Maduro ជិះរថក្រោះរុស្ស៊ី បង្ហាញសាច់ដុំយោធា ខណៈមានបញ្ហាជាមួយអាមេរិក

2019-01-28 08:16:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកប្រធានាធិបតីវេណេហ្ស៊ុយអេឡា Nicolas Maduro បានចុះត្រួតពិនិត្យសមយុទ្ធមួយដើម្បីបង្ហាញសាច់ដុំយោធា កាលពីថ្ងៃអាទិត្យ ទី២៧ ខែមករា ឆ្នាំ២០១៩ ដោយមានការបង្ហាញឧបករណ៍ធ្វើសង្គ្រាមមកពីប្រទេសរុស្ស៊ី ដូចជា អាវុធប្រឆាំងយន្តហោះចម្បាំង និងរថក្រោះរបស់ជាដើម។ ក្នុងវីដេអូមួយ គេឃើញលោក Maduro បានជិះរថក្រោះជាមួយយោធាផងដែរ។

លោក Maduro អើតចេញពីក្នុងរថក្រោះ (រូបថត៖ Twitter)

សមយុទ្ធយោធារបស់វេណេហ្ស៊ុយអេឡានេះ គឺបន្ទាប់ពីរដ្ឋបាលលោក Maduro ត្រូវបានអន្តរជាតិ ទាមទារឲ្យមានការបោះឆ្នោតឡើងវិញនៅក្នុងប្រទេសមួយនេះ និងបន្ទាប់ពីសហរដ្ឋអាមេរិក ប្រកាសទទួលស្គាល់មេបក្សប្រឆាំង លោក juan Guaido ជាប្រធានាធិបតីវេណេហ្ស៊ុយអេឡាស្របច្បាប់។

ក្នុងការបង្ហាញឧបករណ៍ធ្វើសង្គ្រាមរបស់យោធាវេណេហ្ស៊ុយអេឡានេះដែរ លោក Maduro អមដំណើរដោយរដ្ឋមន្ត្រីការពារជាតិលោក Vladimir Padrino បានទស្សនាការបាញ់គ្រាប់ពិត ទៅលើគោលដៅជម្រាលភ្នំមួយ នៅបន្ទាយ Paramacay ជិតរដ្ឋធានី Caracas ។

រថក្រោះ T-72 របស់រុស្ស៊ី ក្នុងសមយុទ្ធធ្វើឡើងនៅបន្ទាយ Paramacay ជិតរដ្ឋធានី Caracas ប្រទេសវេណេហ្ស៊ុយអេឡា (រូបថត៖ AFP)

លោក Maduro បានថ្លែងថា ការបង្ហាញសាច់ដុំយោធានេះដែរ គឺបញ្ជាក់យ៉ាងច្បាស់ថា លោកមានការគាំទ្រពីសំណាក់យោធាវេណេហ្ស៊ុយអេឡា។ លោកបន្តថា មេបក្សប្រឆាំងលោក Guaido កំពុងចូលរួមជាមួយអាមេរិក ក្នុងគោលបំណងដើម្បីធ្វើរដ្ឋប្រហារទម្លាក់រូបលោក។

ជាងនេះទៅទៀត លោកប្រធានាធិបតីវេណេហ្ស៊ុយអេឡា ប្រកាសយកថ្ងៃទី១០-១៥ ខែកុម្ភៈ ជាថ្ងៃធ្វើសមយុទ្ធទ្រង់ទ្រាយធំមួយទៀត ដែលលោកចាត់ទុកជា រឿងដ៏សំខាន់បំផុតក្នុងប្រវតិ្តសាស្ត្ររបស់វេណេហ្ស៊ុយអេឡា។

លោក Maduro ជួបជាមួយយោធា (រូបថត៖ Reuters)

គួររំឭកថា មេបក្សប្រឆាំង Juan Guaido បានប្រកាសខ្លួនជាប្រធានាធិបតីវេណេហ្ស៊ុយអេឡា កាលពីថ្ងៃទី២៣ ខែមករា។ ក្រោយសហរដ្ឋអាមេរិកបានទទួលស្គាល់លោក Guaido មេដឹកនាំ Maduro បានបណ្ដេញមន្ត្រីទូតអាមេរិកទាំងអស់ ចេញពីប្រទេស និងទុកពេលឲ្យ ៧២ម៉ោង។ លោក Maduro ក៏បានបញ្ជាឲ្យមន្ត្រីទូតវេណេហ្ស៊ុយអេឡាប្រចាំនៅក្រុងវ៉ាស៊ីនតោន ដកខ្លួនចេញពីអាមេរិក និងបញ្ជាឲ្យបិទស្ថានទូតផងដែរ៕

អត្ថបទទាក់ទង

ប្រភព៖ Globalnews ប្រែសម្រួល៖ លាភ.