សង្គមស៊ីវិលជាង១០០ ស្នើរដ្ឋាភិបាលឲ្យអន្តរជាតិចូលរួមស៊ើបអង្កេតឃាតកម្មបណ្ឌិត កែម ឡី

2017-07-09 03:18:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមអង្គការសង្គមស៊ីវិលជាង ១០០ស្ថាប័ន សម្រេចចេញសេចក្ដីថ្លែងការណ៍នៅថ្ងៃទី៨កក្កដា ស្នើដោយទទូចឲ្យមានការស៊ើបអង្កេតឯករាជ្យលើឃាតកម្មបណ្ឌិត កែម ឡី ដោយមានការចូលរួមពីអ្នកជំនាញអន្តរជាតិ។ សំណើនេះ ធ្វើឡើងមុន២ថ្ងៃ នៃខួបគម្រប់១ឆ្នាំ នៃការបាញ់សម្លាប់លោក បណ្ឌិត កែម ឡី កាលពីថ្ងៃទី១០ កក្កដា ២០១៦។

ប្រធានផ្នែកអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត ដែលជាសមាជិកនៃក្រុមសង្គមស៊ីវិលដែលចេញផ្សាយសេចក្ដីថ្លែងការណ៍នេះ ឲ្យដឹងបន្ថែមពីសេចក្ដីថ្លែងការណ៍នេះថា មានតែមធ្យោបាយស៊ើបអង្កេតឯករាជ្យ និងមានការចូលរួមពីអន្តរជាតិទេ ទើបអាចរកយុត្តិធម៌ជូនលោក កែម ឡី បាន។ លោកយល់ថា ប្រសិនរដ្ឋាភិបាលកម្ពុជា មានឆន្ទៈស៊ើបអង្កេតករណីឃាតកម្ម លោក កែម ឡី ត្រូវតែឲ្យមានការចូលរួមពីអន្តរជាតិ ឬ UN។

ក្រៅពីសំណូមពរឲ្យមានការស៊ើបអង្កេតឯករាជ្យដោយមានការចូលរួមពីអ្នកជំនាញអន្តរជាតិ។ ក្រុមសង្គមស៊ីវិលសំណូមពរឲ្យផ្ដល់ភស្តុតាងពេញលេញ រាប់ទាំងវីដេអូពីកាមេរ៉ាសុវត្ថិភាព ដែលបង្ហាញពីដំណើររឿងនៃឃាតកម្មនេះ។

ទាក់ទងការលើកឡើងនេះ អ្នកនាំពាក្យក្រសួងមហាផ្ទៃ លោក ខៀវ សុភ័គ ឲ្យដឹងថា ផ្អែកលើច្បាប់ព្រហ្មទណ្ឌរបស់កម្ពុជា និងដែនអធិបតេយ្យក្នុងនាមជារដ្ឋមួយ មិនអាចអនុញ្ញាតឲ្យបរទេសលូកដៃស៊ើបអង្កេតករណីលោក កែម ឡី បានទេ។ លោកពន្យល់ថា ការធ្វើបែបនេះ ស្មើនឹងដាក់ប្រទេសកម្ពុជា ឲ្យស្ថិតនៅក្រោមការគ្រប់គ្រងពីបរទេសសាជាថ្មី៕

ប្រភព៖ Radio Free Asia ប្រែសម្រួល៖ សំភី