លោក ត្រាំ និងក្លឹប Man Utd បញ្ចេញប្រតិកម្ម ក្រោយក្មេង ១៣នាក់ត្រូវរដោះចេញពីល្អាងថាមហ្លួង

2018-07-10 23:53:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រោយក្មេងប្រុស ១២នាក់ និងគ្រូបង្វឹកម្នាក់ត្រូវបានរំដោះចេញពីល្អាងថាមហ្លួង ដែលនៅក្នុងខេត្តឈៀងរ៉ៃ ភាគខាងជើងប្រទេសថៃ ដោយជោគជ័យ មានមេដឹកនាំពិភពលោក និងក្លឹបបាល់ទាត់ជាច្រើនបានបញ្ចេញប្រតិកម្មអបអរសាទរ និងរួមទាំងបានអញ្ជើញក្មេងទាំង ១៣នាក់នោះ ទៅធ្វើទស្សនកិច្ចនៅក្លឹបរបស់ពួកគេទៀតផង។

ក្មេងៗដែលបាត់ខ្លួនក្នុងល្អាងភ្នំថាមហ្លួង

លោក ដូណាល់ ត្រាំ ប្រធានាធិបតីអាមេរិកបានលើកឡើងតាមរយៈ Twitter របស់លោកថា ក្នុងនាមសហរដ្ឋអាមេរិក សូមអបអរសាទរចំពោះកងទ័ពជើងទឹកថៃ SEAL និងអ្នកពាក់ព័ន្ធទាំងអស់ ដែលបានជួយសង្រ្គោះក្មេងប្រុស ១២នាក់ និងគ្រូបង្វឹករបស់ពួកគេដោយជោគជ័យ ចេញពីល្អាងថាមហ្លួង។ លោក ត្រាំ ថា ក្រុមអ្នកជួយសង្រ្គោះពិតជាធ្វើការបានអស្ចារ្យណាស់។

លោក ដូណាល់ ត្រាំ ប្រធានាធិបតីអាមេរិក (រូបភាព៖ Reuters)

ដូចគ្នានឹងលោក ត្រាំ ដែរ ក្លឹបបិសាចក្រហម Manchester United បានសម្ដែងការអបអរសាទរ ដែលក្មេងប្រុស ១២នាក់ និងគ្រូបង្វឹកម្នាក់ ត្រូវបានជួយសង្រ្គោះដោយជោគជ័យ។ ប៉ុន្ដែអ្វីដែលពិសេសជាងនេះ គឺ Manchester United បានអញ្ជើញក្មេងប្រុសទាំង ១២នាក់ និងគ្រូបង្វឹកម្នាក់នោះ ទៅធ្វើទស្សនកិច្ចនៅកីឡដ្ឋាន Old Trafford របស់គេ នៅរដូវកាលខាងមុខនេះ។

កីឡដ្ឋាន Old Trafford របស់ក្លឹប Manchester United

សូមបញ្ជាក់ថា ក្មេងៗទាំង ១២នាក់នោះ មានអាយុចន្លោះពី ១១ ដល់ ១៦ឆ្នាំ រីឯគ្រូបង្វឹករបស់ពួកគេ មានវ័យ២៥ឆ្នាំ។ ពួកគេ បានបាត់ខ្លួននៅក្នុងល្អាងភ្នំថាមហ្លួង ដែលស្ថិតនៅក្នុងភាគខាងជើងខេត្តឈៀងរ៉ៃ កាលពីល្ងាចថ្ងៃសៅរ៍ ទី២៣ ខែមិថុនា ឆ្នាំ២០១៨។ ក្រុមអ្នកជួយសង្គ្រោះដែលមានទាំង ថៃ និងបរទេស បានរកឃើញពួកគេវិញ នៅយប់ថ្ងៃទី២ ខែកក្កដា ឆ្នាំ២០១៨៕

អត្ថបទទាក់ទង ទីបំផុត ក្មេងៗទាំង ១៣នាក់ ត្រូវបានរំដោះចេញពីល្អាងហើយ!

ប្រភព៖ Bangkokpost ប្រែសម្រួល៖ វាសនា