សម្តេច ហ៊ុន សែន ថាគណៈប្រតិភូអឺរ៉ុបដែលមកម្ពុជា មិនទាន់មានកម្រិតជួបដល់សម្តេចឡើយ

2019-03-21 03:13:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានបញ្ជាក់ថា គណៈប្រតិភូសហគមន៍អឺរ៉ុបដែលកំពុងធ្វើទស្សនកិច្ចនៅកម្ពុជា គឺមិនទាន់មានកម្រិតអាចជួបពិភាក្សាការងារជាមួយសម្តេចបានឡើយ។ ការថ្លែងនេះ ធ្វើឡើងនៅក្នុងពិធីប្រគល់សញ្ញាបត្រជូនដល់និស្សិតសាកលវិទ្យាល័យអាស៊ីអឺរ៉ុប នៅវិទ្យាស្ថានជាតិអប់រំ នាព្រឹកថ្ងៃទី២១ ខែមីនា ឆ្នាំ២០១៩។

សម្តេច ហ៊ុន សែន ថ្លែងនាពេលកន្លងមក

សម្តេច ហ៊ុន សែន បានមានប្រសាសន៍យ៉ាងដូច្នេះថា៖ «**ឥឡូវនេះ គេថា ពេលដែលពួកអឺរ៉ុបទៅជួប ស ខេង និយាយផ្សេង ពេលដែលទៅជួប ប្រាក់ សុខុន និយាយផ្សេង ហើយគេមក មិនជួបជាមួយ ហ៊ុន សែន ទេ។ កម្រិតហ្នឹង អត់ត្រូវជួបជាមួយនឹងហ៊ុន សែន ទេ ជួបធ្វើអី? កម្រិតថ្នាក់នាយកដ្ឋាន ថ្នាក់ស្អីៗហ្នឹង ជួបដល់ឧបនាយករដ្ឋមន្រ្តី វាខ្ពស់ពេកទៅហើយ**»។

ប្រមុខរាជរដ្ឋាភិបាលបន្ថែមថា កម្រិតដែលអាចជួបជាមួយនឹងសម្តេចបាន លុះត្រាតែជា មេ EU ឬស្នងការ EU ជាដើម។

សូមជម្រាបថា កាលពីថ្ងៃទី ២០ ខែមីនា ឆ្នាំ២០១៩ លោកស្រី Poala Pampaloni នាយករងផ្នែកគ្រប់គ្រងប្រចាំការតំបន់អាស៊ីប៉ាស៊ីហ្វិច និងជាប្រធានគណៈប្រតិភូសហគមន៍អឺរ៉ុប បានមកធ្វើទស្សនកិច្ចនៅកម្ពុជា ដោយបានចូលជួបពិភាក្សាជាមួយសម្តេច ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ និងលោក ប្រាក់ សុខុន ឧបនាយករដ្ឋមន្ត្រី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ។ ក្នុងជំនួបទាំង២នេះ គឺដើម្បីបង្កើននូវកិច្ចសហប្រតិបត្តិការរវាងភាគីកម្ពុជា និងអឺរ៉ុប ពោលគឺមិនមានគោលដៅដកប្រព័ន្ធអនុគ្រោះពន្ធ EBA ពីកម្ពុជានោះទេ៕