ក្នុងរបាយការណ៍ស្តីពី លទ្ធផលការងារគ្រប់ គ្រងគ្រោះមហន្តរាយ ក្នុងខែសីហា និងទិសដៅអនុវត្ត​ខែកញ្ញា ឆ្នាំ២០២១ បានបង្ហាញថា ក្រុមការងារនៃគណៈកម្មាធិការជាតិគ្រប់គ្រង​គ្រោះមហន្តរាយ ធ្វើការពិនិត្យតាមដានជាប្រចាំ អំពីស្ថានភាពអាកាស ធាតុ ដែលងាយបង្កឲ្យមានជំនន់ទឹក​ភ្លៀង​ក្នុង​រដូវវស្សា ជាពិសេសនៅ​តំបន់ភាគ​ពាយ័ព្យ និងតំបន់ឆ្នេរសមុទ្រ ។

របាយការណ៍ បានបន្តថា ក្រុមការងារកំពុងពិនិត្យ​ផ្ទៀងផ្ទាត់​តំបន់​ភូមិសាស្រ្ត តាមដង ទន្លេមេគង្គ សម្រាប់​ការត្រៀមលក្ខណៈ ឱ្យបានទាន់ពេលវេលា ​និងមានប្រសិទ្ធភាព ចំពោះគ្រោះទឹកជំនន់​ទន្លេមេគង្គ ហើយនឹងពង្រឹង និងពង្រីកការងារក្នុងប្រព័ន្ធព័ត៌មានគ្រប់គ្រងគ្រោះមហន្តរាយ មាន​ប្រព័ន្ធ ១២៩៤ និងប្រព័ន្ធPRISM ដោយមានកិច្ច សហការជាមួយអង្គការដៃគូសម្រាប់ឆ្លើយ តប និងអន្តរាគមន៍ជួយសង្គ្រោះ ហើយបានត្រៀមរថយន្តធំចំនួន ១ ២០៦គ្រឿង, អូប័រ ១៧៩គ្រឿង និងកាណូតល្បឿនលឿនចំនួន ៣២០គ្រឿង សម្រាប់ជួយសង្គ្រោះពលរដ្ឋរងការ​ប៉ះពាល់​ដោយ​គ្រោះ​មហន្តរាយទឹកជំនន់ ក្នុងរដូវវស្សាឆ្នាំនេះ។

ស្ថាប័នជាតិមួយនេះ ទទួលបានជំនួយរាជរដ្ឋាភិបាល ប្រព័ន្ធស្បៀងបម្រុងកម្ពុជា, ជំនួយ​សម្ដេចតេជោ និងសម្ដេចកិត្តិព្រឹទ្ធបណ្ឌិត គិតជាថវិកាចំនួន ៦ ៤០៩ ៥៦៩ ដុល្លារ, ជំនួយ​ពីស្ថាប័ន​ព្រះមហាក្សត្រ និងស្ថាប័នជាតិ នូវសម្ភារៈ ស្បៀងអាហារ និងថវិកា, រួមទាំងជំនួយ​ពី​ស្ថាប័ន​ក្រៅ​រដ្ឋាភិបាល និងសប្បុរសជន សម្រាប់ចែកជូនពលរដ្ឋរងគ្រោះផងដែរ ។

នៅក្នុងសិក្ខាសាលាស្តីពី ការត្រៀមខ្លួនដើម្បីកាត់បន្ថយផលប៉ះពាល់ពីគ្រោះទឹក ជំនន់ ឆ្នាំ២០២១ និងឆ្នាំខាងមុខ កាលពីថ្ងៃទី៧ ខែកញ្ញា ឆ្នាំ២០២១ ឯកឧត្តមទេសរដ្ឋមន្ត្រី គន់ គីម អនុប្រធានទី១គណៈកម្មា ធិការជាតិគ្រប់គ្រងគ្រោះមហន្តរាយ លើក ទឹកចិត្តដល់អ្នកពាក់ព័ន្ធនានា ចូលរួម​ចែក​រំលែកព័ត៌មាន អំពីស្ថានភាពប៉ះពាល់សង្គមដោយគ្រោះមហន្តរាយ ជាក់លាក់ និងទាន់ពេលវេលា សម្រាប់ការឆ្លើយសង្គ្រោះបន្ទាន់ ឲ្យស្របទៅនឹងតម្រូវការរបស់ជនរងគ្រោះ ។

ឯកឧត្តមទេសរដ្ឋមន្ត្រី បានបន្ថែមថា ជា មួយនឹងកិច្ចខិតខំប្រឹងប្រែង ក្នុងការត្រៀមរៀបចំផែន​ការ​ត្រៀមបម្រុង ក៏ត្រូវគិតគូរសំខាន់នៅពេលមានគ្រោះមហន្តរាយនៅមូលដ្ឋាន ដែលត្រូវឆ្លើយតបមុន ដូចនេះសហគមន៍ គឺជាបណ្ដាញដ៏មានប្រសិទ្ធភាព ក្នុងការឆ្លើយតបគ្រោះមហន្តរាយ ដែលចាំបាច់​ត្រូវជួយពួកគេឲ្យមានសមត្ថភាពត្រៀមបង្ការ ការឆ្លើយតបទៅនឹងគ្រោះ មហន្តរាយ និងស្ដារឡើង​វិញ​ពីគ្រោះ មហន្តរាយ ។

គួរបញ្ជាក់ថា ឆ្នាំ២០២០កម្ពុជាបានទទួល រងផលប៉ះពាល់យ៉ាងធ្ងន់ធ្ងរ ដោយគ្រោះ មហន្តរាយ​ជំនន់​ទឹកភ្លៀង នៅក្នុងមូលដ្ឋានរាជធានី និងខេត្តទាំង២៤ ក្នុងនោះខេត្ត ពោធិ៍សាត់ បាត់ដំបង និង​បន្ទាយមានជ័យ រងគ្រោះធ្ងន់ បង្កឲ្យមានមនុស្សស្លាប់ចំនួន ៥៨នាក់ ពលរដ្ឋរងផល​ប៉ះពាល់ចំនួន ២២២ ៨៩២គ្រួសារ និងពលរដ្ឋ​ជម្លៀស​សរុបចំនួន ១៧ ៥១៧គ្រួសារ៕