កម្ពុជា គ្រោងនឹងបាញ់បង្ហោះផ្កាយរណប នៅឆ្នាំ២០២១

2017-10-19 08:59:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្ពុជា ត្រូវការលុយវិនិយោគប្រមាណ ១៥០លានដុល្លារ ដើម្បីបង្ហោះផ្កាយរណបជាលើកដំបូងរបស់ខ្លួនទៅកាន់គន្លងផែនដី នៅឆ្នាំ២០២១ ឬឆ្នាំ២០២២។ ផ្កាយរណបនេះអាចមានអាយុកាលយ៉ាងហោច ១៥ឆ្នាំ។ នេះបើតាមលោក អ៊ឹម វុត្ថា អ្នកនាំពាក្យនិយ័តករទូរគមនាគមន៍កម្ពុជា បានប្រាប់សារព័ត៌មាន Khmertimeskh នៅក្រោយសិក្ខាសាលាស្តីពី "ការវាស់ស្ទង់តម្រូវការទីផ្សារសម្រាប់គម្រោងបង្ហោះផ្កាយរណប" កាលពីថ្ងៃទី១៦តុលាកន្លងទៅ។

រូបតំណាង

លោកបានលើកពីក្រុមហ៊ុន Royal Blue Skies ដែលជាក្រុមហ៊ុនបុត្រសម្ព័ន្ធនៃក្រុមហ៊ុនរ៉ូយ៉ាល់គ្រុប Royal Group និងក្រុមហ៊ុន Great Wall Industry Corporation ដែលមានមូលដ្ឋានមកពីប្រទេសចិន កំពុងសិក្សាលទ្ធភាពដើម្បីអភិវឌ្ឍគម្រោងមួយនេះ។ ក្រុមហ៊ុនចិននេះ ធ្លាប់មានបទពិសោធន៍ ក្នុងការធ្វើគម្រោងបាញ់បង្ហោះផ្កាយរណបជាមួយប្រទេសឡាវ កាលពីឆ្នាំ ២០១៥។ ដូច្នេះការអភិវឌ្ឍគម្រោងនេះអាចនឹងចំណាយពេលឆាប់។

ផ្កាយរណបឡាវ ត្រូវបានបាញ់បង្ហោះតាមរយៈគ្រាប់រ៉ុកកែតចិន ចេញពីខេត្តស៊ីឈួន ប្រទេសចិន ក្នុងឆ្នាំ២០១៥

គួររំលឹកថា សម្តេចនាយករដ្ឋមន្រ្តី ហ៊ុន សែន ក្នុងពិធីសម្ពោធអគារថ្មី របស់ទីស្តីការក្រសួងប្រៃសណីយ៍ និងទូរគមនាគមន៍កាលពីថ្ងៃទី១៥ ខែធ្នូ ឆ្នាំ២០១៦ បានជំរុញឲ្យលោក គិត ម៉េង ប្រធានក្រុមហ៊ុន Royal Group ពិចារណាសហការជាមួយក្រុមហ៊ុនបរទេស ក្នុងការបាញ់បង្ហោះផ្កាយរណបនៅកម្ពុជា។ សម្តេចថ្លែងថា ប្រសិនបើកម្ពុជាមានផ្កាយរណប នោះទូរគមនាគមន៍កម្ពុជា និងស្ថានីយទូរទស្សន៍នានា ដែលកំពុងទិញសេវាពីបរទេស នឹងងាកមកប្រើប្រាស់សេវាដែលមាននៅស្រុកខ្មែរវិញ ហើយនិងធ្វើឲ្យប្រព័ន្ធអ៊ីនធើណេតនៅកម្ពុជា មានល្បឿនលឿន តាមទាន់បច្ចេកវិទ្យាសម័យថ្មី៕

អត្ថបទ៖ សំភី