អាកាសចរណ៍ហ្វីលីពីន ទម្លាយរឿងលម្អិតពីជើងហោះហើរត្រង់ ភ្នំពេញ-ម៉ានីល
- 2019-03-06 08:16:38
- ចំនួនមតិ 0 | ចំនួនចែករំលែក 0
អាកាសចរណ៍ហ្វីលីពីន ទម្លាយរឿងលម្អិតពីជើងហោះហើរត្រង់ ភ្នំពេញ-ម៉ានីល
ចន្លោះមិនឃើញ
ក្រុមហ៊ុនអាកាសចរណ៍ហ្វីលីពីន Philippines Airline នឹងតភ្ជាប់ជើងហោះហើរត្រង់លើកដំបូង ពីរដ្ឋធានីម៉ានីល ទៅមក រាជធានីភ្នំពេញ នាដើមខែមេសា ឆ្នាំ២០១៩ ខាងមុខនេះ។
ថ្លែងក្នុងជំនួបជាមួយលោក ថោង ខុន រដ្ឋមន្ត្រីក្រសួងទេសចរណ៍ កាលពីថ្ងៃទី៥ ខែមីនា ឆ្នាំ២០១៩ នៅទីស្ដីការក្រសួង លោក Jaime J. Bautista ប្រធានក្រុមហ៊ុនអាកាសចរណ៍ Philippines Airline បានឲ្យដឹងថា ការហោះហើរត្រង់នេះ ប្រើប្រាស់ពេលតែប្រមាណជាង ២ម៉ោងប៉ុណ្ណោះ។
កាលពីដើមឆ្នាំ២០១៩ លោក Jaime J. Bautista បានបង្ហើបថា សម្រាប់ជើងហោះហើរ ភ្នំពេញ-ម៉ានីល ក្រុមហ៊ុនគ្រោងប្រើប្រាស់យន្តហោះប្រភេទ Airbus A320 ដែលអាចផ្ទុកអ្នកដំណើរ ១៥៦នាក់ និង Airbus A321 ដែលផ្ទុកអ្នកដំណើរបាន ១៩៩នាក់។ ប្រធានក្រុមហ៊ុននេះបន្ថែមថា ក្នុង១សប្ដាហ៍ នឹងមានជើងហោះហើរចំនួន ៥ជើង ពោលគឺ ថ្ងៃចន្ទ អង្គារ ព្រហស្បតិ៍ សុក្រ និង សៅរ៍។
លោក ថោង ខុន បានថ្លែងថា តាមរយៈការតភ្ជាប់ជើងហោះហើរត្រង់នេះ គឺនឹងជួយជំរុញកំណើនទេសចរពីហ្វីលីពីន និងប្រទេសទី៣ មកកាន់កម្ពុជាកាន់តែច្រើន ខណៈភ្ញៀវទេសចរហ្វីលីពីនដែលមកទស្សនាកម្ពុជា ក្នុងឆ្នាំ២០១៨ ប្រមាណតែជាង ៩ម៉ឺននាក់ប៉ុណ្ណោះ។
លោករដ្ឋមន្ត្រីបន្ថែមថា ការតភ្ជាប់ជើងហោះហើរត្រង់ម៉ានីល-ភ្នំពេញនេះ គឺជាប្រវត្តិសាស្ត្រលើកដំបូងរបស់កម្ពុជា ពីព្រោះតាំងពីឆ្នាំ១៩៧០មក កម្ពុជាមិនទាន់មានជើងហោះហើរត្រង់ណាមួយ ពីភ្នំពេញទៅមកម៉ានីលឡើយ។
សូមជម្រាបថា បច្ចុប្បន្នក្រុមហ៊ុនអាកាសចរណ៍មួយរបស់ហ្វីលីពីន ក៏បានហោះហើរត្រង់ពីទីក្រុងសេប៊ូ (ទីក្រុងមួយនៅលើកោះសេប៊ូ នៃប្រទេសហ្វីលីពីន) មកក្រុងសៀមរាបផងដែរ ដោយក្នុងមួយសប្ដាហ៍ហោះហើរ បានចំនួន ៤ជើង៕
អត្ថបទទាក់ទង ជើងហោះហើរត្រង់ ភ្នំពេញ-ម៉ានីល ផ្ដើមដំណើរការនៅដើមខែមេសា ឆ្នាំ២០១៩