កម្ពុជា ស្វែងរកទីផ្សារម្រេចកំពត នៅប្រទេសស្វីស
- 2018-03-12 07:24:45
- ចំនួនមតិ 0 | ចំនួនចែករំលែក 0
កម្ពុជា ស្វែងរកទីផ្សារម្រេចកំពត នៅប្រទេសស្វីស
ចន្លោះមិនឃើញ
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានជួបពិភាក្សាជាមួយដៃគូពាក់ព័ន្ធ នៅប្រទេសស្វីស ដើម្បីពង្រីកការប្រើប្រាស់ និងស្វែងរកទីផ្សារនាំចេញម្រេចកំពត ឱ្យបានកាន់តែទូលំទូលាយថែមទៀត។ ការជួបពិភាក្សានោះ ធ្វើឡើងក្នុងឱកាសដែលលោក ប៉ាន សូរស័ក្តិ តម្កល់លិខិតុបករណ៍នៃការចូលជាសមាជិកច្បាប់ទីក្រុងហ្សឺណែវ ស្តីពីកិច្ចព្រមព្រៀងទីក្រុងលីស្បោន អំពីឈ្មោះប្រភពដើមទំនិញ និងម៉ាកសម្គាល់ភូមិសាស្ត្រទំនិញ នៅអង្គការកម្មសិទ្ធិបញ្ញាពិភពលោក កាលពីថ្ងៃទី១០ ខែមីនា។
កិច្ចពិភាក្សានោះ គឺដើម្បីបញ្ចុះបញ្ចូលឱ្យសមាគមផលិតករ LA MAISON DU GRUYÈRE បែរមកប្រើប្រាស់ម្រេចកំពត ទៅធ្វើជាធាតុផ្សំក្នុងការផលិតឈីសប្រភេទថ្មីរបស់សមាគម។ លោកបញ្ជាក់ថា បើម្រេចកំពត ត្រូវបានជ្រើសរើសជាធាតុផ្សំក្នុងការផលិតឈីសប្រភេទថ្មីបន្ថែមទៀតនោះ ទីផ្សារនាំចេញម្រេចកំពត នឹងកាន់តែធំធាត់ថែមទៀត ដែលនឹងចូលរួមចំណែកលើកស្ទូយដល់ការអភិវឌ្ឍសេដ្ឋកិច្ចជាតិ ឱ្យបានកាន់តែប្រសើរឡើងបានមួយកម្រិតទៀត ។
គូសបញ្ជាក់ថា សមាគមផលិតករ LA MAISON DU GRUYÈRE ទើបនឹងកែឆ្នៃបង្កើតផលិតផលឈីសប្រភេទថ្មី ដោយការប្រើប្រាស់ម្រេចជាធាតុផ្សំសំខាន់ ក្នុងការផលិតរបស់ខ្លួនដែលមានរសជាតិប្លែកថ្មីមួយ ដើម្បីផ្គត់ផ្គង់ទីផ្សារក្នុងស្រុក ក៏ដូចជាទីផ្សារអន្តរជាតិ ដែលអតិថិជនចង់បាន។
LA MAISON DU GRUYÈRE បានផលិតឈីសចេញពីទឹកដោះក្នុងបរិមាណ ២៩០០០តោន ក្នុងមួយឆ្នាំ ។ បច្ចេកទេសផលិតបានផ្ទេរពីជំនាន់មួយ ទៅជំនាន់មួយក្នុងស្រុក LA GRUYÈRE នៃសហព័ន្ធស្វីសឈីស ។ ផលិតផលឈីសឈ្មោះ LA GRUYÈRE មានលក្ខណៈពិសេស និងកិត្តិនាមល្បីល្បាញ ដែលអតិថិនជនទទួលស្គាល់ និងនិយមបរិភោគរហូតមក៕
ចុចអានអត្ថបទពាក់ព័ន្ធ៖
ម្រេចកំពត មាន៣ប្រភេទ នាំចេញទៅអឺរ៉ុប អាមេរិក ជប៉ុន និងចិន
ម្រេច នឹងកាន់តែមានទីផ្សារ នៅពេលកម្ពុជា ចូលជាសមាជិកសហគមន៍ម្រេចអន្តរជាតិ