កម្ពុជា វ៉ាដាច់តៃវ៉ាន់ ក្លាយជាប្រទេសនាំចេញកង់ដ៏ធំបំផុត ទៅកាន់ទីផ្សារ EU

2018-06-27 09:09:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហភាពអឺរ៉ុប (EU) ដែលមាន ២៨ប្រទេស បាននាំចូលកង់ប្រមាណ ៦,៨៤លានគ្រឿង ក្នុងឆ្នាំ២០១៧ ក្នុងនោះកម្ពុជា គឺជាអ្នកផ្គត់ផ្គង់ធំបំផុតទី១ ប្រមាណ ១,៤១លានគ្រឿង វ៉ាដាច់តៃវ៉ាន់ ដែលផ្គត់ផ្គង់បានប្រមាណ ១,៣១លានគ្រឿង ស្ថិតក្នុងលំដាប់ថ្នាក់ទី២។ នេះបើតាមរបាយការណ៍មួយដែលចេញផ្សាយ នៅលើវិបសាយ bike-eu កាលពីពេលថ្មីៗនេះ។

កាលពីឆ្នាំ២០១៦ តៃវ៉ាន់ គឺជាអ្នកនាំចេញកង់ធំបំផុត ទៅ EU ប្រមាណ ១,៥៥លានគ្រឿង ខណៈកម្ពុជា នាំចេញបានចំនួន ១,២៩លានគ្រឿង ស្ថិតនៅលំដាប់ទី២។ ដូច្នេះបើប្រៀបធៀបនឹងឆ្នាំ២០១៦ ការនាំចេញកង់របស់កម្ពុជា ទៅ EU ក្នុងឆ្នាំ២០១៧ គឺកើនឡើង ៨,៩៥% ឯការនាំចេញរបស់តៃវ៉ាន់ បានថយថុះ ១៥,៧%។

រូបភាពដែលបង្ហាញថា កង់នាំចូលទីផ្សារ EU គឺរួចពន្ធ (រូបថត៖ វិបសាយ bike-eu)

ក្រៅពីកម្ពុជា និងតៃវ៉ាន់ ប្រទេសដែលនាំចេញកង់ទៅ EU ច្រើនបន្ទាប់មានដូចជា៖ ហ្វីលីពីន ចំនួនជាង ៨៣ម៉ឺនគ្រឿង, បង់ក្លាដែស ជាង ៨០ម៉ឺនគ្រឿង, ចិន ជាង ៦៣ម៉ឺនគ្រឿង, ទុយណេស៊ី ជាង ៣៩ម៉ឺនគ្រឿង, ថៃ ជាង ៣២ម៉ឺនគ្រឿង, ឥណ្ឌា ជាង ៣០ម៉ឺនគ្រឿង ស្រីលង្កា ជាង ២៧ម៉ឺនគ្រឿង និងឥណ្ឌូណេស៊ី ជាង ១៨ម៉ឺនគ្រឿង។

របាយការណ៍ដដែលបញ្ជាក់ថា បើគិតពីតម្លៃនៃការនាំចូលកង់សរុបរបស់ EU ក្នុងឆ្នាំ២០១៧ គឺមានចំនួន ១,០៦ពាន់លានអឺរ៉ូ (ប្រមាណ ១,២៤ពាន់លានដុល្លារអាមេរិក)។ ក្នុងនោះតម្លៃកង់ក្នុង១គ្រឿង គឺ ១៥៥,៨៥អឺរ៉ូ (ប្រមាណ ១៨១,៣ដុល្លារអាមេរិក)។

បើតាមរបាយការណ៍ពីសភាពាណិជ្ជកម្មអឺរ៉ុបប្រចាំនៅកម្ពុជា បានបង្ហាញឲ្យដឹងថា កាលពីឆ្នាំ ២០១៧ កម្ពុជាបានផលិត និងដំឡើងកង់ នាំចេញទៅកាន់ទីផ្សារពិភពលោកចំនួនជាង ១,៨លានគ្រឿង គិតជាទឹកប្រាក់ស្មើនឹង ៣៦១លានដុល្លារ គឺបានកើនឡើង ២៩% បើធៀបនឹងឆ្នាំ២០១៦។ ទីផ្សារកង់របស់កម្ពុជារួមមាន EU អាមេរិក កាណាដា អាស៊ាន និងប្រទេសអាស៊ីផ្សេងទៀត។ តំបន់សេដ្ឋកិច្ចពិសេសក្រុងបាវិត ខេត្តស្វាយរៀង គឺជាទីតាំងផលិត និងដំឡើងកង់ធំបំផុតរបស់កម្ពុជា៕

អត្ថបទទាក់ទង៖

អត្ថបទ៖ សំភី