ពូទីន ព្រមាន​រដ្ឋបាល​លោក ត្រាំ​ កុំឲ្យ​លូក​ដៃ​រឿង វេណេហ្ស៊ុយអេឡា

  • 2019-01-25 06:14:38
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ប្រទេស​រុស្ស៊ី បាន​ធ្វើការ​ព្រមាន​ចំពោះ​សហរដ្ឋអាមេរិក ពី​ការ​លូក​ដៃ​ចូល​ក្នុង​វិបត្តិ​ផ្ទៃ​ក្នុង​ប្រទេស​វេណេហ្ស៊ុយអេឡា បន្ទាប់​ពី​ក្រុង​វ៉ាស៊ីនតោន ប្រកាស​ទទួល​ស្គាល់​មេដឹកនាំ​បក្ស​ប្រឆាំង​នៅ​វេណេហ្ស៊ុយអេឡា លោក Juan Guaido ជា​ប្រធានាធិបតី​ស្រប​ច្បាប់​។

យោង​តាម​សេចក្ដី​ថ្លែងការណ៍​មួយ​របស់​វិមាន​ក្រឹមឡាង បាន​ឲ្យដឹង​ថា លោក វ៉ាឌឺមៀ ពូទីន ប្រធានាធិបតី​រុស្ស៊ី បាន​ទូរសព្ទ​ទៅ​កាន់​លោក Nicolas Maduro ប្រធានាធិបតី​វេណេ​ហ្ស៊ុយ​អេឡា​ថា៖ «ការ​លូកដៃ​ផ្ទៃ​ក្នុង​ដែល​អាច​បង្ក​ការ​ហិនហោច ជា​ការ​រំលោភ​ជា​ទម្ងន់​ទៅលើ​មូលដ្ឋាន​នៃ​ច្បាប់​អន្តរជាតិ​»។

លោក Nicolas Maduro និង លោក ពូទីន ចាប់ដៃគ្នា (រូបថត៖ AP)
រុស្ស៊ី បាន​ចាត់​ទុក​កម្លាំង​ខាង​ក្រៅ​នានា ដែល​ដឹកនាំ​ដោយ​អាមេរិក នឹង​បង្ក​ភាព​ច្របូកច្របល់​កាន់តែ​ខ្លាំង នៅ​វេណេហ្ស៊ុយអេឡា​។ ជាពិសេស ការ​គាំទ្រ​បក្សប្រឆាំង ដែល​ជា​ភាព​មិន​ស្របច្បាប់​ក្នុង​ការ​ដណ្ដើម​អំណាច​។

អាមេរិក បាន​ផ្ដល់​ទឹកប្រាក់​ចំនួន ២០លានដុល្លារ​ ជា​ជំនួយ​អាសន្ន សម្រាប់​មេបក្ស​ប្រឆាំង​លោក Guaido និង​បាន​ស្នើ​ឲ្យ​មាន​កិច្ច​ប្រជុំ​បន្ទាន់​មួយ នៅ​ក្រុម​ប្រឹក្សា​សន្តិសុខ​នៃ​អង្គការ​សហ​ប្រជា​ជាតិ នៅ​ថ្ងៃ​សៅរ៍​ ទី២៦ ខែ​មករា ឆ្នាំ​២០១៩ លើ​វិបត្តិ​វេណេហ្ស៊ុយអេឡា។

លោក ត្រាំ និង​មេ​បក្ស​ប្រឆាំងនៅវេណេហ្ស៊ុយអេឡា Juan Guaido

មេ​បក្ស​ប្រឆាំង Juan Guaido បាន​ប្រកាស​ខ្លួន​ជា​ប្រធានាធិបតី​វេណេហ្ស៊ុយអេឡា កាល​ពី​ថ្ងៃ​ទី​២៣ ខែ​មករា។ ក្រោយ​សហរដ្ឋ​អាមេរិក​បាន​ទទួល​ស្គាល់​លោក Guaido មេដឹកនាំ Maduro បាន​បណ្ដេញ​មន្ត្រី​ទូត​អាមេរិក​ទាំងអស់​ ចេញ​ពី​ប្រទេស និង​ទុក​ពេល​ឲ្យ ៧២​ម៉ោង​។ លោក Maduro ក៏​បាន​បញ្ជា​ឲ្យ​មន្ត្រី​ទូត​វេណេហ្ស៊ុយអេឡា​ប្រចាំ​​នៅ​ក្រុង​វ៉ាស៊ីនតោន ដក​ខ្លួន​ចេញ​ពី​អាមេរិក និង​បញ្ជា​ឲ្យ​បិទ​ស្ថាន​ទូត​ផងដែរ​៕

អត្ថបទទាក់ទង

ប្រភព៖ nytimes | ABC.net ប្រែ​សម្រួល៖ លាភ.

អត្ថបទថ្មី
;