ក្រសួងមហាផ្ទៃអេស្ប៉ាញ ព្រមានប៉ូលិសនៅតំបន់កាតាឡូញ៉ា ឲ្យគោរពតួនាទីខ្លួន

2017-10-30 04:09:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋមន្រ្តីក្រសួងមហាផ្ទៃអេស្ប៉ាញ លោក Juan Lgnacio Zoido បានផ្ញើលិខិតចំហរ១ ទៅកាន់គ្រប់ស្នងការប៉ូលិសទាំងអស់នៅតំបន់កាតាឡូញ៉ា ដោយក្រើនរំលឹកថា ត្រូវបំពេញកាតព្វកិច្ចគោរពតាមរដ្ឋធម្មនុញ្ញ និងច្បាប់ជាតិរបស់អេស្ប៉ាញ។ ការព្រមាននេះ ធ្វើឡើងក្រោយពេលដែលសភានៅតំបន់កាតាឡូញ៉ា បោះឆ្នោតប្រកាសឯករាជ្យផ្តាច់ខ្លួនចេញពីរដ្ឋអំណាចកណ្តាលអេស្ប៉ាញ កាលពីថ្ងៃទី២៧តុលា។

ក្រោយការប្រកាសឯករាជ្យនេះ នាយករដ្ឋមន្រ្តីអេស្ប៉ាញ លោក Mario Rajoy បានបណ្តេញមន្ត្រីប៉ូលិសជាន់ខ្ពស់នៅតំបន់កាតាឡូញ៉ា ៣រូបមកហើយ ដែលជាផ្នែក១ នៃការចាត់វិធានការបង្ក្រាបមកលើតំបន់នេះ។

លើសពីនេះ ព្រឹទ្ធសភាអេស្ប៉ាញបានផ្តល់ភ្លើងខៀវឲ្យរដ្ឋាភិបាលទីក្រុងម៉ាឌ្រីដអនុវត្តមាត្រាទី១៥៥នៃរដ្ឋធម្មនុញ្ញដែលអនុញ្ញាតឲ្យយកតំបន់កាតាឡូញ៉ាមកគ្រប់គ្រងវិញ។ លោក Zoido ព្រមានដល់ប៉ូលិសនៅតំបន់នោះថា ប្រសិនបើមាត្រានេះ មិនត្រូវបានអនុវត្តទេ ពួកគេនឹងអាចបាត់បង់ការងារធ្វើ។

កាលពីថ្ងៃទី២៩តុលាម្សិលមិញនេះ ក្រុមជាតិនិយមអេស្ប៉ាញ ក៏បានប្រមូលផ្តុំគ្នាធ្វើបាតុកម្មនៅក្រុងបាសេឡូណា ប្រឆាំងនឹងការប្រកាសឯករាជ្យរបស់តំបន់កាតាឡូញ៉ានេះផងដែរ៕

ប្រភព៖ CNBC ប្រែសម្រួល៖ សំភី