ក្រុមវៀតណាម ទទួលបានប្រាក់ប៉ុន្មានហើយ ក្រោយឈានដល់វគ្គ ៨ក្រុម AFC Asian Cup?

2019-01-22 03:54:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមបាល់ទាត់ជម្រើសជាតិវៀតណាម បានទទួលប្រាក់សរុបប្រមាណ ១២ពាន់លានដុង ឬ ៥២,២ម៉ឺនដុល្លារអាមេរិក ពីការលេងដ៏ល្អនៅក្នុងការប្រកួតពានរង្វាន់ AFC Asian Cup 2019 នៅអារ៉ាប់រួម ពោលគឺបានឈានដល់វគ្គ ៨ក្រុមចុងក្រោយ។ នេះបើតាមការចុះផ្សាយរបស់ Vietnam News កាលពីថ្ងៃទី២១ ខែមករា ឆ្នាំ២០១៩។

កាលពីយប់ថ្ងៃអាទិត្យកន្លងទៅ នៅវគ្គ១៦ក្រុមចុងក្រោយ វៀតណាម បានយកឈ្នះហ្សកដានី ក្នុងវគ្គប៉េណាល់ទីកាត់សេចក្តី ១១ម៉ែត្រ ដោយលទ្ធផល ៤-២ បន្ទាប់ពីចប់ ៩០នាទី បានត្រឹមស្មើ ១-១។

កីឡាករវៀតណាម រត់អបអរ ក្រោយជ័យជម្នះលើហ្សកដានី (រូបភាពផ្ដល់សិទ្ធិដោយ Reuters)

ជាមួយនឹងជ័យជម្នះនេះ ក្រុមជម្រើសជាតិវៀតណាម នឹងទទួលបានប្រាក់រង្វាន់ប្រមាណ ៣០,៤ម៉ឺនដុល្លារ ពីក្រសួងវប្បធម៌ កីឡា និងទេសចរណ៍វៀតណាម, ធនាគារក្នុងស្រុកចំនួន៥ និងក្រុមហ៊ុនមួយផ្សេងទៀត។

វៀតណាម បានទទួលរួចមកហើយនូវទឹកប្រាក់ ៦,៥២ម៉ឺនដុល្លារ ពីការប្រកួតក្នុងវគ្គជម្រុះនៃពានរង្វាន់នេះ។ ក្នុងនោះ ៤,៣៥ម៉ឺនដុល្លារ ទទួលបានពីសហព័ន្ធបាល់ទាត់វៀតណាម (VFF) និង ២,១៧ម៉ឺនដុល្លារ ពីសមាជិកមួយនៃ VFF។

ចំពោះក្រុមដែលបានឈានទៅដល់វគ្គ ៨ក្រុមចុងក្រោយ ដោយរួមមានទាំងក្រុមវៀតណាមនេះផង នឹងទទួលបានទឹកប្រាក់ ២០ម៉ឺនដុល្លារ ហើយបើឈានដល់វគ្គពាក់កណ្តាលផ្តាច់ព្រ័ត្រទៀតនឹងទទួលបាន ១លានដុល្លារ។

សូមបញ្ជាក់ថា វៀតណាម នឹងប៉ះជប៉ុន នៅវគ្គ៨ក្រុមចុងក្រោយ នៅយប់ថ្ងៃទី២៤ ខែមករា ឆ្នាំ២០១៩ខាងមុខនេះ៕

អត្ថបទទាក់ទង៖

ប្រភព៖ Vietnam News ប្រែសម្រួល៖ សំភី