តីពីអន្តោប្រវេសន៍នៃព្រះរាជាណាចក្រកម្ពុជានេះ គឺមានច្បាប់ចាស់មួយរួចហើយ ក៏ប៉ុន្តែយើងត្រូវស្រាវជ្រាវរកគ្រប់បញ្ហាទាំងអស់ដើម្បីរកធាតុចូលឲ្យបានគ្រប់ជ្រុងជ្រោយបន្ថែមទៀត ដើម្បីធ្វើវិសោធនកម្មថ្មី។

លោកបានបន្តថា នៅលើពិភពលោក បញ្ហាអន្តោប្រវេសន៍នេះ គឺតែងតែមានការកើតឡើងនូវបញ្ហាច្រើន និងធ្ងន់ធ្ងរជាងគេ ដូច្នេះក្រុមការងារសិក្សាស្រាវជ្រាវត្រូវយកចិត្តទុកដាក់ និងប្រមូលបញ្ហាឲ្យបានគ្រប់គ្រាន់ដោយហ្មត់ចត់បំផុត ដើម្បីធានានូវការរៀបចំបទបញ្ញត្តិថ្មី ធ្វើយ៉ាងណាឲ្យស្របជាមួយបរិបទសង្គម ជាពិសេសការវិវឌ្ឍន៍នៃប្រទេសជាតិ។

សូមជម្រាបថា សេចក្តីព្រាងច្បាប់វិសោធនកម្មច្បាប់ស្តីពីអន្តោប្រវេសន៍ នៃព្រះរាជាណាចក្រកម្ពុជា គឺធ្វើឡើងជាលើកទី២ ដើម្បីពិភាក្សា ពិនិត្យ និងបន្ថែមបន្ថយធាតុចូលនានាក្នុងការរៀបចំតាក់តែងសេចក្ដីព្រាងវិសោធនកម្មច្បាប់ស្តីពីអន្តោប្រវេសន៍នៃព្រះរាជាណាចក្រកម្ពុជា ឲ្យបានសមស្រមតាមបរិបទរួមនៃការរីកចម្រើនរបស់ប្រទេស។ ជាងនេះទៀត ច្បាស់នេះ មានគោលបំណងធានាការគ្រប់គ្រងជនបរទេសគ្រប់រូប នៅក្នុងព្រះរាជាណាចក្រកម្ពុជា និងមានវិសាលភាពអនុវត្តចំពោះជនបរទេសគ្រប់រូបដែល ចូល ចេញ ឆ្លងកាត់ និងស្នាក់នៅក្នុងព្រះរាជាណាចក្រកម្ពុជា៕

អត្ថបទ៖ កុសល