រដ្ឋសភា អនុម័តសេចក្តីព្រាងច្បាប់ស្តីពី "ប្រាក់ឈ្នួលអប្បបរមា"

2018-06-07 03:15:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅព្រឹកថ្ងៃទី៧ ខែមិថុនា ឆ្នាំ២០១៨នេះ រដ្ឋសភាបានពិភាក្សា និងអនុម័តសេចក្តីព្រាងច្បាប់ស្តីពី "ប្រាក់ឈ្នួលអប្បបរមា" ដោយសំឡេង ១០៨ លើ ១០៩សំឡេង។

សម្តេច ហ៊ុន សែន លើកដៃអនុម័តសេចក្តីព្រាងច្បាប់ ក្នុងកិច្ចប្រជុំរដ្ឋសភា នាព្រឹកថ្ងៃទី៧ ខែមិថុនា ឆ្នាំ២០១៨ (រូបថត៖ FB សម្តេច ហ៊ុន សែន)

លោក ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌ បានថ្លែងថា សេចក្តីព្រាងច្បាប់ស្តីពីប្រាក់ឈ្នួលអប្បបរមា រួមមាន ៦ជំពូក ចែកចេញជា ៣០មាត្រា។ សេចក្តីព្រាងច្បាប់នេះបានរៀបចំឡើងត្រឹមត្រូវតាមប្បញ្ញតិ ដែលមានចែងក្នុងមាត្រា៩១ថ្មី នៃរដ្ឋធម្មនុញ្ញ និងប្រការ ២១ថ្មី នៃបទបញ្ជាផ្ទៃក្នុងរបស់រដ្ឋសភា។

លោកបញ្ជាក់ថា សេចក្តីព្រាងច្បាប់នេះ ត្រូវបានរៀបចំឡើងស្របតាមស្ថានភាពនៃវឌ្ឍនភាពផ្នែកសេដ្ឋកិច្ច សង្គម និងស្ថិតក្នុងបរិបទដែលប្រទេសក្នុងតំបន់កំពុងមានការប្រកួតប្រជែងកាន់តែខ្លាំងក្នុងវិស័យពាណិជ្ជកម្មអន្តរជាតិ។ ការគ្រប់គ្រងលើតម្លៃពាណិជ្ជកម្មដ៏សមស្របមួយ គឺជាចំណុចអាទិភាពដែលព្រះរាជាណាចក្រកម្ពុជា តែងតែផ្តោតការយកចិត្តទុកដាក់ខ្លាំងបំផុត។ ក្នុងន័យនេះ ការពង្រឹងយន្តការកំណត់ប្រាក់ឈ្នួលអប្បបរមាពិតជាមានសារៈសំខាន់ដើម្បីឆ្លើយតបនឹងស្ថានភាពសេដ្ឋកិច្ច និងសង្គមរបស់ប្រទេសជាតិ។

លោក ប៉ែន បញ្ញា បានបន្តថា សេចក្តីព្រាងច្បាប់ស្តីពីប្រាក់ឈ្នួលអប្បបរមា ធ្វើឡើងក្នុងគោលបំណងលើកកម្ពស់ជីវភាពរស់នៅសមរម្យ ថ្លៃថ្នូរ បង្កើតឱកាសការងារ និងបង្កើនផលិតភាពរបស់កម្មករនិយោជិត និងជំរុញឱ្យមានបរិយាកាសវិនិយោគ និងធុរកិច្ចកាន់តែល្អប្រសើរ ប្រកបដោយភាពទាក់ទាញ។

កម្មការិនីនៅរោងចក្រកាត់ដេរ១កន្លែង ក្នុងរាជធានីភ្នំពេញ

សូមជម្រាបថា ប្រាក់ខែគោលអប្បបរមាសម្រាប់កម្មករនៅឆ្នាំ២០១៨នេះគឺ ១៧០ដុល្លារ។ ក្នុងនោះ ១៦៥ដុល្លារ ជាប្រាក់ខែគោលដែលកំណត់ដោយគណៈកម្មការប្រឹក្សាការងារ និង៥ដុល្លារទៀត គឺជាការសម្រេចផ្តល់ឱ្យបន្ថែមដោយប្រមុខរាជរដ្ឋាភិបាល៕

អត្ថបទពាក់ព័ន្ធ៖