iPhone 12 ប្រើអេក្រង់ OLED និង 5G មានតម្លៃចាប់ពី ៦៤៩ដុល្លារ

2020-05-01 02:23:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ព័ត៌មានអំពី iPhone ជំនាន់ថ្មីដែលបច្ចុប្បន្នគេឲ្យឈ្មោះថា iPhone 12 នៅបន្តលេចធ្លាយជាហូរហែ ក្នុងនោះរួមមានការឌីហ្សាញដែលផ្លាស់ប្ដូរថ្មី និងលក្ខណៈសម្បត្តិមួយចំនួនផងដែរ។ ពេលនេះគេបានដឹងដំណឹងអំពីតម្លៃសម្រាប់ទីផ្សារសហរដ្ឋអាមេរិក ជាអ្វីដែលមនុស្សភាគច្រើនចង់ដឹងបំផុត។

Jos Prosser ទទួលបានដំណឹងអំពីតម្លៃ iPhone 12 តាមរយៈប្រភពដែលបានផ្ដល់ដំណឹងអំពីការប្រកាសចេញ iPhone SE ថ្មីនៅថ្ងៃទី ១៥ ខែមេសា។

ចាប់ផ្ដើមជាមួយ iPhone ស៊េរីខ្ពស់មុនគឺ iPhone 12 Pro អេក្រង់ទំហំ ៦,១អ៊ីញ នឹងមានលក់តម្លៃចាប់ពី ៩៩៩ដុល្លារ ចំណែក iPhone 12 Pro Max អេក្រង់ទំហំ ៦,៧អ៊ីញ មានតម្លៃចាប់ពី ១០៩៩ដុល្លារ។ លក្ខណៈសម្បត្តិមួយចំនួនរបស់វាមានដូចជាតួខ្លួនធ្វើពីដែកអ៊ីណុក មានក្បាលឆកតូចជាងមុន មានប្រើអេក្រង់ OLED, ប្រើឈីប A14, គាំទ្រសេវា 5G, បំពាក់កាមេរ៉ាក្រោយ ៣គ្រាប់ និងមាន Sensor LiDAR មួយទៀត។

ចំណែកអ្នកស្នងតំណែង iPhone 11 វិញគឺមានពីរប្រភេទ មានប្រភេទអេក្រង់ទំហំ ៥,៤អ៊ីញ និងអេក្រង់ទំហំ ៦,១អ៊ីញ ដែលមានតម្លៃចាប់ពី ៦៤៩ដុល្លារ និង ៧៤៩ដុល្លារ។ លក្ខណៈសម្បត្តិលេចធ្លោរបស់វាមានដូចជា iPhone 12 Pro ខាងលើដែរ ខុសគ្នាត្រង់ថាប្រើតួខ្លួនប្រភេទអាលុយមីញ៉ូម និងមានកាមេរ៉ាក្រោយ ២ គ្រាប់ ហើយមិនមាន Sensor LiDAR នោះទេ។

Jon Prosser បានបញ្ជាក់ថាតម្លៃនេះអាចនឹងមានការផ្លាស់ប្ដូរមុនការដាក់លក់ជាផ្លូវការប៉ុន្តែប្រសិនបើតម្លៃនេះពិតមែន មានន័យថា Apple ប្រើយុទ្ធសាស្ត្រកំណត់តម្លៃបានល្អបំផុត។ នាឆ្នាំ ២០២០ នេះគេឃើញថាស្មាតហ្វូន Android លំដាប់ខ្ពស់ជាច្រើនបានដំឡើងថ្លៃខ្លួនរបស់ខ្លួន ដោយសារការបំពាក់នូវសេវា 5G ជាកត្តាចម្បង ប៉ុន្តែមើលទៅ Apple មិនមានការផ្លាស់ប្ដូរតម្លៃដោយសារ 5G នេះទេ។

ប្រភពបានប្រាប់ដល់ Jos Prosser បន្ថែមថា iPhone ជំនាន់ថ្មីអាចនឹងចេញលក់យឺតជាងសព្វដង ដោយសារតែការផ្ទុះនូវជំងឺកូវីដ១៩ រំពឹងថាចេញលក់នៅចន្លោះខែតុលា ទៅខែវិច្ឆិកា៕

ប្រភព៖ GSMarena ប្រែសម្រួល៖ សុខហេង