ស្ថានទូតអាមេរិកស្វាគមន៍ការដោះលែងអ្នកកាពារសិទ្ធិមនុស្ស

2017-06-30 04:30:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅព្រឹកថៃ្ងសុក្រទី ៣០ មិថុនានេះ ស្ថានទូតអាមេរិកនៅរាជធានីភ្នំពេញបានចេញសេចក្តីថ្លែងការណ៍មួយ ដោយស្វាគមន៍ការដោះលែងឱ្យនៅក្រៅឃុំនៃមន្រ្តីបច្ចុប្បន្ន និងអតីតមន្រ្តីនៃអង្គការការពារសិទ្ធិមនុស្ស អាដហុក។ ស្ថានទូតលើកឡើងថា ការសម្រេចចិត្តតាមផ្លូវច្បាប់នេះនឹងកាត់បន្ថយបន្ទុកដែលមានទៅលើចុងចោទ និងគ្រួសាររបស់គេក្នុងពេលដែលគេប្រឈមនឹងដំណោះស្រាយចំពោះបណ្តឹងចោទប្រកាន់ចំពោះរូបពួកគេ។

ជុំវិញការដោះលែងនេះ វិទ្យុអាស៊ីសេរី កាលពីម្សិលមិញ បានឱ្យដឹងថា ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា លោក វីល្លៀម ហៃដ្ដ (William Heidt) និងលោកនាយករដ្ឋមន្ត្រី ហ៊ុន សែន បានជួបពិភាក្សាគ្នានៅរសៀលថ្ងៃទី២៦ ខែមិថុនា។ អ្នកទាំងពីរ បានពិភាក្សាគ្នាពីទំនាក់ទំនងសេដ្ឋកិច្ចរបស់សហរដ្ឋអាមេរិក និងកម្ពុជា ពីអាទិភាពនៃការអភិវឌ្ឍសិទ្ធិមនុស្ស និងបញ្ហាដទៃទៀតដែលមានសារសំខាន់សម្រាប់ទំនាក់ទំនងកម្ពុជា-អាមេរិក។ នៅក្នុងជំនួបនេះ ត្រូវបានក្រុមអ្នកការពារសិទ្ធិមនុស្សសន្និដ្ឋានថា ឯកអគ្គរដ្ឋទូតអាមេរិក អាចនឹងជជែកពីការដោះលែងមន្ត្រីសិទ្ធិមនុស្សអាដហុក និងលោក នី ចរិយា អគ្គលេខាធិការរង គ.ជ.ប ដែរ។

សូមបញ្ជាក់ដែរថា មន្ដ្រីអាដហុកចំនួន៤រូបដែលត្រូវដោះលែង គឺលោកនី សុខា លោកយី សុខសាន្ត លោកណៃ រ៉ង់ដា និង អ្នកស្រីលឹម មុន្នី ។ អ្នកទាំង៤ ត្រូវបានចោទប្រកាន់ពីបទសូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ។ ដោយឡែក លោកនី ចរិយា អគ្គលេខាធិការរងគ.ជ.ប ដែលត្រូវដោះលែងដែរនោះ ត្រូវបានចោទពីបទសមគំនិតក្នុងអំពើសូកប៉ាន់សាក្សី តាមមាត្រា២៩ និង មាត្រា៥៤៨ នៃក្រមព្រហ្មទណ្ឌ។

បទចោទទាំងអស់នេះ កើតឡើងបន្ទាប់ពីតុលាការរកឃើញថា អ្នកទាំង៥ មានជាប់ពាក់ព័ន្ធរឿងរ៉ាវរវាងលោកកឹម សុខា ប្រធានគណបក្សសង្គ្រោះជាតិ ជាមួយនាងខុម ចាន់តារ៉ាទី ហៅស្រីមុំ៕

អត្ថបទ៖ ឃុត សុខឿន