សភាទាំង២ថ្នាក់ ផ្ញើសារទៅព្រឹទ្ធសភាអាមេរិក ពាក់ព័ន្ធនឹងស្ថានការណ៍នយោបាយនៅកម្ពុជា

2017-11-26 03:37:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សភាកម្ពុជា ដែលរួមមាន ព្រឹទ្ធសភា និងរដ្ឋសភា បានចេញសេចក្តីថ្លែងការណ៍រួម កម្រាស់ ៣ទំព័រ ស្តីពីលទ្ធិប្រជាធិបតេយ្យ សិទ្ធិមនុស្ស និងនីតិរដ្ឋនៅកម្ពុជា ជូនមជ្ឈដ្ឋានសភាអន្តរជាតិ ពិសេសព្រឹទ្ធសភាអាមេរិក ដែលបានបង្ហាញក្តីបារម្ភចំពោះស្ថានការណ៍នៅកម្ពុជា។

រដ្ឋសភា

សេចក្តីថ្លែងការណ៍រួមរបស់សភាកម្ពុជា ចេញផ្សាយនៅថ្ងៃទី២៥ ខែវិច្ឆិកា ឆ្នាំ២០១៧ បានលើកឡើង ៩ចំណុច ដោយក្នុងនោះសភាកម្ពុជា បានបកស្រាយបញ្ហាពាក់ព័ន្ធនឹងករណីចាប់ខ្លួនលោក កឹម សុខា ការរំលាយគណបក្សសង្គ្រោះជាតិ និងការបិទសារព័ត៌មាន និងអង្គការក្រៅរដ្ឋាភិបាល។

ព្រឹទ្ធសភា

ពាក់ព័ន្ធករណីលោក កឹម សុខា មេដឹកនាំគណបក្សសង្គ្រោះជាតិ ដែលត្រូវបានចាប់ខ្លួនពីបទ ជាប់ពាក់ព័ន្ធនឹងអំពើឃុបឃិតជាមួយបរទេស ធ្វើវិទ្ធង្សនាចង់ផ្តួលរំលំរាជរដ្ឋាភិបាល ត្រូវបានសភាលើកឡើងថា គឺមកពីលោក ត្រូវទទួលការចោទប្រកាន់តាមបញ្ញត្តិនៃមាត្រា ៤៤៣ នៃក្រមព្រហ្មទណ្ឌរបស់កម្ពុជា។ បញ្ហានេះ ក៏មិនខុសពីករណីរបស់លោក Paul Manafort និងសហការីរបស់គាត់ នៅសហរដ្ឋអាមេរិកដែរ។

លោក កឹម សុខា ក្នុងអំឡុងពេលថ្លែងទៅកាន់អ្នកកាសែត មុខសាលាដំបូងរាជធានីភ្នំពេញ

ចំពោះការរំលាយគណបក្សសង្គ្រោះជាតិ ដែលតុលាការកំពូល បានសម្រេចកាលពីថ្ងៃទី១៦ ខែវិច្ឆិកា ឆ្នាំ២០១៧ ក៏ត្រូវបានសភា លើកឡើងថា នៅក្នុងព្រឹទ្ធសភាកម្ពុជា បច្ចុប្បន្នមានគណបក្សនយោបាយ២ គឺគណបក្សប្រជាជនកម្ពុជា និងគណបក្សភ្លើងទៀន។ នៅក្នុងពេលដ៏ខ្លីខាងមុខនេះ រដ្ឋសភាកម្ពុជា នឹងមានវត្តមាននៃគណបក្សនយោបាយមួយចំនួនថ្មីទៀត ក្នុងចំណោមគណបក្សនយោបាយ ដែលបានចូលរួមការបោះឆ្នោតឆ្នាំ២០១៣ ស្របទៅតាមច្បាប់ស្តីពីគណបក្សនយោបាយ។

ក្បួនដង្ហែគណបក្សសង្គ្រោះជាតិ ក្នុងអំឡុងពេលឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ ឆ្នាំ២០១៧

សេចក្តីថ្លែងការណ៍ បានគូសបញ្ជាក់ថា លក្ខខណ្ឌនៃសភាពហុបក្ស នៅតែបន្តក្នុងស្ថាប័ននីតិប្បញ្ញត្តិរបស់កម្ពុជា ហើយគ្មាននរណាម្នាក់ អាចនិយាយជាមុនបានថា ស្ថានភាពរបស់កម្ពុជា នាពេលអនាគត នឹងអាក្រក់ ឬល្អ ជាងស្ថានភាពពេលអតីតកាលឡើយ ដរាបណាគណបក្សចាស់ និងគណបក្សថ្មី ក្នុងសភាជាតិ យល់ច្បាស់អំពី “ប្រជាធិបតេយ្យពិតប្រាកដ” និងតម្កល់ឧត្តមប្រយោជន៍ជាតិខ្មែរជាចម្បង មិនឃុបឃិតជាមួយបរទេសខុសច្បាប់។

ពាក់ព័ន្ធនឹងវិទ្យាស្ថាន NDI ការបញ្ឈប់ការផ្សាយរបស់វិទ្យុ RFA និងវិទ្យុ VOA ព្រមទាំងកាសែត The Cambodia Daily ត្រូវបានសភាកម្ពុជា លើកឡើងថា ដោយសារតែស្ថាប័នទាំងនេះ បំពានច្បាប់នៅកម្ពុជា និងបញ្ឈប់សកម្មភាពខ្លួនឯង ដើម្បីគេចពីកាតព្វកិច្ចពន្ធដារ៕