នាវាទ័ពជើងទឹកឥណ្ឌា គ្រោងចូលចតនៅកម្ពុជា នាខែក្រោយនេះ

2019-02-12 04:18:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅចុងខែមីនា ឆ្នាំ២០១៩ខាងមុខ នាវាកងទ័ពជើងទឹកឥណ្ឌា មានគម្រោងចូលចតធ្វើទស្សនកិច្ចនៅកំពង់ផែអន្តរជាតិក្រុងព្រះសីហនុ ដើម្បីផ្លាស់ប្តូរបទពិសោធន៍រវាងកងទ័ពជើងទឹក និងកិច្ចសហប្រតិបត្តិការរវាងរដ្ឋាភិបាល នៃប្រទេសទាំងពីរ។ នេះបើតាមលោកស្រី Manika Jain ឯកអគ្គរដ្ឋទូតឥណ្ឌាប្រចាំកម្ពុជា ជម្រាបទៅកាន់លោក យន្ត មីន អភិបាលខេត្តព្រះសីហនុ ក្នុងជំនួបពិភាក្សាមួយកាលពីថ្ងៃទី១១ ខែកុម្ភៈ ឆ្នាំ២០១៩។

លោកស្រី Manika Jain ក្នុងជំនួបជាមួយលោក យន្ត មីន កាលពីថ្ងៃទី១១ ខែកុម្ភៈ ឆ្នាំ២០១៩។ រូបថត៖ រដ្ឋបាលខេត្តព្រះសីហនុ

លោកស្រីបានបន្តថា ឥណ្ឌា និងកម្ពុជា មានកិច្ចសហប្រតិបត្តិការទំនាក់ទំនងល្អ ដោយផ្តោតលើកិច្ចសហប្រតិបត្តិការអាស៊ាន លើគម្រោងអភិវឌ្ឍន៍មេគង្គ វិស័យអប់រំ បណ្តុះបណ្តាលធនធានមនុស្ស ដោយក្នុងមួយឆ្នាំៗ ឥណ្ឌាជួយបណ្តុះបណ្តាលធនធានមនុស្សចំនួន ១៥០នាក់ ហើយឆ្នាំ២០១៩នេះ បន្ថែម ២៩នាក់ទៀត។ ក្នុងនោះក៏មានវិស័យការពារជាតិ បណ្តុះបណ្តាលធនធានមនុស្សផ្នែកកងទ័ពជើងទឹក លើបច្ចេកទេសដោះមីន និងយុទ្ធភណ្ឌមិនទាន់ផ្ទុះជាដើម។

ជាការឆ្លើយតបលោកអភិបាលខេត្ត បានស្វាគមន៍ចំពោះសំណើសុំការចូលចតនាវាកងទ័ពជើងទឹកឥណ្ឌានៅចុងខែមីនាខាងមុខនេះដែរ ដោយលោកក៏ធ្លាប់បានចូលរួមអបអរសាទរ នៃការចូលចតនាវាកងទ័ពជើងទឹកឥណ្ឌា នៅកំពង់ផែក្រុងព្រះសីហនុ ២ដងរួចមកហើយ។

នាវាកងទ័ពជើងទឹកឥណ្ឌា (រូបតំណាង)

លោក យន្ត មីន គូសបញ្ជាក់ថា ប្រទេសកម្ពុជា និងប្រទេសឥណ្ឌា មានទំនាក់ទំនងល្អជាមួយគ្នាដូចជាបងប្អូននឹងគ្នាតាំងពីដើមមក។ គ្រាដែលកម្ពុជាមានសង្គ្រាមផ្ទៃក្នុង ប្រទេសឥណ្ឌា បានចូលរួមក្នុងការសម្របសម្រួលជាអន្តរជាតិ ធ្វើឱ្យកម្ពុជាមានសុខសន្តិភាព សេរីភាពពេញបរិបូណ៍ លើផ្ទៃប្រទេស។

គួរកត់សម្គាល់ដែរថា នាវាចំនួន២គ្រឿងរបស់កងកម្លាំងស្វ័យការពារជើងទឹកជប៉ុន ក៏នឹងមកធ្វើទស្សនកិច្ចនៅកម្ពុជា ពីថ្ងៃទី២៥ ដល់ ២៨ ខែកុម្ភៈ ឆ្នាំ២០១៩ខាងមុខនេះផងដែរ ដើម្បីពង្រឹងទំនាក់ទំនងមិត្ដភាពរវាងប្រទេសជប៉ុន និងព្រះរាជាណាចក្រកម្ពុជា៕

ចុចអាន៖ នាវាទ័ពជើងទឹកជប៉ុន២គ្រឿង នឹងមកកម្ពុជា នៅចុងខែកុម្ភៈនេះ

អត្ថបទ៖ សំភី