អភិបាលរាជធានី អំពាវនាវឲ្យម្ចាស់សហគ្រាស រើទៅក្រៅក្រុង

2017-05-05 06:34:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកប៉ា សុជាតិវង្ស អភិបាលរាជធានីភ្នំពេញ បានអំពាវនាវឲ្យម្ចាស់សិប្បកម្ម រោងចក្រ សហគ្រាស និងឃ្លាំងស្ដុកទំនិញ ក្នុងរាជធានីភ្នំពេញ រើទីតាំងទៅខាងក្រៅទីក្រុង ដើម្បីដោះស្រាយការកកស្ទះចរាចរណ៍នៅក្នុងទីក្រុង។

ក្នុងពិធីសម្ពោធដាក់ឲ្យប្រើប្រាស់ស្ពានអាកាសថ្មើរជើងនៅផ្លូវជាតិលេខ៤ ត្រង់ចំណុចផ្សារ និងវិទ្យាល័យជម្ពូវ័ន ក្នុងសង្កាត់ចោមចៅ ខណ្ឌពោធិ៍សែនជ័យ នាព្រឹកថ្ងៃទី៥ ខែឧសភានេះ លោកប៉ា សុជាតិវង្ស បានថ្លែងថា “ឥឡូវផ្លូវក្រៅក្រុងរបស់យើងកាន់តែល្អប្រសើរ ផ្លូវក្រវាត់ក្រុងរបស់យើងទី១ ទី២ និងទី៣ ឥឡូវនេះសូមអំពាវនាវដល់ម្ចាស់រោងចក្រ សហគ្រាស ឃ្លាំង សូមមេត្តាផ្លាស់ប្តូរទីតាំងពីក្នុងមកក្រៅ (ក្រៅក្រុង)។ ពីមុនយើងអត់មានផ្លូវ អីចឹងបង្ខំគាត់ឲ្យមកក្រៅក៏មិនបាន ព្រោះអត់មានផ្លូវ។ ឥឡូវមានហើយ។ អីចឹង សុំឲ្យចេញពីក្នុងមកខាងក្រៅ ដើម្បីកុំឲ្យពិបាកឡានធំចូល...”។

លោកអភិបាលរាជធានី ក៏បានលើកឡើងដែរថា ពេលនេះនៅភ្នំពេញ បានបើកដំណើរការពង្រីកកំណាត់ផ្លូវជាតិលេខ៤ ធំជាងមុន ចាប់ពីចំណុចរង្វង់មូលចោមចៅ ហើយមានផ្លូវកប់ស្រូវ និងផ្លូវហាណូយ ក៏បានសាងសងពង្រីករួចរាល់ រហូតដល់ផ្លូវជាតិលេខ៥ ស្ពានព្រែកព្នៅ៕

អត្ថបទ៖ សុខ សុវត្ថិ