ជីវ តាក្វាន់ ធ្លាប់និយាយពីរឿងចម្លែក១ ពាក់ព័ន្ធការរួមរ័ករវាងបងប្អូនបង្កើត

2021-03-04 06:21:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅក្នុងសៀវភៅកំណត់ហេតុរបស់បេសកទូតចិនលោក ជីវ តាក្វាន់ ស្ដីពីទឹកដី និងប្រពៃណីរបស់អ្នកស្រុកចេនឡា មាន១ចំណុចជាប់ពាក់ព័ន្ធនឹងរឿងចម្លែកដែលធ្លាប់កើតឡើងសឹងមិនគួរឲ្យជឿនាសម័យចេនឡា។

ស្ថិតនៅត្រង់ចំណុចទី៣៦ នៃសៀវភៅកំណត់ហេតុ បានសរសេររៀបរាប់ដូច្នេះថា៖

"នៅក្នុងកំពែងនាទិសខាងកើត មានអ្នកព្រៃម្នាក់រួមរ័កជាមួយប្អូនស្រីខ្លួនឯងបង្កើត ក៏ស្រាប់តែជាប់ស្បែកសាច់គ្នាបេះមិនចេញរហូតដល់គ្រប់បីថ្ងៃឥតមានស៊ីចុកអ្វីសោះក៏ស្លាប់បង់ជីវិតទៅ។ អ្នកស្រុកខ្ញុំម្នាក់សែ (ស៊ី) គេបានមករស់នៅស្រុកនេះរវាងសាមសិបប្រាំឆ្នាំហើយ គេថាគេបានឃើញរឿងនេះច្បាស់នឹងភ្នែកពីរលើកហើយ ហើយគេថាបានជាសក្ដិសិទ្ធិដូច្នេះ ព្រោះបារមីព្រះរបស់ស្រុកនេះខ្លាំងពូកែណាស់"។

គួររំលឹកថា នេះមិនមែនជារឿងចម្លែកតែ១ទេដែលលោក ជីវ តាក្វាន់ ធ្លាប់បានលើកឡើងពីសម័យកាលចេនឡារបស់ប្រទេសកម្ពុជា។ នៅក្នុងសៀវភៅកំណត់ហេតុដដែល លោកក៏ធ្លាប់លើកពីរឿង "ប្រមាត់ប្រមង់" ផងដែរ។

សូមបញ្ជាក់ថា នៅឆ្នាំ១២៩៦ បេសកទូតជនជាតិចិនមួយរូបឈ្មោះ ជីវ តាក្វាន់ (ZHOU DAGUAN: 1266-1346) បានមកធ្វើទស្សនកិច្ចនៅរាជធានីអង្គរ ហើយលោកបានកត់ត្រាព្រឹត្តិការណ៍នានានៅក្នុងប្រទេសកម្ពុជានាសម័យនោះ។ កំណត់ត្រារបស់លោកដែលមានចំណងជើងថា៖ "ប្រពៃណីនៃអ្នកស្រុកចេនឡា" បានក្លាយជាមូលដ្ឋានប្រវត្តិសាស្ត្រយ៉ាងសំខាន់មួយសម្រាប់កម្ពុជា។ ដោយយល់ឃើញពីសារៈសំខាន់របស់ឯកសារនេះទើបនាឆ្នាំ១៩៧៣ លោក លី ធាមតេង បានព្យាយាមបកប្រែឯកសារនេះមកជាភាសាខ្មែរ ដើម្បីទុកជាឯកសារគោលសំខាន់មួយ សម្រាប់ឲ្យជនជាតិខ្មែរយល់ពីកំណត់ត្រារបស់ជនជាតិចិនរូបនេះ៕

ដកស្រង់ចេញពីឯកសារ "លី ធាមតេង៖ កំណត់ហេតុរបស់ជីវតាក្វាន់អំពីប្រពៃណីនៃអ្នកស្រុកចេនឡា ឆ្នាំ១៩៧៣"

ចុចអាន៖

អត្ថបទ៖ ឈាង.