សហប្រធាននៃវេទិកាសេដ្ឋកិច្ចអាស៊ាន ៦ប្រទេស ជំរុញឱ្យអនុវត្តតាមប្រព័ន្ធសេដ្ឋកិច្ចឌីជីថល

2017-05-11 07:19:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហប្រធាននៃវេទិកាសេដ្ឋកិច្ចពិភពលោកស្តីពីអាស៊ាន ចំនួន៦ប្រទេស មកពីវិស័យឯកជនផ្នែកធុរកិច្ច បានជំរុញឱ្យអាស៊ានអនុវត្តន៍តាមប្រព័ន្ធពាណិជ្ជកម្មទំនើប (Digital Economic) ដើម្បីសម្រួលពាណិជ្ជកម្ម និងការវិនិយោគនៅក្នុងតំបន់។ អ្នកជំនាញសេដ្ឋកិច្ចទាំង៦ មកពី ម៉ាឡេស៊ី ស្វ៊ីស ចិន ហុងកុង សិង្ហបុរី និងថៃ។ នេះបើយោងតាមការចេញផ្សាយរបស់ភ្នាក់ងារសារព័ត៌មានរដ្ឋ AKP នៅថ្ងៃទី១១ឧសភានេះ។

នាយកប្រតិបត្តិក្រុមហ៊ុនប្រេងឥន្ធនៈ PTT របស់ថៃ លោក ថេវិន វង្សវណ្ណនិក បានថ្លែងថា ការធ្វើពាណិជ្ជកម្ម និងសេដ្ឋកិច្ចបែបទំនើបនេះ គឺជាការតភ្ជាប់ការវិនិយោគរវាងប្រទេសមួយ ទៅប្រទេសមួយទៀត ដើម្បីសម្រួលរបាំងពាណិជ្ជកម្ម និងការរាំងស្ទះផ្សេងៗ។

ប្រធានធនាគារវិនិយោគហេដ្ឋារចនាសម្ព័ន្ធតំបន់អាស៊ី (AIIB) នៃប្រទេសចិន លោក Jin Liqun អះអាងថា ដើម្បីអនុវត្តប្រព័ន្ធនេះ ទាមទារឱ្យមានធនធានមនុស្ស ជំនាញ បច្ចេកវិទ្យា និងថវិកា និងការវិនិយោគលើការអភិវឌ្ឍហេដ្ឋារចនាសម្ព័ន្ធតភ្ជាប់រវាងតំបន់អាស៊ាន ទៅកាន់ពិភពលោក។

លោកស្រី Tan Hool Ling សហស្ថាបនិកក្រុមហ៊ុន GRAP របស់សិង្ហបុរី លើកឡើងថា ផែនការនេះទាមទារនូវពេលវេលា និងកិច្ចសហប្រតិបត្តិការពីបណ្តាប្រទេសពាក់ព័ន្ធ ដើម្បីអនុវត្តឱ្យមានប្រសិទ្ធិភាព។

វេទិកាសេដ្ឋកិច្ចពិភពលោកស្តីពីអាស៊ាន ឆ្នាំ២០១៧ ដែលកម្ពុជាធ្វើជាម្ចាស់ផ្ទះ ចាប់ពីថ្ងៃទី១០ ដល់ ១២ឧសភា មានអ្នកចូលរួមជិត ១ពាន់នាក់ ក្នុងនោះក៏មានមេដឹកនាំអាស៊ាន៣ប្រទេស (ហ្វីលីពីន វៀតណាម ឡាវ) និងថ្នាក់ដឹកនាំ ថ្នាក់រដ្ឋមន្រ្តីមកពីអាស៊ាន និងពិភពលោកចំនួន ១៨ផ្សេងទៀត ព្រមទាំងវិស័យឯកជន ដើម្បីចូលរួមជជែកពិភាក្សាប្រធានបទ «យុវជន បច្ចេកវិទ្យា និងកំណើន»៕

អត្ថបទ៖ សំភី