U-20 World Cup៖ វៀតណាម មិនទាន់អស់ឱកាសទៅជុំបន្ទាប់ ទោះចាញ់បារាំងទក់សាច់

2017-05-26 04:10:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុម U-20 វៀតណាម បានចាញ់ក្រុម U-20 បារាំង ៤-០ ក្នុងការប្រកួតទី២ ពូល E យប់មិញនេះ។ លទ្ធផលនេះ មានន័យថា បារាំង បានឡើងទៅវគ្គ ១៦ក្រុមចុងក្រោយជាស្វ័យប្រវត្តិ ទោះសល់១ប្រកួតទៀតក៏ដោយ ក្រោយរកបាន ៦ពិន្ទុពេញ ក្នុង២ប្រកួត។ ចំណែកក្រុម U-20 វៀតណាម មាន ១ពិន្ទុ ក្នុង២ប្រកួត ឈរលេខ៣ ក្នុងពូល។

រីឯលទ្ធផលមួយគូទៀតក្នុងពូលនេះដែរ គឺ U-20 នូវែលហ្សេឡង់ ឈ្នះ U-20 ហុងឌុយរ៉ាស់ ៣-១។ ៣ពិន្ទុបន្ថែមនេះ ជួយឲ្យនូវែលហ្សេឡង់ មាន ៤ពិន្ទុ ឈរលេខ២ ខណៈហុងឌុយរ៉ាស់ នៅតែ ០ពិន្ទុ ឈរបាតពូល។

នៅក្នុងពូលនេះ នូវែលហ្សេឡង់ និងវៀតណាម ត្រូវចាំអ៊ុតនៅប្រកួតចុងក្រោយ ដែលនូវែលហ្សេឡង់ ត្រូវជួបបារាំង ឯវៀតណាម ជួបហុងឌុយរ៉ាស់។ នូវែលហ្សេឡង់ ត្រូវការត្រឹមស្មើប៉ុណ្ណោះ ដើម្បីបានលេខ២ក្នុងពូល ខណៈវៀតណាម ត្រូវការឈ្នះហុងឌុយរ៉ាស់ដាច់ខាត។ ប្រសិនបើវៀតណាមឈ្នះ នឹងកើនដល់ ៤ពិន្ទុ ស្មើនូវែលហ្សេឡង់ ករណីនូវែលហ្សេឡង់ ចាញ់បារាំង។

ការប្រកួតលើកចុងក្រោយនៃពូល E នឹងធ្វើឡើងនៅថ្ងៃទី២៨ ខែឧសភា វេលាម៉ោង ៣រសៀលដំណាលគ្នា។

គួរបញ្ជាក់ផងដែរថា ក្រុមលេខ៣ ក៏មិនប្រាកដថាធ្លាក់នោះដែរ ដោយសាររូបមន្តនៃការប្រកួត គឺក្រុមលេខ៣ ល្អបំផុតចំនួន ៤ ក្នុងចំណោម ៦ពូល នឹងឡើងទៅកាន់វគ្គ ១៦ក្រុមចុងក្រោយ៕

អត្ថបទ៖ សុខ សុវត្ថិ