គីម ជុងអ៊ុន ពីការចាប់ដៃស្ងាត់ៗ ទៅការចាប់ដៃកក្រើកពិភពលោក

2018-06-14 09:35:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក គីម ជុងអ៊ុន ដែលបានក្ដាប់តំណែងមេដឹកនាំកំពូលកូរ៉េខាងជើង កាលពីចុងឆ្នាំ២០១១ គឺជាបុរសរដ្ឋម្នាក់ដែលធ្វើសហគមន៍អន្តរជាតិមានការព្រួយបារម្ភផង ភ័យខ្លាចផង រំភើបផង និងអបអរសាទរផង។ អារម្មណ៍ប្រែប្រួលទាំងនេះ ដោយសារកូរ៉េខាងជើង ពីមុន បានបាញ់សាកល្បងមីស៊ីលផ្ទួនៗគ្នាជាប្រចាំ និងអភិវឌ្ឍអាវុធនុយក្លេអ៊ែរ ដែលពេលខ្លះ ធ្វើឲ្យផ្ទុះ និងរញ្ជួយដីថែមទៀត។

លោក គីម ជុងអ៊ុន ពិនិត្យការផលិតគ្រាប់បែកអាតូមិក

ប៉ុន្តែបន្ទាប់ពីការទៅចាប់ដៃយ៉ាងស្ងាត់ៗជាមួយលោក ស៊ី ជីងពីង ប្រធានាធិបតីចិន ការចាប់ដៃដែលធ្វើឲ្យកក្រើកឧបទ្វីបកូរ៉េ និងទ្វីបអាស៊ីជាមួយលោក មូន ចេអ៊ីន ប្រធានាធិបតីកូរ៉េខាងត្បូង និងថ្មីៗនេះ គឺការចាប់ដៃដែលធ្វើឲ្យកក្រើកពិភពលោកជាមួយលោក ដូណាល់ ត្រាំ ប្រធានាធិបតីអាមេរិក ពេលនេះ ទាំងប្រជាជនកូរ៉េទាំងពីរ និងទាំងសហគមន៍អន្តរជាតិមានការរំភើប និងអបអរសាទរចំពោះការផ្លាស់ប្ដូរជំហររបស់កូរ៉េខាងជើង ដែលចង់រំលាយនុយក្លេអ៊ែរ និងកសាងសន្តិភាពនៅឧបទ្វីបកូរ៉េ។

លោក គីម ជុងអ៊ុន ចាប់ដៃជាមួយលោក ស៊ី ជីងពីង អំឡុងទស្សនកិច្ចនៅក្រុងប៉េកាំង

នៅចុងខែមីនា ឆ្នាំ២០១៨ មេដឹកនាំកូរ៉េខាងជើងវ័យ ៣៥ឆ្នាំរូបនេះ ត្រូវបានគេរាយការណ៍ថា បានធ្វើទស្សនកិច្ចមកកាន់ក្រុងប៉េកាំង ដើម្បីជួបពិភាក្សាជាមួយលោក ស៊ី ជីងពីង និងថ្នាក់ដឹកនាំចិនមួយចំនួនទៀត។ ប៉ុន្ដែទស្សនកិច្ចយ៉ាងសម្ងាត់របស់លោក គីម ជុងអ៊ុន មកប្រទេសចិន ត្រូវបានភាគីចិនចេញមកបញ្ជាក់នៅថ្ងៃទី២៨ ខែមីនា ២០១៨ គឺថ្ងៃដែលលោក គីម ជុងអ៊ុន បានចាកចេញទៅកូរ៉េខាងជើងវិញថា លោក គីម ពិតជាបានធ្វើទស្សនកិច្ចមកកាន់ប្រទេសចិនមែន ដោយមានរយៈពេល ៤ថ្ងៃ ពីថ្ងៃទី២៥ ដល់ ២៨ ខែមីនា ២០១៨។ ទស្សនកិច្ចរបស់លោក គីម ជុងអ៊ុន មកក្រុងប៉េកាំង នាពេលនោះ គឺធ្វើឡើងតាមរយៈរថភ្លើង តាំងពីក្រុងព្យុងយ៉ាង រហូតដល់មកដល់ប្រទេសចិន។

ហេតុអ្វីទស្សនកិច្ចរបស់ គីម ជុងអ៊ុន ទៅប្រទេសចិន ធ្វើឡើងយ៉ាងសម្ងាត់?

ចំណែកនៅថ្ងៃទៅ២៧ ខែមេសា ២០១៨ គឺជាថ្ងៃដែលប្រជាជនកូរ៉េទាំងពីរមានការរំភើប និងការសប្បាយយ៉ាងខ្លាំង ដោយសារការចាប់ដៃជាប្រវត្តិសាស្ត្ររវាងមេដឹកនាំរវាងប្រទេសកូរ៉េទាំងពីរ គឺលោក មូន ចេអ៊ីន និងលោក គីម ជុងអ៊ុន បានធ្វើឡើងភូមិ Panmunjom ដែលនៅក្នុងទឹកដីកូរ៉េខាងត្បូង ក្បែរព្រំដែនប្រទេសទាំងពីរ។ ក្រោយជំនួបចរចាគ្នាពេញមួយថ្ងៃ មេដឹកនាំទាំងពីរបានចុះហត្ថលេខាលើសេចក្តីប្រកាសរួមគ្នា ដែលហៅថា "សេចក្តីប្រកាស Panmunjom“។ កូរ៉េទាំងពីរ ប្រកាសលទ្ធផលផ្លូវការនៃកិច្ចប្រជុំជាប្រវត្តិសាស្រ្ត

លោក គីម ជុងអ៊ុន ចាប់ដៃជាមួយលោក មូន ចេអ៊ីន នៅផ្ទះសន្ដិភាព ក្នុងភូមិ Panmunjom ទឹកដីកូរ៉េខាងត្បូង

រីឯចុងក្រោយនេះ គឺការចាប់ដៃដែលមនុស្សស្ទើរគ្រប់គ្នាក្នុងពិភពលោកចង់ឃើញ និងជាការចាប់ដៃដែលធ្វើឲ្យកក្រើកពិភពលោកនោះ គឺការចាប់ដៃគ្នា និងការជួបចរចារវាងលោក គីម ជុងអ៊ុន និងលោក ដូណាល់ ត្រាំ នៅសិង្ហបុរី នាថ្ងៃទី១២ ខែមិថុនា ២០១៨ កន្លងទៅ។ ក្រោយការជួបចរចានេះ មេដឹកនាំទាំងពីរក៏បានចុះហត្ថលេខាលើឯកសាររួមគ្នាផងដែរ។ ជាមួយគ្នានេះ លោក ត្រាំ ក៏បានលើកឡើងថា ជំនួបរវាងអាមេរិក និងកូរ៉េខាងជើង បានធ្វើឲ្យពិភពលោកដេកលក់ស្រួល ដោយសារតែកូរ៉េខាងជើងបានប្ដេជ្ញារំលាយអាវុធនុយក្លេអ៊ែរហើយ។ ខ្លឹមសារ ៤ចំណុច ក្នុងឯកសារសំខាន់មួយដែលចុះហត្ថលេខាដោយ ដូណាល់ ត្រាំ និង គីម ជុងអ៊ុន

លោក គីម ជុងអ៊ុន ចាប់ដៃជាមួយលោក ដូណាល់ ត្រាំ អំឡុងជំនួបនៅសិង្ហបុរី

ទោះយ៉ាងណាក៏ដោយមកដល់ពេលនេះ ត្បិតតែកូរ៉េខាងជើងមានឆន្ទៈ និងប្ដេជ្ញារំលាយនុយក្លេអ៊ែរ តែវាត្រូវការរយៈពេលយូរ ដែលលោក Mike Pompeo រដ្ឋមន្រ្តីការបរទេសអាមេរិកថា វានឹងចំណាយពេលយ៉ាងតិច ២ឆ្នាំ ៦ខែ គឺរហូតដល់ដំណាច់ឆ្នាំ២០២០។ ងាកទៅអាមេរិកវិញ ត្បិតតែបានជួបចរចា និងចុះហត្ថលេខា ឈានដល់របត់ថ្មីមួយនៃទំនាក់ទំនងអាមេរិក និងកូរ៉េខាងជើងក៏ដោយ ក៏អាមេរិកមិនទាន់សម្រេចដកទណ្ឌកម្មណាមួយពីកូរ៉េខាងជើងនៅឡើយផងដែរ៕