ក្នុងពេល១ខែ អ្នកនយោបាយនៅអាស៊ាន២រូប ត្រូវរឹបអូសទ្រព្យសម្បត្តិ

2018-02-27 08:58:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ត្រឹមរយៈពេលប្រហែល ៣០ថ្ងៃ បុគ្គលនយោបាយចំនួន ពីររូប នៅប្រទេសថៃ និង កម្ពុជា ត្រូវបានរឹបអូសទ្រព្យសម្បត្តិ ស្របពេលដែលកំពុងរស់នៅក្រៅប្រទេស។ បុគ្គលទាំងពីរមានដូចជា៖

លោកស្រី យីងឡាក់ ស៊ីណាវ៉ាត្រា

នាយកដ្ឋានអនុវត្តច្បាប់នៃក្រសួងយុត្តិធម៌ថៃ បានធ្វើការរឹបអូសទ្រព្យសម្បត្តិជាង ៣០ របស់លោកស្រី យីងឡាក់ ស៊ីណាវ៉ាត់ត្រា អតីតនាយករដ្ឋមន្ត្រីថៃ កាលពីចុងខែមករា ឆ្នាំ២០១៨ ក្នុងនោះ មានដូចជា ផ្ទះ ដី អាផាតមិន និងគណនីធនាគារមួយចំនួនដែលមានតម្លៃរាប់រយលានបាត។ ចំពោះផ្ទះរបស់លោកស្រី មានទីតាំងស្ថិតនៅក្រុងបាងកក និងមានតម្លៃប្រមាណជាង ៣លានដុល្លារអាមេរិក។ នេះជាការអះអាងពីមេធាវីរបស់លោកស្រី។

ទ្រព្យសម្បត្តិរបស់លោកស្រី យីងឡាក់ មួយចំនួននឹងត្រូវដាក់ដេញថ្លៃ ដើម្បីដោះស្រាយលើការខាតបង់នៃគម្រោងស្រូវអង្កររបស់លោកស្រី។ តាមសេចក្ដីរាយការណ៍ចុងក្រោយនេះ បានឲ្យដឹងថា លោកស្រីកំពុងស្នាក់នៅប្រទេសសិង្ហបុរី។

ថៃ រឹបអូស ទ្រព្យសម្បត្តិរបស់លោកស្រី យីងឡាក់

លោក សម រង្ស៊ី

សាលាដំបូងរាជធានីភ្នំពេញ បានចេញដីកាកាលពីថ្ងៃទី២៦ ខែកុម្ភៈ ឆ្នាំ២០១៨ សម្រេចរឹបអូសដី និងអគាររបស់លោក សម រង្ស៊ី អតីតប្រធានគណបក្សសង្គ្រោះជាតិ ជាបណ្ដោះអាសន្ន ដោយសារតែលោក សម រង្ស៊ី មិនបានបង់ប្រាក់សងជំងឺចិត្តនៅក្នុងសំណុំរឿងដែលប្ដឹងដោយសម្ដេចនាយករដ្ឋមន្ត្រី ហ៊ុន សែន និងសម្ដេច ហេង សំរិន ប្រធានរដ្ឋសភានៃព្រះរាជាណាចក្រកម្ពុជា ពាក់ព័ន្ធនឹងបទបរិហារកេរ្តិ៍។

ដីការបស់តុលាការកំពូលដដែលបានឲ្យដឹងទៀតថា ដើម្បីលុបចោលការអនុវត្តការរឹបអូសនេះ កូនបំណុលឈ្មោះ សម រង្ស៊ី ត្រូវតម្កល់ប្រាក់នៅសាលារាជធានីភ្នំពេញចំនួន ២,២៤ ពាន់លានរៀល ឬជាង ១លាន ៦០ម៉ឺនដុល្លារអាមេរិក៕