សង្គ្រាមលោកលើកទី១! បារាំង និងអង់គ្លេសរួមគ្នាប្រើពេល៧ថ្ងៃ វាយទ័ពអាល្លឺម៉ង់ឱ្យដកថយ

2021-01-27 07:17:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បន្ទាប់ពីទ័ពអាល្លឺម៉ង់បានឈ្លានពានចូលបែលហ្សិកដោយជោគជ័យនៅក្នុងខែសីហា ឆ្នាំ១៩១៤ ទ័ពអាល្លឺម៉ង់ក៏បន្តដំណើរឆ្ពោះទៅឈ្លានពានបារាំង។ ប៉ុន្តែបារាំង បានទប់ស្កាត់ទាន់ពេលដោយសហការជាមួយអង់គ្លេស វាយទ័ពអាល្លឺម៉ង់ឱ្យដកថយវិញ ក្នុងសង្គ្រាមរយៈពេល៧ថ្ងៃ ដែលមានឈ្មោះថា «First Battle of the Marne» គិតចាប់ពីថ្ងៃទី៦ ដល់ ១២ ខែកញ្ញា ឆ្នាំ១៩១៤។

ទីកន្លែងនៃសមរភូមិនេះ គឺស្ថិតនៅចម្ងាយប្រហែល ៤៨គីឡូម៉ែត្រភាគឦសានក្រុងប៉ារីស នៅពេលដែលទ័ពអាល្លឺម៉ង់បានចេញពីបែលហ្សិកទៅដល់ទីនោះ។

មុខព្រួញវាយលុកចូលបារាំងរបស់ទ័ពអាល្លឺម៉ង់

ទ័ពបារាំង និងអង់គ្លេស បានប្រមូលផ្តុំគ្នាដើម្បីត្រៀមវាយបកទៅទ័ពអាល្លឺម៉ង់តាមបណ្តោយទន្លេ Marne ហើយបានផ្អាកសកម្មភាពរុលទៅមុខរបស់អាល្លឺម៉ង់ ដោយនៅថ្ងៃទី៥ ខែកញ្ញា ទ័ពបារាំង និងអង់គ្លេស បានចាប់ផ្តើមប្រតិបត្តិការ។

ដល់ថ្ងៃទី៩ ខែកញ្ញា ទ័ពសម្ព័ន្ធមិត្តទាំងពីរ បានជោគជ័យដោយធ្វើឱ្យកងទ័ពផ្នែកទីមួយ និងផ្នែកទីពីររបស់អាល្លឺម៉ង់ រងហានិភ័យនៃការឡោមព័ទ្ធ។ បន្ទាប់មកកងទ័ពអាល្លឺម៉ង់ទាំងពីរផ្នែក ត្រូវបានបញ្ជាឱ្យដកថយមកនៅទន្លេ Aisne តែនៅបន្តដេញតាមដោយទ័ពសម្ព័ន្ធមិត្ត។ ទ័ពអាល្លឺម៉ង់ បានបន្តដកថយ៦៥គីឡូម៉ែត្រទៀត រហូតដល់ចំណុចខ្សែបន្ទាត់ខាងជើងនៃទន្លេ Aisne ជាកន្លែងដែលពួកគេបានជីកត្រង់សេការពារខ្លួន ហើយក៏ជាកន្លែងចាប់ផ្តើមនូវសមរភូមិថ្មីមួយទៀតឈ្មោះថា «First Battle of the Aisne» ដែលមានរយៈពេល ៤ថ្ងៃគិតពីថ្ងៃទី១២ ដល់១៥ ខែកញ្ញា ឆ្នាំ១៩១៤។ ប៉ុន្តែសង្គ្រាមនៅតំបន់នេះគឺគ្មានអ្នកឈ្នះ និងអ្នកចាញ់ឡើយ ហើយត្រូវបន្តប្រឈមមុខដាក់គ្នារយៈពេលជាច្រើនឆ្នាំ។