អ្នកនាំពាក្យរាជរដ្ឋាភិបាល៖ កម្ពុជាពុំមានឧបសគ្គក្នុងការបង់ពន្ធអង្ករទៅ EU ទេ

2019-01-16 06:23:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានប្រាប់ឲ្យដឹងថា កម្ពុជាពុំមានអ្វីទើសទាល់ទេ ចំពោះការយកពន្ធនាំចូលអង្ករពីកម្ពុជា ទៅក្នុងសហភាពអឺរ៉ុប។ លោកថា កម្ពុជាក៏អាចមានលទ្ធភាពក្នុងការចាត់ចែងបង់ពន្ធបាន ម្យ៉ាងកម្ពុជាក៏មិនចង់នៅតែជាប្រទេសមួយដែលត្រូវបានគេចិញ្ចឹមរហូតនោះទេ។

លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា

លោក ផៃ ស៊ីផាន បញ្ជាក់ថា ទាក់ទងនឹងបញ្ហានេះ សហភាពអឺរ៉ុបនឹងមិនយកពន្ធដោយគំហុកទេ។ កម្ពុជា នឹងមានការចរចាជាមួយសហភាពអឺរ៉ុប ដើម្បីរកចំណុចរួមមួយ ដែលសមរម្យស្របតាមខ្សែបន្ទាត់នៃចំណូលរបស់កម្ពុជា ក្នុងកម្រិតល្មមដែលកម្ពុជាអាចដោះស្រាយបាន។

លោកសង្កត់ធ្ងន់ថា បច្ចុប្បន្ន កម្ពុជាកំពុងពិភាក្សាគ្នាបន្តបន្ទាប់ ដើម្បីរកចំណុចរួមមួយនៃចំនួនពន្ធ ដែលកម្ពុជាអាចបង់ពន្ធទៅឲ្យសហភាពអឺរ៉ុប។

គួររំឭកថា យោងតាមការចុះផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី១៤ ខែមករា បញ្ជាក់ថា សហភាពអឺរ៉ុប គ្រោងអនុវត្តពន្ធនាំចូលអង្ករពីកម្ពុជា ដើម្បីការពារតម្លៃផលិតអង្ករក្នុងតំបន់។ គណៈកម្មការអឺរ៉ុប អាចនឹងធ្វើការប្រកាសពីការចាប់ផ្ដើមយកពន្ធនាំចូលអង្ករពីកម្ពុជា នៅថ្ងៃសុក្រ ទី១៨ ខែមករា ឆ្នាំ២០១៩ ប្រសិនបើគ្មានការជំទាស់ពី ភាគីពាក់ព័ន្ធទេនោះ៕

អត្ថបទទាក់ទង EU គ្រោងអនុវត្តពន្ធនាំចូល អង្ករកម្ពុជា ក្នុងសប្ដាហ៍នេះ

ប្រភព៖ Vayo Fm ប្រែសម្រួល៖ លាភ.