អាមេរិក និងចិន ឯកភាពគ្នាថា នឹងមិនដំឡើងពន្ធនាំចូលដាក់គ្នាទៀតឡើយ

2018-12-02 03:08:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហរដ្ឋអាមេរិក និងចិន កាលពីថ្ងៃទី១ ខែធ្នូ ឆ្នាំ២០១៨ បានឯកភាពគ្នាថា នឹងមិនដំឡើងពន្ធលើទំនិញនាំចូលគ្នាទៀតឡើយ ចាប់ពីថ្ងៃទី១ ខែមករា ឆ្នាំ២០១៩តទៅ ហើយកិច្ចចរចានេះ នឹងធ្វើឡើងបន្តទៀត។ ការឯកភាពគ្នានេះ ធ្វើឡើងក្នុងជំនួបរវាងប្រធានាធិបតីអាមេរិក លោក ដូណាល់ ត្រាំ និងប្រធានាធិបតីចិន លោក ស៊ី ជិនពីង ក្រោយកិច្ចប្រជុំកំពូល G20 នៅប្រទេសអាហ្សង់ទីន។

ការយល់ព្រមរវាងគ្នានេះ ធ្វើឡើងបន្ទាប់ពីប្រទេសទាំង២ បានចាប់ផ្តើមអនុវត្តដំឡើងពន្ធលើទំនិញនាំចូលគ្នាទៅវិញទៅមក ចាប់តាំងពីខែកក្កដា ឆ្នាំ២០១៨មក ដែលត្រូវបានគេហៅថាជា "សង្គ្រាមពាណិជ្ជកម្ម"។

លោក ដូណាល់ ត្រាំ បានប្រាប់លោក ស៊ី ជិនពីង នៅក្នុងជំនួបនោះថា លោកសង្ឃឹមថា ភាគីទាំង២ នឹងសម្រចបានជោគជ័យចំពោះពាណិជ្ជកម្មសម្រាប់ប្រទេសទាំង២។ លោក ត្រាំ ថាទំនាក់ទំនងដែលមិនគួរឱ្យជឿ រវាងលោក និងលោកស៊ី ជិនពីង ដែលបានបង្កើតឡើងនោះ នឹងក្លាយជាមូលហេតុដ៏ចម្បង សម្រាប់ដំណើរការពាណិជ្ជកម្មរវាងប្រទេសទាំង២។

ជំនួបអាហារពេលល្ងាចរវាងលោក ស៊ី ជិនពីង និងលោក ដូណាល់ ត្រាំ ក្រោយកិច្ចប្រជុំកំពូល G20 នៅប្រទេសអាហ្សង់ទីន កាលពីថ្ងៃទី១ ធ្នូ ២០១៨។ រូបថត៖ NYTIMES

ជាមួយគ្នានោះ លោក ស៊ី ជិនពីង បានប្រាប់លោក ត្រាំ វិញថា មានតែកិច្ចសហប្រតិបត្តិការតែមួយគត់ ដែលអាចឱ្យអាមេរិក និងចិន ទទួលបានផលប្រយោជន៍ពីសន្តិភាព និងវិបុលភាព។ លោកថា ក្រុងវ៉ាស៊ីងតោន និងប៉េកាំង ក៏កាន់តែមានតួនាទីសំខាន់ ចំពោះសន្តិសុខនៅក្នុងតំបន់អាស៊ីប៉ាស៊ីហ្វិកផងដែរ។

គួរកត់សម្គាល់ដែរថា នៅចុងបញ្ចប់នៃកិច្ចប្រជុំកំពូល G20 នេះ បណ្តាមេដឹកនាំទាំងអស់ដែលចូលរួម បានព្រមព្រៀងគ្នាចេញសេចក្តីថ្លែងការណ៍រួម។ ពោលគឺខុសពីកិច្ចប្រជុំកំពូលសហប្រតិបត្តិការសេដ្ឋកិច្ចអាស៊ីប៉ាហ្វិក (APEC) ធ្វើឡើងកាលពីថ្ងៃទី១៨-១៨វិច្ឆិកា ឆ្នាំ២០១៨ នៅប៉ាពូញ៊ូវហ្គីណេ ដែលមេដឹកនាំទាំងអស់ បានបរាជ័យក្នុងការឯកភាពគ្នាចេញសេចក្តីថ្លែងការណ៍រួមជាលើកដំបូង ដោយសារតែភាពមិនត្រូវគ្នារវាង អាមេរិក និងចិន ជុំវិញបញ្ហាពាណិជ្ជកម្ម៕

អត្ថបទទាក់ទង៖

ប្រភព៖ BBC ប្រែសម្រួល៖ សំភី