បឹងកេត ស៊ុតតាមស្មើ Sanna Khanh Hoa BVN បួនដង ក្នុងជើងទី១ TMCC

2017-12-09 12:56:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ការប្រកួតជើងទី១ ពានរង្វាន់ Toyota Mekong Club Championship 2017 បានបញ្ចប់ទៅនៅទឹកដីប្រទេសវៀតណាម ដោយក្រុមភ្ញៀវបឹងកេត អាចរកគ្រាប់តាមស្មើរហូតដល់ ៤ដង រាល់ពេលដែលក្រុមម្ចាស់ផ្ទះ Sanna Khanh Hao BVN រកគ្រាប់នាំមុខ ដោយលទ្ធផលបញ្ចប់គឺ ៤-៤។ ក្នុងនោះ កីឡាករ ២នាក់ រកបានហ៊ែតទ្រីក (៣គ្រាប់) ដូចគ្នា។

គ្រាប់បាល់ដំបូង ក្នុងការប្រកួតនេះ កើតឡើងនៅនាទី៨ ដែលក្រុម Sanna Khanh Hoa BVN ស៊ុតបញ្ចូលដោយកីឡាករ Le Duy Thanh។ នៅ៦នាទីចុងក្រោយនៃតង់ទីមួយ ក្រុមទាំងពីរ រកបានម្នាក់១ គ្រាប់ ដោយ Maycon រកស៊ុតប៉េណាល់ទីតាមស្មើឲ្យបឹងកេត នៅនាទី៣៩ មុនកីឡាករ Toure Youssouf បន្ថែមគ្រាប់ទីពីរ ឲ្យក្រុមម្ចាស់ផ្ទះ។

គ្រាន់តែចាប់ផ្ដើមបាន ៣នាទីក្នុងតង់ទីពីរ Maycon ដដែលបានរកគ្រាប់តាមស្មើម្ដងទៀតឲ្យបឹងកេត។ ប៉ុន្តែ Toure Youssouf បានបន្ថែមគ្រាប់ទី៣ សម្រេចដោយការស៊ុតពីក្រៅប្រអប់ រំលងដៃ អ្នកចាំទី ស៊ូ យ៉ាទី។

Julius ដែលប្ដូរចូលក្នុងតង់ទីពីរ បានស៊ុតរកគ្រាប់ទី៣ នៅនាទី៨២ ឲ្យបឹងកេត តាមស្មើជាលើកទី៣ តែត្រឹម១នាទីក្រោយមក Toure Youssouf បានរកគ្រាប់ហ៊ែតទ្រីក និងជាគ្រាប់ទី៤ឲ្យ Sanna Khanh Hoa BVN។ គ្រាប់ចុងក្រោយ និងជាគ្រាប់ទី៤ របស់បឹងកេត ធ្វើបានដោយ Maycon និងជាគ្រាប់ហ៊ែតទ្រីករបស់គេផងដែរ នៅនាទី៨៧។

ការប្រកួតជើងទីពីរ នឹងធ្វើឡើងនៅថ្ងៃទី១៣ ខែធ្នូ ឆ្នាំ២០១៧ នៅពហុកីឡដ្ឋានជាតិ។ ក្រុមដែលឈ្នះ នឹងត្រូវឡើងទៅជួបក្រុម Lao Toyota របស់ឡាវ នៅវគ្គពាក់កណ្ដាលផ្តាច់ព្រ័ត្រ នៅទឹកដីប្រទេសឡាវ៕

អត្ថបទ៖ លាភ.