នៅដំណាច់ឆ្នាំ២០១៨ បំណុលកម្ពុជា នឹងកើនឡើងដល់ប៉ុន្មាន?
- 2017-10-31 07:50:03
- ចំនួនមតិ 0 | ចំនួនចែករំលែក 0
នៅដំណាច់ឆ្នាំ២០១៨ បំណុលកម្ពុជា នឹងកើនឡើងដល់ប៉ុន្មាន?
ចន្លោះមិនឃើញ
រដ្ឋាភិបាលកម្ពុជា គ្រោងខ្ចីប្រាក់ប្រមាណ ១៤០០លានដុល្លារ ដើម្បីសម្រេចបាននូវទិសដៅថវិកាដែលគ្រោងទុករបស់ខ្លួនសម្រាប់ឆ្នាំ២០១៨ ដែលធ្វើឲ្យបំណុលជាតិគិតនៅត្រឹមចុងឆ្នាំ២០១៨ កើនឡើងដល់ ៧,៦ពាន់លានដុល្លារ ខណៈគិតត្រឹមខែមិថុនា ឆ្នាំ២០១៧ មានចំនួន ៦,២ពាន់លានដុល្លារ។ នេះបើយោងតាមសេចក្ដីព្រាងច្បាប់ស្ដីពីថវិកាជាតិឆ្នាំ២០១៨ ចុះផ្សាយកាលពីថ្ងៃទី២៧ ខែតុលា ឆ្នាំ២០១៧។
ទំហំប្រាក់កម្ចី ១៤០០លានដុល្លារ បានមកពីការចុះហត្ថលេខាខ្ចីលើគម្រោងសរុបចំនួន២៦ ពីធនាគារពិភពលោក ធនាគារអភិវឌ្ឍន៍អាស៊ី ប្រទេសចិន ជប៉ុន កូរ៉េខាងត្បូង បារាំង និង ឥណ្ឌា។
តាមទិន្នន័យគិតត្រឹមឆមាសទី១ ឆ្នាំ២០១៧ របស់ក្រសួងសេដ្ឋកិច្ចស្ដីពីបំណុលសាធារណៈកម្ពុជា បានបង្ហាញថា ចិនបានឈរលេខរៀងទីមួយ ដែលជាម្ចាស់បំណុលធំជាងគេរបស់កម្ពុជា ក្នុងទំហំទឹកប្រាក់ជិត ៤ពាន់លានដុល្លារ ស្មើនឹង ៤២,៩៨%។ បន្ទាប់មក លេខរៀងទីពីរគឺ ធនាគារអភិវឌ្ឍន៍អាស៊ី ចំនួនជាង ២ពាន់លានដុល្លារ ស្មើនឹង ២២,៣៣% លេខបី គឺ ប្រទេសជប៉ុន ដែលមានចំនួនជាង ១ពាន់លានដុល្លារ ស្មើនឹង ១១,១២%។ បន្តមកទៀត គឺ ធនាគារពិភពលោក ដែលមានចំនួន ៩០០លានដុល្លារ ស្មើនឹង ១០,២០%, កូរ៉េខាងត្បូង ជិត ៧០០លានដុល្លារ ស្មើនឹង ៧,៣៣%, បារាំង ចំនួនជាង ១០០លានដុល្លារ ស្មើនឹង ១,៤៥% និង ឥណ្ឌា ជាង ៧៥លានដុល្លារ ស្មើនឹង ០,៨១% ។
ទោះបីជាតួលេខនៃបំណុលកើនឡើងក្ដី ក៏ក្រសួងសេដ្ឋកិច្ចបានអះអាងថា ការបង្កើនទំហំនៃកម្ចី នឹងមិនបង្កើតជាបន្ទុកបំណុលដល់កម្ពុជានោះទេ ព្រោះរដ្ឋាភិបាលរំពឹងទៅលើការរីកចម្រើននៃសេដ្ឋកិច្ចជាតិ។ ដូច្នេះ សមត្ថភាពសងរបស់កម្ពុជា ក៏ខ្ពស់ជាងមុនដែរ៕