ផ្លូវជាតិលេខ៤៨ ទៅកោះកុង នឹងត្រូវជួសជុលឱ្យបានរួចរាល់ មុនបុណ្យសមុទ្រ

2018-09-26 07:35:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានប្តេជ្ញាថា នឹងជួសជុលផ្លូវជាតិលេខ៤៨ ពីស្រែអំបិល ទៅកោះកុង ឱ្យបានរួចរាល់នៅមុនពិធីបុណ្យសមុទ្រ ដែលធ្វើឡើងនៅខែធ្នូខាងមុខនេះ។ លោកថ្លែងដូច្នេះ ទៅកាន់អ្នកសារព័ត៌មាន នៅស្ថានីយរថភ្លើងរមាស ស្រុកទឹកផុស ខេត្តកំពង់ឆ្នាំង នាព្រឹកថ្ងៃទី២៦ ខែកញ្ញា ឆ្នាំ២០១៨ ក្នុងពេលលោកដឹកនាំអ្នកស្រុកកោះធំ ជិះរថភ្លើង។

ចំពោះការជួសជុលផ្លូវជាតិលេខ៤៨នេះ លោក ស៊ុន ចាន់ថុល បានបញ្ជាក់ថា នឹងចាប់ផ្តើមភ្លាមជាបន្ទាន់ ក្រោយចប់រដូវភ្លៀង ដោយក្រសួងបានរៀបចំក្រុម ចំនួន៦ក្រុម និងគ្រឿងចក្ររួចជាស្រេច ហើយគ្រោងនឹងសម្រុកធ្វើទាំងថ្ងៃទាំងយប់ផងដែរ។

ផ្លូវជាតិលេខ៤៨ ថតពីលើអាកាស កាលពីថ្ងៃទី២៣សីហា ២០១៨។ រូបថត៖ FB ក្រសួងសាធារណការ

បើតាមការលើកឡើងរបស់រដ្ឋមន្រ្តីរូបនេះ កាលពីខែសីហា ឆ្នាំ២០១៨ រាជរដ្ឋាភិបាលកម្ពុជា នឹងចំណាយថវិកាប្រមាណ ៧៥លានដុល្លារ សម្រាប់លើកកម្ពស់ផ្លូវជាតិលេខ៤៨ ទៅជាប្រភេទបេតុងកៅស៊ូ (AC) ក្នុងពេលឆាប់ៗនេះ។ ក្នុងនោះ ៦៧លានដុល្លារ ជាកម្ចីរបស់សាធារណរដ្ឋកូរ៉េ និង៨ដុល្លារ ជាថវិកាបដិភាពរបស់រាជរដ្ឋាភិបាលកម្ពុជា។

យោងតាមរបាយការណ៍របស់នាយកដ្ឋានផ្លូវថ្នល់ កាលពីខែសីហា បង្ហាញថា ទំហំនៃការខូចខាតផ្លូវជាតិលេខ៤៨ ពីស្រុកស្រែអំបិល ទៅខេត្តកោះកុង មានប្រវែងសរុប ៣៥,៥៤ គីឡូម៉ែត្រ លើប្រវែងសរុប ១៥៩,៦០គីឡូម៉ែត្រ ស្មើនឹង២២,២៦%។ របាយការណ៍នេះ លើកឡើងថា ការខូចខាតនេះ ដោយសារតែផ្លូវនេះ ហួសរយៈពេលធានាគុណភាព ហើយទំហំចរាចរណ៍មានការកើនឡើង និងជាពិសេសគឺការដឹកជញ្ជូនសម្ភារសំណង់ទៅមកខេត្តព្រះសីហនុ។

សូមបញ្ជាក់ដែរថា បុណ្យសមុទ្រឆ្នាំ២០១៨ នឹងត្រូវប្រារព្ធឡើងនៅក្នុងខេត្តកោះកុង ចាប់ពីថ្ងៃទី១៤ ដល់ថ្ងៃទី១៦ ខែធ្នូ។ វាជាឆ្នាំទី៧ហើយនៃការរៀបចំបុណ្យសមុទ្រ និងជាជុំទី២ សម្រាប់ខេត្តកោះកុងក្នុងការធ្វើជាម្ចាស់ផ្ទះ បន្ទាប់ពីការធ្វើលើកទី១នៅឆ្នាំ២០១៤៕

អត្ថបទទាក់ទង៖

អត្ថបទ៖ សំភី