ក្រុមហ៊ុនកូរ៉េខាងត្បូង រកឃើញកំហូចមួយមុនការបាក់វារីអគ្គិសនីឡាវ

2018-07-25 04:03:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុន SK Engineering & Construction ដែលជាក្រុមហ៊ុនមួយរបស់កូរ៉េខាងត្បូងសហការសាងសង់ទំនប់វារីអគ្គិសនី Xe-Namnoy បានបញ្ជាក់ថា ក្រុមហ៊ុនបានរកឃើញការខូចខាតមួយនៅផ្នែកខាងលើនៃសំណង់វារីអគ្គិសនី រយៈពេល ២៤ម៉ោង មុនទំនប់វារីអគ្គិសនីដែលបានបាក់នៅយប់ថ្ងៃទី២៣ ខែកក្កដា ឆ្នាំ២០១៨។ នេះបើតាមសេចក្តីប្រកាសព័ត៌មានរបស់ក្រុមហ៊ុន SK Engineering & Construction។

អ្នកភូមិដែលរស់នៅផ្នែកខាងក្រោមទំនប់វារីអគ្គិសនី Xe-Namnoy ត្រូវបានអាជ្ញាធរឡាវជម្លៀសទៅកាន់កន្លែងសុវត្ថិភាព (រូបភាព៖ Reuters)

ក្នុងសេចក្តីប្រកាសព័ត៌មានដដែលនេះ បានបញ្ជាក់ថា ក្រុមហ៊ុនបានជូនដំណឹងភ្លាមៗទៅកាន់អាជ្ញាធរឡាវ ដើម្បីចាប់ផ្ដើមជម្លៀសប្រជាជនចេញពីផ្នែកខាងក្រោមនៃទំនប់វារីអគ្គិសនី។ ប៉ុន្ដែការងារជួសជុលកំហូចបានជួបឧបសគ្គដោយសារភ្លៀងធ្លាក់ខ្លាំង ហើយផ្លូវត្រូវបានខូច។ បន្ទាប់មកទៀត ក្រុមហ៊ុនបានបើកទ្វារទឹកវារីអគ្គិសនី ដើម្បីបន្ថយសម្ពាធទឹកលើទំនប់វារីអគ្គិសនី។

ចំណែករដ្ឋាភិបាលឡាវវិញ នៅរសៀលថ្ងៃទី២៣ ខែកក្កដា ២០១៨ បានព្រមានពីការខូចខាតបន្ថែមទៀតលើទំនប់វារីអគ្គិសនី ហើយឲ្យអាជ្ញាធរជម្លៀសប្រជាពលរដ្ឋឡាវចេញពីតំបន់ផ្នែកខាងក្រោម។ ប្រមាណ ២ ឬ៣ម៉ោងក្រោយការព្រមាន សំណង់វារីអគ្គិសនីបានបាក់នៅយប់ថ្ងៃទី២៣ ខែកក្កដា ២០១៨។

ក្រុមហ៊ុនកូរ៉េខាងត្បូងបានបញ្ជាក់ថា ក្រុមហ៊ុនបានបញ្ជូនក្រុមជួយសង្រ្គោះទៅតំបន់ជន់លិចហើយ ដែលក្នុងនោះ ក៏មាន ឧទ្ធម្ភាគចក្រ ទូកជាច្រើនផងដែរ។

សូមបញ្ជាក់ថា គម្រោងទំនប់វារីអគ្គិសនីនេះ ត្រូវបានប៉ាន់ស្មានថា មានទំហំទឹកប្រាក់ ១ពាន់លានដុល្លារ ដែលត្រូវសាងសង់ដោយក្រុមហ៊ុន Xe Pien-Xe Namnoy Power Company ដែលជាការវិនិយោគរួមគ្នា រវាងក្រុមហ៊ុនកូរ៉េខាងត្បូង និងក្រុមហ៊ុនឡាវ។ ទំនប់វារីអគ្គិសនីនេះ ត្រូវបានសាងសង់នៅឆ្នាំ២០១៣ និងគ្រោងបញ្ចប់នៅត្រឹមចុងឆ្នាំ២០១៨នេះ៕

អត្ថបទទាក់ទង៖

អត្ថបទ៖ វាសនា