រដ្ឋបាលលោក ត្រាំ គ្រោងបញ្ជូនកងទ័ព ៥ពាន់នាក់ទៅប្រទេសនៅជាប់ វេណេហ្ស៊ុយអេឡា

2019-01-29 07:22:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រដាសមួយសន្លឹក ដែលស្ថិតក្នុងដៃរបស់លោក John Bolton ទីប្រឹក្សាសន្តិសុខអាមេរិក បានបង្ហាញថា រដ្ឋបាលលោកប្រធានាធិបតី ដូណាល់ ត្រាំ គ្រោងនឹងបញ្ជូនកងទ័ពចំនួន ៥០០០នាក់ ទៅកាន់ប្រទេសដែលនៅជាប់ប្រទេសវេណេហ្ស៊ុយអេឡា។ ក្រដាសនោះបានសរសេរថា៖ «កងទ័ព ៥០០០នាក់ បញ្ជូនទៅប្រទេសកូឡុំប៊ី»។

ក្រដាសពណ៌លឿង ក្នុងដៃលោក John Bolton ទីប្រឹក្សាសន្តិសុខអាមេរិក សរសេរថា «កងទ័ព ៥០០០នាក់ បញ្ជូនទៅប្រទេសកូឡុំប៊ី» (រូបថត៖ Getting Images)

រូបថតលោក John Bolton កាន់ក្រដាសពណ៌លឿងមួយសន្លឹកនោះ ត្រូវបានថតក្នុងសេចក្ដីថ្លែងការណ៍ មុខអ្នកសារព័ត៌មាននៅសេតវិមាន កាលពីថ្ងៃទី២៨ ខែមករា ឆ្នាំ២០១៩។ ក្រសួងការពារជាតិអាមេរិក មិនអាចបញ្ជាក់ពីការបញ្ជូនកងទ័ពនេះ បាននៅឡើយទេ។

សហរដ្ឋអាមេរិក បានប្រកាសគាំទ្រមេដឹកនាំគណបក្សប្រឆាំងនៅវេណេហ្ស៊ុយអេឡា លោក Juan Guaido និងទទួលស្គាល់លោកជាប្រធានាធិបតីស្របច្បាប់។

ថ្លែងប្រាប់អ្នកសារព័ត៌មាន លោក Bolton បានលើកឡើងថា មន្ត្រី និងយោធាវេណេហ្ស៊ុយអេឡា ចង់ឲ្យមានការបន្ថែមកម្លាំងរក្សាសន្តិសុខ នៅក្នុងប្រទេសមួយនេះ ហើយលោក ដូណាល់ ត្រាំ បានបញ្ជាក់យ៉ាងច្បាស់ថា ដើម្បីដោះស្រាយបញ្ហានៅវេណេហ្ស៊ុយអេឡា អាមេរិកមានជម្រើសទាំងអស់។

សូមជម្រាបថា លោក John Bolton បានជំរុញឲ្យយោធា និងកម្លាំងសន្តិសុខវេណេហ្ស៊ុយអេឡា ទទួលយកការផ្ទេរអំណាចដោយសន្តិវិធី ប្រជាធិបតេយ្យ និងស្របតាមរដ្ឋធម្មនុញ្ញ ទៅឲ្យមេបក្សប្រឆាំង។ ការជំរុញនេះ ធ្វើឡើងខណៈដែលអាមេរិក បានបង្កើនការដាក់សម្ពាធទៅលើរដ្ឋាភិបាលរបស់លោក Nicolas Maduro តាមរយៈការដាក់ទណ្ឌកម្មលើក្រុមហ៊ុនប្រេងកាតរបស់រដ្ឋ PDVSA កាលពីថ្ងៃទី២៨ ខែមករា ឆ្នាំ២០១៩។

ទន្ទឹមនឹងនេះ លោកទីប្រឹក្សា ក៏បានអំពាវនាវឲ្យសម្ព័ន្ធមិត្ត និងដៃគូ ចូលរួមជាមួយអាមេរិក ក្នុងការទទួលស្គាល់មេបក្សប្រឆាំងលោក Juan Guaido ជាប្រធានាធិបតីស្របច្បាប់របស់វេណេហ្ស៊ុយអេឡា ហើយបិទនូវការដំណើរការមូលនិធិទាំងឡាយរបស់លោក Maduro ផងដែរ៕