លក្ខណៈពិសេសរបស់វ៉ាក់សាំងកូវីដអង់គ្លេសមួយនេះ វាយលុកទីផ្សារយ៉ាងងាយស្រួលបំផុត

2020-11-26 09:00:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បើទោះបីជាវ៉ាក់សាំងប្រឆាំងកូវីដ១៩ របស់ក្រុមហ៊ុនអាមេរិក និងក្រុមហ៊ុនរុស្ស៊ី ត្រូវបានធ្វើតេស្តរកឃើញថាមានប្រសិទ្ធភាពខ្ពស់ដល់ ៩៥% ហើយវ៉ាក់សាំងរបស់ក្រុមហ៊ុនអង់គ្លេស មានប្រសិទ្ធភាពត្រឹម ៧០%ក៏ដោយ តែលក្ខណៈពិសេសដ៏ចម្បងបំផុតមួយរបស់វ៉ាក់សាំងអង់គ្លេស គឺការងាយស្រួលរក្សាទុក និងដឹកជញ្ជូន អាចជាមុខសញ្ញានៃការបញ្ជាទិញច្រើនពីប្រទេសនានាក្នុងពិភពលោក។

វ៉ាក់សាំងកូវីដ១៩ របស់ក្រុមហ៊ុនអាមេរិក Moderna និង Pfizer ដើម្បីធានាគុណភាពគឺចាំបាច់ត្រូវរក្សាទុកក្នុងកម្រិតសីតុណ្ហភាពត្រជាក់ខ្លាំងបំផុត ពី -២០ ទៅ -៨០អង្សារសេ ដែលមានការពិបាកខ្លាំងណាស់ ពោលគឺត្រូវការបច្ចេកទេសរក្សាទុកខ្ពស់យ៉ាងហ្មត់ចត់ជាទីបំផុត ហើយនឹងឧបសគ្គនៃការដឹកជញ្ជូន។

ចំណែកវ៉ាក់សាំង Sputnik V របស់រុស្ស៊ី ត្រូវតែរក្សាទុកក្នុងសីតុណ្ហភាព -៧០អង្សារសេ ដែលនេះ ជាឧបសគ្គដ៏ធំមួយ ជាពិសេសក្នុងប្រទេសរុស្ស៊ីនេះតែម្តង ព្រោះត្រូវដឹកជញ្ជូនសែនឆ្ងាយទៅកាន់តំបន់ដាច់ស្រយាល។

ផ្ទុយពីវ៉ាក់សាំងខាងលើ វ៉ាក់សាំងរបស់ក្រុមហ៊ុនអង់គ្លេស AstraZeneca ដែលសហការជាមួយសាកលវិទ្យាល័យ Oxford គឺអាចរក្សាទុកក្នុងកម្រិតសីតុណ្ហភាពពី ២ ទៅ ៨អង្សារសេ ពោលគឺដាក់តែក្នុងទូរទឹកកកធម្មតាក៏បានដែរ បង្កលក្ខណៈងាយស្រួលដល់ការដឹកជញ្ជូនបានលឿន ហើយចំណាយលើការទុកដាក់តិចទៀតផង។

លើសពីនេះទៅទៀត ការផលិតវ៉ាក់សាំងរបស់ក្រុមហ៊ុនអង់គ្លេសនេះ គឺមិនស្វែងរកប្រាក់ចំណេញក្រាស់ក្រែលក្នុងអំឡុងមានជំងឺរាតត្បាតនោះទេ ពោលគឺវានឹងមានតម្លៃថោក។ ក្រុមហ៊ុននេះ បានចុះកិច្ចព្រមព្រៀងជាមួយប្រទេសមួយចំនួន និងស្ថាប័នសុខភាពធំៗ ដោយលក់ឱ្យក្នុងតម្លៃត្រឹម ២,៥ដុល្លារប៉ុណ្ណោះក្នុងមួយដូស។ ចំណែកវ៉ាក់សាំងរបស់អាមេរិក មានតម្លៃចាប់ពី ២០ដុល្លារឡើងក្នុងមួយដូស ខណៈវ៉ាក់សាំងរុស្ស៊ី មានតម្លៃ ១៣ដុល្លារក្នុងមួយដូស៕

ប្រភព៖ Indian Express