កម្ពុជា គ្រោងស្នើសុំកំណល់រថភ្លើងបន្ថែមទៀតពីម៉ាឡេស៊ី

2019-07-26 23:44:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងជំនួបជាមួយលោក Eldeen Husaini Mohd Hashim ឯកអគ្គរាជទូតម៉ាឡេស៊ីប្រចាំនៅកម្ពុជា កាលពីថ្ងៃទី២៥ ខែកក្កដា ឆ្នាំ២០១៩ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងអំណរគុណដល់ភាគីម៉ាឡេស៊ី ដែលបានជួយឧបត្ថម្ភកំណល់រថភ្លើងប្រើប្រាស់ហើយ និងបានជម្រាបជូនថា កម្ពុជានឹងស្នើសុំកំណល់រថភ្លើងបន្ថែមទៀត ដើម្បីកសាងផ្លូវដែកកម្ពុជា ឱ្យមានសន្ទុះរីកចម្រើនទៅមុខ។

ចុចអាន៖ សម្តេច ហ៊ុន សែន ស្នើសុំផ្លូវដែកចំនួន ១៤០គីឡូម៉ែត្រពីថៃ

នៅក្នុងកិច្ចពិភាក្សានោះ ភាគីទាំងពីរបានព្រមព្រៀងគ្នាថានឹងធ្វើកិច្ចសហប្រតិបត្តិការបន្ថែមទៀតលើវិស័យសំខាន់ពីរ ទីមួយទាក់ទងនឹងវិស័យអាកាសចរណ៍ស៊ីវិលដែលលោកទេសរដ្ឋមន្ត្រីជំរុញឱ្យពិភាក្សាផ្ទាល់ជាមួយអាកាសចរណ៍ស៊ីវិលកម្ពុជា និងទីពីរទាក់ទងនឹងកំពង់ផែស្វយ័តក្រុងព្រះសីហនុ ដែលលោកឯកអគ្គរាជទូតម៉ាឡេស៊ីនឹងដឹកនាំគណៈប្រតិភូចុះទៅខេត្តព្រះសីហនុ ដើម្បីសិក្សាស្វែងយល់ ពិសេសដើម្បីឱ្យកំពង់ផែប្រទេសទាំងពីរបានសិក្សាស្វែងយល់គ្នាទៅវិញទៅមក និងសហការគ្នាបន្ថែមទៀតលើវិស័យនេះ។

ជាមួយគ្នានេះផងដែរ លោកឯកអគ្គរាជទូតបានសន្យាថានឹងជំរុញឱ្យវិនិយោគិន និងក្រុមហ៊ុនធំៗនៅម៉ាឡេស៊ី ដែលមានសមត្ថភាពកសាងផ្លូវថ្នល់ ពិសេសក្រុមហ៊ុនដែលកសាងផ្លូវថ្នល់ផ្អែកលើគោលការណ៍កសាង ប្រតិបត្តិ ផ្ទេរ (BOT) មកធ្វើការសិក្សាស្វែងយល់ និងអភិវឌ្ឍហេដ្ឋារចនាសម្ព័ន្ធផ្លូវថ្នល់ និងការដឹកជញ្ជូននៅកម្ពុជា។

លោក ស៊ុន ចាន់ថុល បានសម្តែងនូវការស្វាគមន៍ប្រទេសម៉ាឡេស៊ី ដែលបានសហការជាមួយប្រទេសកម្ពុជា ក៏ដូចជាគាំទ្រដល់ការអភិវឌ្ឍហេដ្ឋារចនាសម្ព័ន្ធ ជាពិសេសក្រសួងសាធារណការ និងដឹកជញ្ជូន៕

អត្ថបទ និងរូបថត៖ ក្រសួងសាធារណការ និងដឹកជញ្ជូន