ក្រុមបាល់ទាត់ជម្រើសជាតិប្រេស៊ីល បាន​ក្លាយជាម្ចាស់​ជើងឯក Copa America 2019 បន្ទាប់ពី​យកឈ្នះ​ប៉េរូ ដោយ​លទ្ធផល ៣-១ ក្នុងវគ្គផ្តាច់ព្រ័ត្រ​កាលពី​យប់មិញ។ យ៉ាងណាមិញ គេមើលឃើញថា រូបរាងពានធំ​ប្រចាំ​តំបន់​អាមេរិក​ខាង​ត្បូង Copa America ២០១៩ មិនដូចពានកាលពីឆ្នាំ ២០១៦ តើហេតុអ្វីបានជាវាខុសគ្នា?

កាលពីឆ្នាំ ២០១៦ គ្រាដែលឈីលី បានគ្រងជើងឯកលើកទី ២ ក្នុងប្រវត្តិសាស្រ្តរបស់ខ្លួននោះ គឺជាពានដែលធ្វើឡើងពីមាសជាពិសេស សម្រាប់គម្រប់ខួប ១០០ ឆ្នាំនៃការបង្កើតព្រឹត្តិការណ៍បាល់ទាត់ដ៏ចំណាស់មួយនេះ(១៩១៦-២០១៦)។

ជាងនេះទៀត ក្រុមដែលចូលរួមទាំងអស់ក៏មានភាពខុសពីរាល់ដងដែរពោលគឺមាន ១៦ ក្រុមដែលមកពីតំបន់ CONCACAF (មានអាមេរិកខាងជើង (៦ក្រុម) អាមេរិក​កណ្ដាល និងតំបន់​ការីប៊ីន) ថែមទាំងសហរដ្ឋអាមេរិកនិង មុិចស៊ិកផងដែរ។ ឆ្នាំនោះ ក៏ជាលើកដំបូងដែលមានក្រុមចូលរួមច្រើនជាងគេ និងមានដល់ទៅ ២ ទ្វីបធ្វើការប្រកួតប្រជែងគ្នា។

ដំបូង​ឡើយពាន​នេះ មាន​ឈ្មោះ​ថា South American Football Championship ប៉ុន្តែ​ត្រូវ​បាន​ប្ដូរ​ជា Copa America នៅឆ្នាំ ១៩៧៥។

ចាប់ពីឆ្នាំ ១៩៩៣ មក ពាន​នេះមាន ១២ ក្រុម គឺប្រទេស​អាមេរិក​ខាងត្បូង ទាំង ១០ បូក​ប្រទេស២​ទៀត ដែល​ត្រូវ​បាន​អញ្ជើញ​ឲ្យ​ចូលរួម។

នៅ​ឆ្នាំ ២០១៩ នេះ ការប្រកួត​ធ្វើ​ឡើង​នៅ​ទឹកដី​ប្រេស៊ីល ដោយ​មាន​ ១២ក្រុម​ចូលរួម គឺ​ក្រុម​អាមេរិក​ខាងត្បូង​ទាំង ១០ បូក​ជប៉ុន និង​កាតា មកពីអាស៊ី។ ចំពោះពានដែល ប្រេស៊ីល ទើបនឹងឈ្នះបច្ចុប្បន្ន គឺជាពានដ៏ចំណាស់មួយដែលមានអាយុកាល ១០១ ឆ្នាំមកហើយ។ រីឯប្រទេសដែលឈ្នះពាននេះច្រើនជាងគេគិត​ចាប់​តាំង​ពី​កកើត​មកគឺ អ៊ុយរុយហ្គាយ​ជា​ក្រុម​ដែល​ធ្លាប់​លើក​ពាន​នេះ​ច្រើនដង​ជាង​គេ (១៥ដង) តាម​ពីក្រោយ​អាហ្សង់ទីន (១៤ដង) និង​ប្រេស៊ីល (៨ដង)៕

អត្ថបទទាក់ទង៖

• ប្រទេសណា ធ្លាប់​លើក​ពាន Copa America ច្រើន​ជាងគេ?
• ប្រេស៊ីល លើកពាន Copa លើកដំបូង ក្រោយ​ខកខាន​១២ឆ្នាំ (មានវីដេអូ)