សុពលភាពសមាជិកក្រុមប្រឹក្សាឃុំ-សង្កាត់ នឹងត្រូវប្រកាស ២សប្តាហ៍ក្រោយ

2017-06-25 04:33:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ស ខេង រដ្ឋមន្រ្តីមហាផ្ទៃ បានបញ្ជាក់ថា បន្ទាប់ពីប្រកាសលទ្ធផលបោះឆ្នោតជ្រើសរើសក្រុមប្រឹក្សាឃុំ-សង្កាត់ ផ្លូវការ នៅថ្ងៃទី២៥មិថុនា នោះការប្រកាសសុពលភាពសមាជិកក្រុមប្រឹក្សាឃុំ-សង្កាត់ និងប្រកាសឈ្មោះប្រធានក្រុមប្រឹក្សាឃុំ-សង្កាត់ មេឃុំ ចៅសង្កាត់ ជំទប់ និងចៅសង្កាត់រង នឹងធ្វើឡើងនៅក្នុងរយៈពេល ១៤ថ្ងៃបន្ទាប់។ សម្តេច ឱ្យដឹងដូច្នេះ ក្នុងពិធីប្រកាសចូលកាន់តំណែងរបស់អភិបាលខេត្តកោះកុងថ្មី កាលពីថ្ងៃទី២៣មិថុនា។

សម្តេច ស ខេង ក្នុងពិធីតែងតាំងអភិបាលខេត្តកោះកុងថ្មី លោកស្រី មិថុនា ភូថង ថ្ងៃទី២៣មិថុនា

សម្តេច ស ខេង ពន្យល់ថា អនុលោមតាមស្តីពីការគ្រប់គ្រងរដ្ឋបាលឃុំ សង្កាត់ បានកំណត់ថា ក្នុងអំឡុងពេល១៤ថ្ងៃក្រោយពីការប្រកាសលទ្ធផលផ្លូវការ នៃការបោះឆ្នោត ត្រូវចាត់ឲ្យមានការប្រជុំជាលើកដំបូង របស់ក្រុមប្រឹក្សាឃុំ សង្កាត់ ក្រោមអធិបតីភាពមន្ត្រីម្នាក់ ដែលចាត់តាំងដោយរដ្ឋមន្ត្រីក្រសួងមហាផ្ទៃ ដើម្បីប្រកាសសុពលភាពសមាជិកក្រុមប្រឹក្សាឃុំ សង្កាត់និងប្រកាសឈ្មោះប្រធានក្រុមប្រឹក្សាឃុំ សង្កាត់ មេឃុំ ចៅសង្កាត់ ជំទប់ និងចៅសង្កាត់រង។

សម្តេច បានជំរុញឱ្យអភិបាលខេត្តទាំងអស់ ចាត់ចែងអនុវត្តឲ្យមានប្រសិទ្ធភាពនូវប្រកាសធ្វើប្រតិភូកម្មអំណាចដល់អភិបាល រាជធានី ខេត្ត ក្នុងការចាត់ចែងដំណើរការ នៃកិច្ចប្រជុំលើកដំបូងរបស់ក្រុមប្រឹក្សាឃុំ សង្កាត់ អាណត្តិថ្មីនិងសេចក្តីណែនាំពីការរៀបចំកិច្ចប្រជុំលើកដំបូង ដើម្បីប្រកាសសុពលភាពនេះ៕

ប្រភព៖ រស្មីកម្ពុជា ប្រែសម្រួល៖ សំភី