អ្នកជំនាញ បង្ហាញសញ្ញាវិជ្ជមានចំពោះតម្លៃដីនៅកម្ពុជា ទោះការបោះឆ្នោតខិតជិតមកដល់ក៏ដោយ

2018-07-06 03:31:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា (CVEA) បានបង្ហើបថា គ្មានសញ្ញាណាមួយដែលធ្វើឱ្យប៉ះពាល់ដល់តម្លៃ និងស្ថានភាពដីធ្លីនៅកម្ពុជានោះទេ បើទោះបីជាការបោះឆ្នោតជ្រើសរើសតំណាងរាស្ត្រអាណត្តិថ្មី ខិតជិតមកដល់ក៏ដោយ។ ការលើកឡើងនេះ ធ្វើឡើងក្នុងវេទិកាស្ដីពី “ការធ្វើអាជីវកម្មអចលទ្រព្យ ក្នុងប្រទេសកម្ពុជាក្នុងថ្ងៃអនាគត” កាលពីថ្ងៃទី៤ ខែកក្កដា ឆ្នាំ២០១៨ នៅមជ្ឈមណ្ឌលសហប្រតិបត្តិការកម្ពុជា-កូរ៉េ។

លោកបណ្ឌិត គីម ហ៊ាង បានបញ្ជាក់ថា ដរាបណាស្ថានភាពសន្តិសុខជាតិ និងនយោបាយនៅកម្ពុជា បន្តរក្សាស្ថានភាពល្អនោះ វិស័យដីធ្លីគ្មានថ្ងៃជាប់គាំងឬធ្លាក់ចុះឡើយ មានតែបន្ដឡើងថ្លៃជារៀងរហូត។ ចំពោះព័ត៌មានចចាមអារាម ឬរឿងបញ្ហាដីធ្លីនឹងប្រែប្រួលនោះ លោកអះអាងថា គឺគ្មានឡើយ ហើយអ្វីដែលប្រជាពលរដ្ឋគិតគូរនោះ គឺការផ្លាស់ប្ដូររបបនយោបាយ ដែលធ្វើឲ្យវិស័យនេះជួបបញ្ហាទៅវិញបានត្រឹមត្រូវ។

លោកបណ្ឌិត គីម ហ៊ាង ថ្លែងក្នុងបទសម្ភាសមួយជាមួយអ្នកសារព័ត៌មាន នាពេលកន្លងមក

អ្នកជំនាញអចលទ្រព្យរូបនេះ បានពន្យល់បន្ថែមថា ក្នុងប្រទេសដែលរីកចម្រើនមាន GDP (ចំណូលប្រចាំឆ្នាំសម្រាប់មនុស្សម្នាក់) លើសពី២ម៉ឺនដុល្លារឡើងទៅ មានប្រជាជន៩៥% បញ្ចប់មហាវិទ្យាល័យ ត្រូវបានចាត់ទុកថាជាប្រទេសអភិវឌ្ឍន៍ ដែលសេដ្ឋកិច្ចដឹកនាំនយោបាយ ហើយក្នុងប្រទេសដែលកំពុងអភិវឌ្ឍន៍ ជាប្រទេសដែលនយោបាយដឹកនាំសេដ្ឋកិច្ច ជាស្ដែងដូចក្នុងប្រទេសកម្ពុជា ប្រសិនបើមានការផ្លាស់ប្ដូរនយោបាយ ទើបជារឿងមួយដែលគួរឲ្យបារម្ភ តែប្រទេសកម្ពុជា ជាប្រទេស ដែលមានស្ថិរភាពនយោបាយរឹងមាំល្អ។

លោក គីម ហ៊ាង បានបញ្ជាក់ថា ជាក់ស្ដែងដូចឆ្នាំនេះ ជានីតិកាលទី៦ នៃការបោះឆ្នោត តែគ្មានចំណុចណាមួយ ដែលគួរឲ្យព្រួយរម្ភលើវិស័យអចលវត្ថុនោះឡើយ។ លំនឹងនយោបាយល្អនេះហើយ ដែលធ្វើឲ្យបរទេសនាំគ្នាមកវិនិយោគក្នុងប្រទេសកម្ពុជា ព្រោះប្រទេសណា ដែលមានលំនឹងនយោបាយល្អ នោះគេនឹងមកវិនិយោគច្រើនឡើងៗ។

ទិដ្ឋភាពអគារ ៤២ជាន់ និងអគារនានា ក្នុងរាជធានីភ្នំពេញ

សូមរំលឹកថា កន្លងមកនេះ មានព័ត៌មាននិងការលើកឡើងច្រើនពាក់ព័ន្ធ នឹងការធ្លាក់ចុះ ឬជាប់គាំលើវិស័យដីធ្លី ព្រោះថា ឆ្នាំនេះជាឆ្នាំបោះឆ្នោតជ្រើសតាំងតំណាងរាស្ដ្រ ប៉ុន្តែ លោកឧកញ៉ា ចេង ខេង ប្រធានក្រុមប្រឹក្សាភិបាលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានធ្លាប់ប្រកាសម្តងហើយថា រហូតមកដល់ពេលនេះ មិនមានសញ្ញាណាមួយបង្ហាញពីការប្រែប្រួលទៅលើតម្លៃ នៃអចលវត្ថុនោះឡើយ ទោះបីការបោះឆ្នោតជ្រើសរើសតំណាងរាស្ដ្រ នីតិកាលទី៦ ត្រៀមខិតជិតមកដល់នាពេលខាងមុខនេះក៏ដោយ៕

ចុចអានអត្ថបទដែលពាក់ព័ន្ធនឹងការលើកឡើងរបស់លោក គីម ហ៊ាង៖

ប្រភព៖ រស្មីកម្ពុជា ប្រែសម្រួល៖ សំភី